WWW.TUNGZANGNEWS.COM

 
Lawmte Aw,

Chin maw Zomi cih mawk pen Kawlgam ah university sangkah ngei te in a kibat leh kibatloh naaktel pen dingin ka um hi.  Kawlpau tawh i minam min Chin kici a ei pianpih pau tawh khiatsawm nonlo mite ading in Chin mi hi hang ci uh hi. Chin pen China tawh kibang to leuleu a, Sente bangin ei mite hiam na cikha den uh hi.

Zomi pen Kawlte i Chin a cih mite amau le amau akisapna uh ahih manin, minam it taktak khat adingin Zomi hi ing cih ding pen Chin mi hi ing cihsangin khauhpai zaw hi. Minam min pen ei pau tawh lawh ding mah thupi kisa zaw hi. Zumhuai lo hi ka cihna ahi hi.

A tawpna ah, Chin a kici te'n gualzo ding maw, Zomi a kici te'n gualzo suak ding cih tawh kisai in, pilna, sumzon siamna le thutheihna in ong saito ding hi.  Kuan zozaw ding cih tawh kisai in, a thumaan zo den, a citak mahmah den, a thukhualzo den, mipil le pilna a thupisak zo den le suahtakna(freedom) a thupi sak zoden zawzaw in gualzo suak ding hi. Zomi a kicite in zuau a gen leh zuau in a khap ong tawnkik ding a, Chin a kici mite in zuau a gen leh zong amau tung mah ah zuau in a khekhap ong tawn kik ding hi. Zuau in a khap ong tawn kik leh minsiat mindai na ong puak a, tua tawh kizui thuhoihlo pawlkhat  in ong behlap in gual lelhna le kamsiatna tawh ma nawt kulta hi. Zuau genna in minam khat khangto sak henhan tawh kibang sakthei hi ta mahleh kiamsuk kik pah hi. Tua ciangciang pen enhuai hetlo hi. Khankhat khom teng cih thadah tuabang gualzawhna a kum 10 in zong kailo thei hi.

Ahi zongin, leitungah zuau gen minam omlo a, i lungsim thuthu ahi hi. Tua lungsim a uk pen nang leh kei i hih manin, zuauthu teelzaw ding maw thumaan tawh kalsuan sawm zaw ding cih tuni na khensat ding nang le kei pansan ahi hi. Gentehna: thumaan lo, ataktak a hilo thu khat tawh mi atul athen in refugee siauh in USA le gam minthang tuamtuam i tun hangin innkuan khamkhop tek bek mah kingah in ki minthang hiaulo a, i gualzawhna tangtoi mahmah hi. A thumaan le a taktak thukhat tawh mipil mahmah khat refugee ong suak demdan mawk leh tua case bekbek in gambuk kikhelsak zo in, tua nu tua pa' minam pen thupi kisa ciat ahih manin minthangin gualzo paisuak hi. UNHCR khawng tawh USA i lut ngeingai hangin leitung uk UNO in ong theihpih hi dektak lo a a tul athen in i lut hangin ong thusim tuanlo hi. Huhna  akingah liamliam hi bek hi. Mipil, mi thumaan le mi citak khatbek ahih kei leh nih le thum tungtawn bekin UNO in na ongsem ding a, Kawlgam na ngawn ong kikhel henhan zopan ding hi zaw hi.

Chin maw Zo tawh kisai i lamtawp nading pen Zuauthu maw Thumaan thutak  ahih lamtak phawk ciat ni.

Professor Dr David Ngin Sian Pau

www.ciuac.org/MyCV.php

www.ciuac.org

 


Comments




Leave a Reply

    Tungzang News

    All