WWW.TUNGZANGNEWS.COM

 
Dear Zomi te,

Kawlgam kikhelna pen a diktakpi (genuine) ding mah hiam? Deihsak bangin a hoih lam in hong kikhel takpi ding mahhiam? “Kawlte te pen zuaukhem uhhi, muanhuai lo uhhi,” cih pen Kawlgam ah a teng minam dangte in kawl mite amuh na hi. A hih zah khat in kawlgam tangthu en leng, mangkang te khutsung pan suahtak zawh Panglong thukimna pan kipan in, tuni ciang dong mah kawlte khemsa leh zawhthawh na a kithuak lai ahihi. Tuni kawlgam kikhelna zong mualtung mite leh leitung in muanmawhna mit tawh kidawm tak in ki encik hi.

2010 November kha in Kawlgam buppi in 1990 khit zawh a khatvei na kiteelna hongbawl uh a, tua sung ah party 37 hong kidem uhhi. Lamet sa leh upmawh samah bang in, USDP (KyaintKhaingYee) ten hong zo uh a, Hluttaw ah a kigawm in tutna 80% valngah uhhi, tutna mun avekpi kigawm in 1551 pha hi. Kiteelpi khit zawh deuh ciang in, Aung San Suu Kyi suakta sak uhhi.

Kawlgam khantoh nang leh kikhel nang puahphat nate Thein Sein kumpi in mitphial lak bang in nasia tak in hong bawl uh a,  thangah huai thei mahmah hi. Democracy ki-ukzia kilam thak na ding leh democracy tawh kalsuan zia te akician in zuih theihna ding in Sweden gam a om, Institute for Democracy and Electoral Assistance te zong Hluttaw ah, February 2012 sung in sam uhhi. Kawlgam democracy picing tak in a kalsuan theihnang ngaihsutna leh lamlakna te ngen uhhhi. IDEA pan secretary-general Vidar Helgesen genna ah, kawlgam hibang in kongkhak hong hon uh leh, democracy deihna takpi tawh hongsap na te uh kipak ung, zong lamdang saphial ing ci in gen hi.  February khasung mah in Kawlgam kumpi leiba, $11 billion, te zong mipi theihding in hong gen uhhi. Tua ban ah hunkhat lai in, gennop khat peuh zong akigen ngam lo Kawlgam ah, "Media Law" thak bawl ding ci in Hluttaw in geelna nei a, ASEAN gamlak pan asuakta pen gamkhat hi ding ci in gen uhhi. Hi tawh kizui in IT lam ahi internet leh cell-phones te a khantoh nang nasia takin hanciam san mahmah uhhi. 

April khasung in kumpi bank (central bank) pen sumkem leh siahdong na (treasury leh custom and tax) ministries nuai ah koihnawn lo ding a, amahmah leh suakta takin nasem sak thei ding ci in zong gen uhhi. Kumpi bank suakta takin na hongsem thei leh, vanman khanna (inflation rate) leh sum leitawina a met (interest rate) te a mau thu in sem thei ding, political influence om lo ding cih na hi. Tua ban ah kumsim in mipi theih ding in sumlut/sumzat etna (GDP) te zong kumsim in gen khia ding ci uhhi. Summet bawlna thukhun (investment law)  te zong a bawlsan laitak hi. Puahphat na tampi tak hong bawl uhhi. Hibang in thuhoih lahoih tampi tak hongsepna tungtawn in thangah huai mahmah hi. Kawlgam pen a khangto takpi, a kikhel takpi ding tawh kibang hi. 

Alangkhat ah khantoh na ding leh phat tuam na ding tampi tak asep mahbang in, a langlam pan in mualtung mite tawh buaina te zong hongnei zel ahih man in, Thein Sein kumpi pen kidawp mahmah ding hi. Zawhthawh thu tawh mualtung mi galkap te pen gamgi cing (Border Guard Force) ding in thupiak na hong nei uhhi. Mualtung mi te in a sang zawh lo uh ciang in, 2011 January khasung in Dek galkap te nasia takin hong do uh a, thauvui, thaupi te tawh tampi tak zang uhhi. Tua ban ah, Shan galkap, Wa galkap te tawh zong buaina hong nei lailai uhhi. 2011 February khasung in KIO te zawhthawh thu tawh hong kap leuleu uhhi. Thatang, thauvui, thautang suangin, mualtung mite hong sim/do lai uhhi. 

Kawlgam khangto takpi hi cih theih na ding in kawlgam sung aom, minam tuamtuam te abucing in a khantoh ding kisam hi. Tua bang in a bucing in khantoh theih na ding in, kawlte leh mualtung mite kikal ah kilem na leh kimuan na a omding kisam masa ding hi. Kilemna leh kimuan na om theihna ding in, kawlgam ki-ukna thukhun laibupi sung ah bangteng ki-at hiam cih hong thupi pen ding hi. Constitution sung ah at bek tawh zong hong kicing lo ding a, (law enforcement) bang ciang sem zo, kamciam hong piak sa te koiciang semzo cih te zong et ding hi lai hi. Thein Sein in kawlgam ah democracy akipkho nang leh gam khantoh nang in gamsung kilemna leh mualtung mite tawh liangko kikim kisam masa hi in ci in March kha sung in, Hluttaw ah gen taktak tasam hi. Tua mah bang in ASSK in zong Kachin gam leh Shan ah thugen in avak na te ah, kawlte leh mualtung mi te kilemna ding thupi in gen khia hi. A hi zong, a gente uh leh a tak kituak maw cih zong khua ngaih kisam mahmah lai ding hi.

Et theih, muh theih, inn leh lo, neih leh lam (materials) khantoh na bek tawh kawlgam kikhel ki ci thei lo ding hi. Ben Rogers (CSW) in Kawlgam mibup lakpan 40% apha, kawlgam leitangbup lakpan 60% ah ateng, mualtung mite khempeuh in kawlte tawh liangko kikimna, upna leh biakna te suahta tak in biak theihna, ngeina leh dante zahtakna, minam khatciat ahihna bangin ciaptehna, suahtat na leh kilemna a ngah mateng un, kawlgam kikhel hi kici thei lo ding hi ci hi.  Thein Sein kumpi in Hluttaw pan in bang constitutional law, bang equality rights, bang freedom rights leh mualtung mite tung ah bangciang autonomy geel uh cih te mitsuan in khua ngaih zawk ding kisam hi. Mangkang te khutsung pan suahtakna (independence) ngah nop man in, kawlte khemsa ki thuak in suahtak na khempeuh kisup lawh khin hi. Democracy ngahnop luat man leh hauhnop luatman in, gam leh minam beilawh khak ding lauhuai hi. 

CS Dal

 


Comments


Your comment will be posted after it is approved.


Leave a Reply

    Tungzang News

    All