WWW.TUNGZANGNEWS.COM

 
6 Virtues and 24 Character Strengths

Pil tak, kilawm taka tomcik i nuntak sung mite maiah i gamtat theihna dingin a tunga thulu bang hiam cih anuaiah en khawm ni. 

Mihing lungsim thu a sinte in muh dan nam nih nei uh hi. Hunlui ah mite a damloh ciangin 'bang hoihlohna nei hiam' cih kan uh a, kum 1986 zawh lam ciang positive psychology cih khat hong kipankhia a, a pankhiatpa (founder) Martin Seligman leh a seppih Prof. Christopher Peterson in mite in 'bang hoihna nei hiam' cizaw uh hi. Hunlui leh hunthak ..... kilehbulh lian hi. Tua ngaihsutdan
thak, muhdan thak pen Harvard professor Howard Gardner in "tuma kum 50 sunga lungsim lam sinna ah ngaihsut dan a thupi pen hi," ci liang hi. 

Zokam in Virtue leh Character bang hiam cih Zodictionary http://zodictionary.com/ pan i et ciangin anuaia bangin kihilhcian hi. Behlap kullo in a khiatna kicing kasa a, ka deihpen a nuai ka git hi. 

Virtue: kaamphatna, hoihna, lungsim leh gamtat hoih deihhuaina.
Character:
gamtat luhek, omdan, kampau leh gamtat.

Positive psychology lungsim leh gamtat hoih deihhuaina  nam guk leh gamtat luhek dan nam sawmnih leh li om hi. Tua pen Seligman te lawmta in hih bangin na gualsuk uh hi. 

1. Ciimna leh Theihna (Wisdom and Knowledge): Mi khat in mit tawh kimu thei pilna leh ciimna a neih khit ciang tua pilna tawh kizui a gamtat siamna genna hi. Tua bang nei hi cih a lahna dingin mite in hih bangin a gamtat luhek a nei hi. 

(1). Thubul ngaihsut siamna (creativity) : A hoihpen ding, a manpha pen dinga ngaihsut siamna leh sepzia ding ngaihsut khiatna ahi hi. 

(2). Theih utna lungsim (curiosity): Lunglutna kiciantak nei, a manpha leh zat taak dinga lungsim zangsiam, a hoihzaw aphazaw dinga ngaihsutna nei thei cihna hi. Thupiang khat peuhpeuh ah a hoihzaw leh a limci zaw a sep khiat kik dan ding a ngaihsun theite. 

(3). Ngaihsutna tuamtuam sang siam (open-mindedness): Mite ngaihsutna tuamtuam lak pan a hoihpen ding tengkhia siam, sittel siam, a manpha pen ding tawh kalsuan dan ding khentat siamna. 

(4). Kisintawm nuam den (love of learning): Thuthak khat peuhpeuh, sepdan thak khat peuhpeuh kisin ut, thei ut, siam utte genna hi. Ka theihsa om cih tawh tu miumiaulo a a hoihzaw sepzia, ngaihsutzia a om ciang ama theihsa leh siamsa behlap dinga kisin ut denna hi. 

(5). Ngaihsut dan muhdan kiciantak nei (perspective): Theihna leh ciimna takpi tawh mite ama muhdan ama ngaihsutdan kician taka kuppih thei, genpih thei cihna hi. Mite khuahek dan, ngaihsut dan ding a taanzau zaw, a tangzai zaw a lak thei, musak thei, hilh thei cihna hi. Pil mahmahna a kilatna khat hi. 

2. Hangsanna (Courage): Pasal vai taka lungneu pahpah lohna, lungsim khauh taka haksa taleh ahoih apha ding sep ngamna, mite in dodal in panpih kei taleh ahoihzaw ding ahih naak leh sep teitei ngamna leh tup leh ngim matut teitei na. 
 
(6).  Hangsan taka sep ngamna (bravery): Lauh nei vetlo a phu ngam, mite in tawsawn kei taleh lau vetlo a sem ngam, haksa in nuamlo hitaleh sem teitei, mite muhna ah thupi venvan kei taleh natna satna tampi thuaka zong ahoih ding sem teitei ngam. 

(7). Nungkik ngeilo (persistence): Thuak keikai, thanuam taka sem tantan. A kipatsa khat, a sawmsa khat peuhmah a sepsuah mateng khawllo a matut teitei. Haksatna thuak hang bek in a tup a ngim tawpsanlo, kuhkal taka sem suak veve. 
 
(8). Muanhuai ngitnget (integrity): Zuaugenlo, muanhuai, thudik, a ngaihsut leh a sep khat peuh a deihna kiciantak thei, phuaktawmlo, kilimneihlo, a hihkhialh a sepkhialh a om leh zong a mawhpua ngam, dual vetlo. 

(9). Thanuamna (zest): Lunglutna nei den, thanuam taka sem den. Nuntakna leitung pen thanuam taka nasepna tawh matutna gam hi cih tel sitset. A sep, a bawl khatpeuh lawp mahmahna tawh sem ziahziah den. 

3. Mihing itna leh khualna nei (Humanity): Mihing khat leh khat kikal ah ki it tuahna leh kikhual tuahna neih kisam hi cih thei in mi khempeuh it in khual a, lawm leh gual in mu thei, sang thei khin hi. 

(10). Itna (love): Mihing kinaihna leh kizopna a thupina tel in kizop kikholh ding ahihna uang bawl in mite it in kholhpih hi. 

(11). Migitna (Kindness): Midang adingin a neih a lam itlo in mite deihsakna tatsatlo nei. Mite in 'migi si' acih uh hang kiphasak tuanlo. Mite hoihna dingin nasep kidamlo a, mite deihsak in thukhual tawntung hi. 

(12). Kikholhsiamna (social intelligence): Mite ngaihsut zia ding leh ama ngaihsutzia tawikhai thei tawntung. Ama ngaihsutna bek thupisak in midangte lungsim khuallo in om ngeilo. Mite ngaihsutna zong thupisim sak siamin pilvang takin hopih den. 

4. Thudik thumaanna (Justice): Mi khempeuh suakta taka a nuntakna khop theihna dinga siksan lianpi ahi hi. Thudikna leh thumaanna omlo in ki itna kizopna te sawt to lo hi. 

(13). Teen khopna (citizenship): I khuapih tuipih leh mipihte tungah muanhuaina, mite hong muan dinga nuntak khop liailiai na. Sepna khempeuh ah kituak taka sem khawm, kalsuan khopna. Ei bek i gamtat ciang zong i tenpih khua leh tui lungsim ding, heh ding, dah ding, lungdam ding khual kawma gamtat siamna.

(14). Deidan neihlohna (fairness): Mi khempeuh a kibanga mu thei, kuamah deidan tuam neilo. It tuam, paih tuam neilo a nuntakna leh gamtatna. Ei mimal angsung theihna ukcip a mi khempeuh ading ahoih pen ding ngaihsun-a gamtat siamna. 

(15). Makaihsiamna (leadership): Mi khempeuh nasep khopna ah mi khempeuh thanuam taka a sep ciat theih nadinga mimal khat ciat tawsawn kawma thapiak siamna. Sawllua cih omlo, deihsak tuam cih omlo, liangko kikim taka sepkhawmsak siamna. 

5. Kidekzawhna (temperance): A uanglua a vallua ding kidek zawhna. 

(16). Mawh maisakna leh itna tawh maisakna (forgiveness and mercy): A khial te maisakna, a cing zolo te theihsiamna, mite hanciam mahmah khit ciang a kicinlahna te uh theihsiamna leh telpihna. Kua mah tungah thukkik sawmlohna lungsim. 

(17). Kiniamkhiatna leh a kilawm ciang beka gamtatna (humility and modesty): Ei leh ei kiphat hilo in mite hong phat ding ngaihsut siamna, midang sanga tungnungzaw, sangzaw a kingaihsut tawntung a kullohna tel siam. 

(8). Kampau kidawm siam (prudence): A kullo, a kisamlo pi a mawk paupau lohna. Deihtel ding tampi a om ciang a uanglua, a vallua a gamtat gawplohna. A nung cianga kisik kik ding kampau khaklohna, nasep khak lohna, kidop siamna. 
 
(19). Kiukzawhna (self-control): Sep dinga hoih leh a kilawm, a manpha bek sepna. Ut khempeuh sep a kullohna tela a manpha bek sep tintenna. Duh khempeuh ne, deih khempeuh lei hilo in a hun bek, a kilawm bek theia gamtat siamna.

 6. A tangzaizaw a kizopsiamna (transcendence): Mimal khat leh khat ciang bek hilo a tangzaizaw a midang tawh zong kizop kikholh siamna. 

(20). Ahoihte hoihsakpih siamna (appreciation of beauty and excellence): A hoih, asiamte hoih hi siam hi cihpih theihna. Mite lawhcinna lungdampih theihna. Mite hoihna phat theihna. Mite nopni a noppih a, a dahni a dahpih theihna.   

(21). Lungdam na lungtang (gratitude): A hoih a pha khempeuh ah lungdam den thei, lungdamna leh lungdam thu tangko den thei. 

(22). Lametna nei (hope): Ahoih pen in hong ngak hi. Ahoih pen apha pen kitung nailo hi ciin lametna a bei ngeilo nei thei. 

(23). Ciamnui thei (humour): Mite tawh nuikhawm, ciamnuih gen khawm thei. Ciamnuih telsiam, ciamnuih zangsiam mi. Midan nuisak thei, mite' ciamnuih zong thuakzo, thuaksiam.  

(24). Kha mi (spirituality): Upna leh gimna kician tak tawh nungta. Biakna leh leitung khen lam thute hoihtaka thei, tel sitset. Leitungah i nuntakna ahang leh a manphatna tel.    


Hau Za Cin
Phuitong Liim
www.hauzacin.blogspot.com
 


Comments




Leave a Reply

    Tungzang News

    All