WWW.TUNGZANGNEWS.COM

 
Mi khempeuh eima mailam ciat khual in i manlah den  hi. I tunna ciangciangah i mailam i nawtciat hi. Pawlkhat amah leh amah kimakaihtawm in a mailam nawt a, pawlkhat amah leh amah kimakaih theilo ahih  manin dinkhawl a, pawlkhat amah leh amah kimakaih kikhual theih ahih lam zong phawklo in tucip hi. Na nuntakna ah na lawhcin theihna dingin nang leh nang na kikhual a, na kimakaih tawm a kul hun tampi om hi. Na tunna ding ciang na muhkholh kul a, na tun theihna ciang na theih kisam a, nang tun theihloh ding ciang zong na theih kul hi. Nang leh nang kimuanna na neih phot peuhmah leh tuate a tangtunna dingin a kalsuan khin na hi gige hi.

I tun theihna sangpen i tunna dingin pawlkhat nawhpai mahmah a, pawlkhat khe vik kawm in pai a, pawlkhat in a khe leizul kaih hi. Phawk ding thu pawlkhat gento ni.

1. Muhkholhna, Ngimna nei in. Tupna, ngimna, tun sawmna ciangtansa khat nei masa hamtang in. Na  ngimna mu ciciai sa in kalsuan in. Na lungsim ah, na khuak sungah na muh ciciai  khit nak leh tua lam zuana kalsuan ding bek kisamta hi. Na muhkholhna in hong  makaih dinga, na ngimna in hong lamzangsak ding hi. Muhkholhna a neilote khuamial sung lampai bang h a,suangtang khat sikkha in singbul khat palkha leh  luvai in kipuk hi. Tua ahih manin sikkhak, palkhak a omlohna dingin thu nam thum  phawk in.

(1). Nang leh nang dotna kidong in: Bangcih leng hua ka mitkha tawh ka muhna mun tung thei ding ka hiam? Ka muhkholhna mun tung leng bangci sep ding ka hiam? Ka tupna tan tung leng ka lung a kim ding hiam?
(2). Siksan to khol in: Na siksan tawhsa pen a sangna lam hong tungsak ding siksan hi hen. Nibangzah sung kitung thei? Sum bangzah bei ding? Mite muhna ah zong ahithei takpi  ding ahi hiam? Hanciam takpi leng ka tup ka tung thei diam? Kei pilna leh theihna in a ban takpi mah hiam?
(3). Na sunmang in tua lampi pai deudeu in. Na tutkhawl, na ommuang, na lup hithiat ciang zong tua na gelna leh siksan tohsa lampi zuiin lam pai deudeu in. Na lungsim ah na tungtung phot in.

2. Nang siamna, theihna mi neihloh ahi hiam kidong in. Mi na muan mahmahte kiangah ka uk lam, ka  lunglut lam hih bang hi in hihbang hihthei ing, siam ing ciin gen inla, na tupna  zong gen in. Tua na gen kawm in 'ka tupna pen ka mihing hihtheihna teng tawh a  piang thei takpi ding hiam' ciin na muanpa kiangah dongin. Hoih nasak, hoihlo  nasak, nasep ut mahmahte nanglo midangin a sep theihloh hi-in na theihte in nang  tunna ding tutphah sang ngahna hong hiding hi.

Thu thum phawk kik in:
(1). Lunglut mahmah takpi in: Na lunglut mahmah takpi pen mah lunglut takin sem ngiatngiat lel in.
(2). Septaak ahi  cih lakkhia in: Na lunglut mahmah pen mite muhna ah a thupilo, a cihtaklo abat  hangin nang lunglut in hih ut na hih manin hihtak, septaak takpi hi cih lakkhia  in; lungkia lo in sem suak in.
(3). Genhak kei in: Mi tawh na lunglut mahmah khat na hih ciang midang a lunglutlote hawmthawh kha ken la, lungduai leh theihsiamna tawh seppih in; phun, kamtam, hang cih bang  hikha ken. Na seppihte tawh genhak in om ken.

3. Mi tawh kikhawl siam in. Mi tawh kikholhsiam pen tu hun leitungah a thupi penpen hong suakta hi. Information technology leh khualzinna a nop mahmah khit leitungbup mom khau bangin kikan bilbial ta ahih manin kizopna, kilawmtatna, kikholhna siam  ding hong thupi semsem hi. Nek leh tak zonna ah, nasep zonna ah zong kizopna  hong thupi mahmahta hi. Mite in nang siamna leh theihna a hoih dan, a kizat  theih ding dan a theihtelna dingin na kizop mite mi gina leh mi muantak ahih  kisam hi. Tua ahih manin nang hong pakta thei ding mite peuhmah kiangah na siamna leh na theihna ciil hetlo in lakkhia in. Na theihna leh siamna te sum piakloh in zong mi adingin piakhia masa ngam in, mite huh masa ngam in; tua hileh mite in nang hong thei dinga, hong deih ding uh hi. Mite hong hopih theihna dingin nang bek tuam tat, tuam omlo in mite tawh kikhawl, kiholim, kithuza in.

4. Nang leh nang  kisintawm in. Nasepna zonna leitungbup hita ahih manin gam khat, khua khat, kiu  khat nasep zon hun bang nawnlo a, a tam thei pen ei leh ei kisin ding a thupi  hun hita hi. Tua bang na kisin theihna hun pha a om leh kidek hetlo in kisin  tangtang in. Kisik hetlo ding hiteh. Nasem khinsa na hih leh zong na sepna mun  ah na siamna kibehlapsak in. Na hihtheih khan in. A kisin nuam peuhmah mainawt  a, tuhun leitung thu leh la 'khuttung lumleh bang' ahihna phual ah amah leh amah  a kisintawm den, a theihna a siamna a khangsak den mi in a nasepna khahsuah  ngeilo hi. Theihsa siamsa zingah thai ah hong lui pah taleh a
kisin khol mi in  na kigingkhol khin ahih manin 'hun lap' hi. Tuhun nasepzia leh mailam ah  nasepzia kikhel ding mu khol in. Nang leh nang na kisin theih kei leh zong kisin  theihna ding mun zongin kan in. Nget tanghial a kul leh zong siamna theihna  khanna ding ngen in kisin ngap in.

5. Hong tawsawn ding mi nei in. Siamna theihna pilna a behlapsak thei mite tawh kinai in kikhawl  in. Hong hilh thei dingte naih in zui in. Tha hong pia nuam leh hong deihsakte  it in amau thapiakna leh tawsawnna thupisak  mahmah in, tuate in na kahlei  tungah siksan nuam hong guan ding uh hi. Hong kaipuk nuam leh hong thalkaih den,  hong nungkaih dente tawh kipelh inla, hong sawnpai nuamte tawh kipelh zaw in.  Hong sawnpai theite tawh hun tampi na beisak dingin na hun hoih pammaihlua hi.  Tua ahih manin nang hong pattah theite kipattahsak in. Mi madawk, mi thuthei leh  nasep siam i cihte in sum leh pai tampi bei in a thei asiamte na kipattahsak uh  hi. Lam hong lak theite zong thudong in. Amau na mukhol khin, na thei khol khin  uh ahih manin tua lampi zuih dan hong lak thei ding uh hi. Nang hong kikhelsak  theite zong na pelh kei in. Na gamtatzia, na nasepzia, na pilna siamna zonzia a  hoihzaw hong khel theite na lamnaih mahmah in.

Kikhual, kisinkhol, kigingkhol cih pen tuhun leitungbup kalsuanna, nuntakna leh nasepna phual ah a thupi mahmah ahi hi. Hun na lap kei leh mi nung na delh ding hi. Na tup, na ngim, na hanciamna na tun theihna dingin na gelkholh, na muhkholh, na kisinkholh takpi mah a kisam hi cih mangngilh kei in.

(Tuhun leitung khantohna tawh kituak a nasep zonna leh pilna siamna zonna ah mi i phakna ding deihna leh lunggulhna tawh kong gelh hi).


Hau Za Cin
PhuitongLiim
 


Comments




Leave a Reply

    Tungzang News

    All