WWW.TUNGZANGNEWS.COM

 
Kumthak ah Vaithak

Kumthak ah bang vaithak, bang lametna thak na nei a?

 Lametna tawh a nungtalo nuntakna in nuntak man neilo hi. Lametna cih ciangin
i ngah dinga i deih i ngah mateng i hanciamna hi. I deih mahmah khat i neih
mateng i zon teiteina hi. Sum leh pai i hauhnopna lungsim pen i lametna hi a,
tua lametna tawh nuntakna pen nuam hi - nasep hong thanuamsak, hong thahatsak,
hong kuhkalsak hi. Ngah ding, neih ding upna nei kei leng nikhat nuntak zong
sawt kisa mahmah ding hi. 

Tua ahih leh tu kumthak ah bang lametna na nei a? Bang deih na hiam? Bang
ngah nuam na hiam? Sum tampi nei nuam maw, na siamna behlap nuam maw, na degree
behlap nuam maw, ahih kei leh na minam leh na gam adingin a tamzaw sem nuam maw? 
 
Tampi om ding hi. Mikim banglo ding hi. Pawlkhat adingin zi hoih mahmah deih
ngeungau kum zong hi thei hi. Pawlkhat adingin pasal hoih mahmah, a hau mahmah,
a pil mahmah neih nop kiukiau kum zong hi thei hi. Pawlkhat adingin kum tampi a
kizuihpihsa tawh 'gi bang khen nawnlo ding' a kigawm kum zong hi ding hi.
Pawlkhat adingin car hoihnono tungah tuan kum zong hi ding hi. Pawlkhat adingin
inn thak sungah nu leh pa tawh teen kipat kum hiding hi. I tunna sa pan a
sangzaw, a hoihzaw, a lianzaw, a thupizaw ah kahtohna, kilapsangna in khantohna
hi a, tua mah mihing khempeuh in a lamet uh ahi hi. 

Chinese New Year (CNY) hong tung ding hita a Chinese te in a innsung a van
lui khempeuh paikhia in van thak vive tawh laih uh hi (a neizo te'n). A hihzolo
zaw deuhte in zong puan thak khat, pheituam khat, khedap khat, zanpuan thak khat
cih bangin a thak vive tawh laih hamtang uh a, 'thaksuak' nuam keei uh hi. Zong
hanciam takpi uh a, zong hihzo mawk uh hi. A van lui paihte uh bang a mu masa
ding a kituh pawl om liang hi!

 Hun thak, kum thak, ni thak in mihing lungsim ah ngaihsutna thak leh lametna
thak hong guan hi. 

Vaithak i neihma in vai lui ciding ihiam, i zatsa, i neihsa, i zongsatsa
tampite i paih khit ding cihna hilo hi. A lui a hoih tampi om a, i kep ding ahi
hi. I minam hihna diakdiak pen a lui semsem leh kho semsem a, suangmanpha leh
diamond bangin manpha semsem hi. I mangngilh loh ding thu tampi om dinga,
pawlkhat en kik pak leng:

 1. Ngeina kem ding: Khanglui pek pan i zatsa sungh leh pu, tu leh ta in i
kimat, i kinaihna te nusialo in i kepcing ding ahi hi. Pu Zukholh, Nau Antawi,
Tanu sagawh, To sagawh, etc cihte i ngeina, Zomi i hihna hi a minam dangte in a
neih khitloh ahi hi. Hun thak, kumthak sungah vaithak tuamtuam kinei in tuate
kin manlo, tuate zang manlo, tuate phawk manlo leh a kisapna om nawnlo
phialphial bangin i phengleen hun om hi. Ahih theih laiteng i ngeina ahih manin
i kep ding thupi hi. 

2. Min phuahdan kep huai: I tenna leitung kidangin i tenpih mi leh sa
kidanga, i tuinak leh i loma hong kikhelkhel hi. I pau i ham mahmah zong hong
kidang hiaihiai a, zineih dan, pasal neih dan leh nau minphuah dan nangawn hong
kidang toto hi. Ahi zongin Zomi ihihna a lak den khat pen nau min phuah ciang
'mintap' i neih pen ahi hi. Mintap neihna in Zomi hihna identity khat hi a, tua
pen mangsaklo a i kep ding thupi kasa hi. I min bek i minam hihna ahih hun zong
hong tung kha thei lai ding hi!

 3. Pasal mah innkuan lutang hi: I tenna hong kidang in i khantohna a manlang
mahmah hangin i innkuan kivaipuakzia a kilaih pah henhan ding hoih kasa kei hi.
Zomi te in numeite suahtakna kinak piak lua mahmah in 'liangko kikim' cih pen a
zang lua mahmah nam ihi hi. Tua cih ciangin numei zong a khantoh theihna dingin
a ut banga sangkah theihna, nasep theihna, kizep theihna kipia a, mun tampi ah
amau ngaihsutna a 'full' a genkhiat theihna zong kipia hi. 

Zomi Angvan in hong gelh zel ka lungsim ah ka phawk hi. Tua banga suahtakna
akipiak ciangin numeite in amau bek thuthei, thunei, a thei akisak khak hun uh
ommah hi. Ahi zongin leitung kipatciil pan tuni dong numei thuneihzawkna innsung
peuhmah kuamah in paktalo hi cih pen hih lai ah i uanggen kullo hi. Kuaman
zahtaklo, kuaman thupimuhlo, kuaman thupisimlo, a khantoh ding zahin zong
khangto lo pah hi. I ngeina - pasal mah inn lutang hisak ni. Tuipi gal khawng i
tun ciang, parcel tawh hong kivaikhak lengleng manin i pasalte sangin a pilzaw,
a theizaw in kingaihsun pah kha kei ni. Pasalte sang kithuneisakzaw, kipilsalzaw
in innsungah vaihawm sawm pah kei ni. Inn umna bitlo a, zuak vang in hong umcih
hi cih mangngilh kei ni. 

4. Innkuan kizopna kemcing ni: Nu leh pa pen 'nu' 'pa' mah ciin a kisam
ngekngek te ihi a, ei sanga uzaw te 'u' mah a cite ihi hi. Tua pen i ngeina hi
a, i kamsiam hilo in i zuih 'ngeina' ahi hi. Nu dingte nu ci, pa dingte pa ci,
ni ding te ni ci, gang ding te gang ciin...tua bangin adang khempeuh ah zong
zahtakna kammal a zangte ihi hi. Nu leh pa khasiatsak ding, nu leh pa hehsak
ding cih peuhmah pen 'samsiatna' zah in a kingaihsun hi a, 'kamsiatna' kipatna
dingin a ki um liang ahi hi. Tua manin amau thu leh amau la mah kingai a, amau
cih mah kimang hi. U leh nau sanggamte kinawlkhin theilo a, kipai theilo hi. Tua
bang kizopna hoih i neihte i kepcing ding, i mansuahloh ding hoih kasa hi. 

Pi leh pu pawlkhat a tute a it mahmah hangin a mo in phallo cih bang om thei
hi. A mo in a teekte zahpih in simmawh in kihhuaisa, a tano kem ding nangawn in
deihlo, phallo cih khawng peuh om thei zanzan hi. Zomi te pen i pi i pu te in
hong kepna tawh a kikhangkhia tampi ki om a, tua manin Vaphual banga ki itna i
neih pen a tua hang hi. English te in 'bonding' ci uh a, kizopna, kipehna,
kikhihna i cih pen ITNA in hong khihna, kizopsakna bek mah a kho, akip ahi hi.
Tua pen Pu leh Tu kikepna, kikhoina khawng pan a kip mahmah bek ahi hi. Kikemlo,
kikhoilo, kizomlo hileng ki itna omlo hi. Vaphual in hong lengmang san tawh
kibang ding hi. 

5. Kizahtak minam hi hang: Ann kuang sawk masa ding innsungah pa pen hi a, pi
leh pu a damlai leh pi leh pu hipah hi. Adangte in kisawk masa ngeilo hi. A lim
a al khat om leh a hamzaw, a upa zaw te kipia masa kiciamsak masa a, a kicin kei
leh amau bek mah in a ne uh hizaw hi. A naupangte hun zong hong tung ding hi,
cihna bek hilo a, kizahtakna, kithupibawlna zia i neih ahi hi. Ak gawh ciang ak
gilpi khat bek om ahih manin innkuan sungah upa pen in ne pah hi. A lim pen cih
ahih loh hangin kizahtakna hi a, vang kipiakna, ngeina ahi hi. Khua sungah sa a
kigawh ciang sanam (sasin salung sakal a lei, etc) te khil khawm in khuasunga
pitek putek teng akikholh kawikawi ahi hi. Khuado Sakholh tawh kibanglo hi. Kam
kituhna khatpeuh ah zong uzaw te kammal kithupisim a, uzaw kam zong na pilzaw
hamtang hi. Tua pen Zomi te ngeina leh kimakaihzia, institution khat na hi gige
hi. 

Kumpi ulian khat na hih man, mipi  makai khat na hih man, sum leh pai
themkhat na neihzawk man, mite mai ah maipha na ngah zawk man bek khawngin
Zongeina te na palsat kha het kei in. Kumthak le mailam ah zong Zomi ngeina
kizahtakna hoihte kemcing den ni.




Hawmsiam nungta nebum si. 
Lian Do Thang Ho in zong taangtang phelhawm. 
Lamphung leh pute kineh zolo. 
Pianna tuun leh zua i leitung pasian hi. 

A dang tampi - pawi leh ni thupite kitang. Nopni dahni in ki uap. Pasal
gamvak kinusia ngeilo. Mi cinlohna (mipoi) kikawk ngeilo. Kiphatsakna leh
kisialhna a zang nuamlo minam. Ei leh ei kiphat ngeilo, mite in hong phatzaw
ding, hong pahtawi, hong pakta zaw ding cih a zui minam. Thusia lasia peuhmah
Zubel tawh a kimaisak.... cih bangin tampi omlai. Gen khin manlo ding ihih manin
i mailam ding tawm behlap ni.  


I MABAN: Kumthak sungah i kalsuanna ding tawm behlap ni. 


1. Mailam ding khual in pilna siamna zong ni: I tenna leitung pen pilna
siamna kikhek zangzang ahih manin hunlap in pilna sin kul hi. Pilna siamna hoih
pen gam khangtote a mah madawk zawden ahih manin ihih theih leh gam khangto
pilna bangtan hiam cih theihsawm in kalsuanpih ding i hanciam hun hita hi.
Hithei hileh eima tenna gam bek hilo, gamdang bangah degree khat beek va behlap
zo leng a sia hetlo ding ahi hi. Gam khangto penpente ah zong na khempeuh kicing
tuanlo a, tuhun MNCs hun ah gam tuamtuam ah sinna theihna (experience) a neite
kideih semsem hi. Tua manin exposure a tam thei pen i neihzawhna ding hanciam
hun hita hi. 

2. Inn lam tawh kizom ding: Gamdang tung ki om kiukiuta a, diaspora Zomi ki
behlap zel hi. Tua banga gamdang tung pen Zomi te amasa na hinawnlo a, minam
tampi tua banga amau pianna gam nusia na om zo uh hi. Zomi te khang zong hong
tungta hi. Ahih leh inn lam tawh kizomlo, innkuanpihte tawh kithuzalo cih bang i
om ding hoihlo a, ahi thei ahih leh kithuza, kiho, omdan kihilh, neihzawh leh
sum leh pai khak in silh leh teen khak ding. Tuhun globalization hun ah a
kibuaipih leh pitek putek te haksa asak uh bel a tu a tate in zinsan, lengsan,
kizopna om nawnlo, si maw hing maw cih zong theilo a omna hi. Zomi te bel kizom
in thu kiza in kiphawk ding hihang. 

3. Inn ciah zel ding: Kumsim ahih zawh kei leh zong kum nih in khatvei, kum
thum in khatvei cih bang inn lam ah ciah a innkuanpihte tawh kimuh, kikholh ding
ahi hi. Inn leh khua nusiat ni pan 'The betkhiat' a kigen banga a thu a la zak
om nawnlo, si maw hing maw cih zak om nawnlo, melmuh cih peuhmah om nawnlo cih
pen globalization huih dik masate lak ah na om lua tham hi. Tu in zong India gam
ah tua bang lunghihmawhna lian semsem hi. A tate uh nasem, pilna sinin gamdang
pai, ciah nawnlo, lah kithuza nawnlo, a nu teek, apa teek pen amau bek inn ah
kinusia in lungleng mahmah, khuangai mahmah in om kici hi. Pawlkhat bang in sum
nangawn khak nawnlo in om kici hi. Sum leh pai ah i hih zawh kei leh zong thu
leh la bel kiza hamtang hoih hi. 

4. Mihing om leh sum om: Sum leh pai sangin mihing mah thupizaw hi cih
mangngilh kei ni. Na sum leh paite mite tawh kizopna, mite tawh kikholhna,
mihing lungnopna dingin a kizat kei leh a manphatna tawm mahmah hi. Nang deih
khat peuh leina bek tawh a bei den leh a value niam mahmah hi. Mite lungdamna
dingin a kizat leh manpha a, mite dahna dingin a kizat leh man neilo hi. Tua cih
ciang sum tampi na neih a motor car na lei ziaua nang bek a suk a to ah na
taitai zongin a nuamsa, a lungdam nang bek na hih manin a kamsia na hi hi. Na
innkuanpih, na lawm na gual, na meltheih mipihte in hong noptuampihlo hi. Sum
tampi nei in puan thak vive lei in na it na ngaih khat adingin bangmah leisak
ngeilo, na sum muh teng nang bek in zangkhin cih bang ahih den leh a meetna tawm
mahmah hi. Kua mah in hong eng khollo ding hi. Angsung theihna sangin mite tawh
kipawlkhawma nuntakna manpha zaw a, namtui zaw in thupha saan huaizaw hi. Sum
pen thupi lua lo a, mihing thupi masa zaw hi. 

5. Van leh lei a bawlpa mah mangngilh ngei kei ni: Bangbang i gen zongin ei
pen a mawk pian ihi kei a, van leh lei a bawlpa in a bawl khempeuh lak pan a pil
pen in hong bawl ahi hi. A bawlsa na dang khempeuh zong akem ding eite ihi a, i
kep siam ding zong hong deih in pilna hong guan lai hi. I kep siam leh siamloh
thaman hong kipia lai ding ahi hi. Tua ahih manin ei hong piangsakpa phawk in
Ama deihna bangin gamta in, Ama hong sawlna bangin mite tungah itna lakkhia in,
Ama bawlsa nate siamtak, manphatak, hoihtak in zangin zeek ni. Amah zong
mangngilh kei ni. "Eite hong bawlpa Amah hi a, Ama gan khahna huangsungah a
tuute i hi hi." 

Topa deihna bangin gamta in Amah mangngilh ngei kei ni. Topa in tukum Kumthak
nang leh na innkuanpihte adingin 'kumpha' hong suaksakta hen. 


 
Lungdam. 


Hau Za Cin
Phuitong Liim
 www.hauzacin.blogspot.com
 


Comments




Leave a Reply

    Tungzang News

    All