WWW.TUNGZANGNEWS.COM

 
Tuesday, January 31, 2012


Hih banga thu nong vaihawm theih uh lungdamhuai mahmah sa ing. A makaite tungah lungdam hong ko nuam ing.

Zomi hi'ng, a ci nuam zaw diak ei Tedim kampaute in Pasian thu bek tawh na khempeuh a man pahpah sa khin mawk i hih manin i biakna makai siate-a kipan pulpit bekah thu gen kunkun uha, i minam peuhmah ngaihsutpi-in kinei ngei lo a hih manin mi khut nuai kitung dekdek ta hi. Tu-a a ngimna uh bangin liaison office khawng ei gam sungah hong koih ta zen leh kuamah tang thei nawn lo ding hi hang. Nidang sang luang tam zaw in sawng ding hi. Lal lawh taktak ding hi hang.

Jesu um khempeuh vantung a tung ding hi-a vantung i tun' ma ciatin leitungah bang ci nuntak ding i hiam? cih zong i ngaihsut ciat ding kisam mahmah lai sam ding hi. I minam bang ci kalsuan ding i hiam? cih zong kisam mahmah lai sam ding hi. Tuiphum lungsim pua lo ding, fundamental lungsim nei lo ding, cih toi muhna khawng i minam sungah gengen nawn lo ding hi hang. Hallelujah! ci munte Yangon pan Tedim ciah ding sum kikhak ngam lo hi, cih lel khawng tawh i biakna paklaksak lo ding hi hang. Pasian um kisa i hih leh zong i upna tawh i minam puah ding hi hang. Hallelujah! ci munte Yangon pan Tedim ciah ding, sum kikhak ngam nawn lo hi, cih lel khawng tawh nitum lo ding hi hang. Hong kithutuak un la, hong vaihawm khawm un. Minam hong ngaihsun ta un. 

Pasian i up manin i minam bei pah sam lo hi. I minam haisak lo ding hi hang. Pasian thu hai up lo ding hi hang. Pasian thu tawh i minam bang ci-in lawng khatin kalsuan khawm thei ding i hiam? cih bek ngaihsun ta ding hi hang. Tu ciang dong kikhen tak lopi pawl i kikhenkhenna pen thu dang hi lo hi. A Pasian um lua-a i upna kilamdang ta teu in, ci-a a kikhen zong hi lo hi hang. Ang sung khawng vive a kikhen pih hi lel hi hang. Minam lungsim i neih loh luat man hi.
I vekin kithutuak mah le'ng zong mi nuai tham zong pha nai lo kim lai, Sim leh Zo zong kicihcih hun nawn lo hi. Haihuai mahmah hi. Tu-a makaite'n limtak hong vaihawm suak ta un.

I biak Pasian in minam dangte khut nuai tung lo dingin hong siam ta peuh hen!Rev. 

Eddie N. Hang, Zomi Baptist Church, Nashville, Tennessee, USA.

 


Comments


Your comment will be posted after it is approved.


Leave a Reply

    Tungzang News

    All