WWW.TUNGZANGNEWS.COM

 
Picture
Tuni Zomi Madawkte Pahtawina" Poster Kibawl
Dear Kongit Zomi Akuamapeuh,

Tunung kumbeima diakin “Tuni Zomi Madawkte Pahtawina” cih Poster & calendar kithuah khat kong bawl hi. Hih pen Kawlgam sungah hawm na'ng teng a kihawm khin zo a ki-kaikhawm ta ahi hi. Hih thu tawh kisai lungdampihna leh thapiakna a munmun pan ka zak manin ka lungdam hi. Thukhatah ka suahsak dan a telcian lo zong om thei kha ding cih lametna tawh Zomigroups a tuamtuamte-ah tu-in kong tangko khia hi.

Ka bawlna thu ahih leh a khatna-ah i siapite ka pahtawinopnatakpi ahi hi. Tuabanah lai nasepna-ah sum tawmtawm bang hong nuamtuam leh cih lunggulhna zong hi veve hi, a mantakin. Hihbang a maan ka tuansakte leh a nuai a lai kigelhte limtak a encianten genbanna om sa lo dingin ka lamen hi. Ih pahtawinop pen tampi om lai hi. Eima mun ciatah citaktak a mapang tampi om hang, a lawhcing zong tampi tak om hang; tuate' hangin zong lungdamin i angtanpih mahmah hi, cih i gennuam masa hi.

KUABANG TENG KIHEL A, BANGHANG HI DING HIAM???

Maan/Photo 21 kihel hi. Tuateng a bangbanin na en le uh teh Tulaitak hong dampih lai Zomi biakna lian zawdiakte' sungpan, a pawlpi zui a kihel ciat ahi hi. Gtna: Dr.Enno (Baptist), Dr.Bishop Felix Khen (Catholic), Dr.Do Kham (A.G), Dr.Do Suan Mung (EBC, Sia Mung in minneu a neih loh pen a minpi mah a lawh guapguap hong suak in, kisuang sim ing ei),  Dr.Khualno (AMCM), Dr.JM Paupu (India Zomi), Dr.Mungtawng (FGA), Dr.Cin Za Lian (UPC), Dr.Lamh (Siyin Baptist), Dr.Mang Do Thang (Zo Baptist), cihbang teng ahi hi. 

Dr.Zambawi (Natioanal Director, OM), Dr.Do Sian (Zomi Theological lamah madawkpen pawl leh ZTC suan leh muanpi ahih banah tulaitak Zogam Eden Drive cihte pawl mapanna), Dr.Chin Khua Khai (Secular backgroud B.Sc panin LST ah Ph.D (pentecostal lampanin zong ki-etkaak), Revd Smith NZThawng (MCC ah GS semngei, eimi sung om nai lo banah tulaitak ACC a cihna-ah zong Advisor hilai), Revd Kam Khaw Thang (Tedim Bible Translator & tulaitak Ordained Pastor damlaite' sungah a uham pen), Revd Khoi Lam Thang (GS, Bible Society of Myanmar), Revd Jacob KKMung (Christian Literature Centre, Ygn hi a, Private Tapidaw Laibusaal gol mahmah hong neihna hangin angtanhuai kasa lua hi), Dr.Dal Khan Mang (SDA min tawh), Revd Job Thawngno (Dam lo a Pasian' nasem hizah lakah Literature Ministry leh Handicapped Uplift Ministry thuah lai, laibu tambawl pen, a nasepna thupi lua), Dr.Tuanno (Secular lampan hi a, Zomi sung gen loh Kawlgam kumpite nangawn in hong limzat sak i angtanpih mahmah Siapipa ahi hi).

Tuabanah Laidal nuainung lamah pen, Zomite in cikmah a i neih ngei nai loh, i lunggulhgulh hangin i neih zawhpak nawn loh ahi, "Zomi Festival of Praise" (ZOFOP) Hallelujah Pawipi pen 2005 kumin Tedim khuapi-ah Revd David Suum' hanciamna tawh hongpiangkhia ahih manin tuatakah uniform silha lasa mipi 4000 te' maan leh ama maan ka tuangsak hi. Tua manin mi 21 kihel ahi hi. Abanah suaksak zo lai hi leng i siapi huate pawl zong hel nuam tak hi ing. Tuate mai a ka laibu bawlna-ah kong suaksak ding hi.

Laibubawl/ahawmkhia cihna-ah thu tampi kangaihsun a, Zomi level nasepna ah hih tawh 3 vei ka bawlna ahih manin mindeih man hong kisak ding ut lo zaw ka hihna leh mailam lai nasep ding lunggulhna tawh ka sunmang khat ahi, "Zomi Literature & C Media" ka ci hi. Mi min kidawk lo ahih manin hong deihsak diak pawlkhatte in kisuan huai het lo hi ven; mi'n zong hoihsatekin kuate bawl hiam, cih khawng kidotna om simsim tuak hi. Tu-in internet tungtawn leh Zomite Thukizakna a i neih lianpen ahi, Tongsan Weekly News”  ah kong tangko khia hi.

(Hih pen keima’ muhdan, keima’ criteria linlian ahi hi, cih zong kong theisak nuam hi).

HIH POSTER PEN GAMDANG AH KIKHAKSAK KHIN ZO HI.

Tuma khakhat lai a kipan a kikhaksak hi a, a tuntunna tamzaw ta hi. Zomi kipawlna omna khempeuh Germany cih loh ah kikhaksak hi. Germany pen tavuan hong laksak ding kician contact nei thei vat lo suak ka hih man hi. Amau zong hong kinsak mah ding hi ven, nungkum a te zong limtakin tavuan hong laksak ngei khin uh a, ka lungdam mahmah hi. Tukum gamdang vankhak man nakkhan lua ahih manin nong ngaihsutpih dinguh zong ki-lunggulh mahmah diak hi.

Pawlkhat in Calendar cici-in zong cihtheih thukhat mah ahi hi. Lai dalnih kiphasak a, a dal nunung pen ah niciamtehna hi bekin amasa ah maan/photo, poster-suan det theih ding, kum a bek zongin a tul lo ding i Siapi te pahtawina ahi hi. A calendar leuleu pen ei gam khuata lam khawngah nih leh thum a leizolote'n noptuam sa veve cihna tawh a kithuah khawm bek hi-in, ka bawldan pen Poster hong kicihsak zaw leh zong ka ut hi. Tumanin gamdang hong tunhak hangin a hun bei lo dingin nong tuatsak zawkna ding uh leh ka bawlna thu leh ka ngimna thu hong theihpih a tha nong piaksak ciat ding uh zong a kicial nuam kawm i hi hi. Tua dingin kong muang hi.

PAHTAWINA POSTER PEN  YANGON PANIN, REV.DR.PAU KHAN EN (Dr.Enno)' APNA & THUPHA PIAKNA TAWH HONG KIHAWM KHIA AHI HI. NA INNSUNG VUAH NA SUAKSAK UN; SIAMPI THUPHA IN HONG SULZUIH DING AHI HI.

 

Peter Khampu.

Kalaymyo.

"...Na hoih sep ding cimtak kei ni..." (Gal. 6:9).


 


Comments




Leave a Reply

    Tungzang News

    All