WWW.TUNGZANGNEWS.COM

 
Picture
Dr. Gin Khan Khual tawh Holimna
CSD:  A kipat na pan a pan to hi pah leng, Global Zomi Alliance (GZA) hong piang khiat theih nang, kua teng in thu le la hong phuang khia masa hi ding in na ngaihsun? 
GKK:  Mimal in gen le hang bel USA a om Pu King Mang leh Singapore a om Pu Hang Khan Lian ten hong phuang khia masa cih ding in ngaihsun ing. Ki pawl na min tawh bel LZI (Dr. Cin Do Kham leh Pa Go Sawm Khup)leh Zomi Association of USA te in hong phuang khia masa ding in ngaihsun ing. Officially in bel Tedim CCJ central committee te in Jubilee hun sung in meeting neih ding vai sapna lai hong hawm khia uhhi.

CSD: Tua bang hi leh Tedim CCJ lai in meeting na neih na uh ah, mibang zah bang hong ki hel thei hiam? CCJ central committee te in kua teng hong sam uh hiam? 
GKK: Meeting a kah mi 60 val kim pha ung. Meeting pen CCJ secretary Rev. Thang Go Khup leh LZI pan Dr. Cin Do Kham te in chairman hong sem in hong makaih uh. Meeting cih hang in bang mah agenda cih dan zong a om masa hi tuan lo in, a ki mu khawm tak pi mah ka hi uhhi. Meeting sung ah mimal in pawl khat in a mau vei na leh deihna te hong gen khia ciat uhhi. Bishop Felix Lian Khen Thang in Unity leh Ecology cih bang, India lam pan hong pai Rev. Suan Khan Thang leh Rev. En Za Sian  in zong a mau hoih sak tek hong gen khia ciat uh a, agenda tua bang hi, cih om tuan lo hi.

CSD:  Meeting sung ah agenda zong om nai lo ci leng, a koi ci bang in hih Zomi makai te ki tel khiat theih ding thu hong piang/om thei a hi hiam? 
GKK:  Cih tak mah in, ko meeting sung a teng in, ka om khop uh nuam ka sa mahmah uh a, hi bang dan in ki muh zelzel theih ding lunggulh na mimal kim in ki nei ciat hi. Tua bang teng tawh mai lam ah hi bang dan in ki muh khop theih nang vai ong hawm ding  leh ong ma kaih ding tang zang ki guan leng cih teng tawh ko tu a ma kai teng ong ki tel khia suak hi.   Ki tel dan zong Zomi biakna sung pan mipi te theih zawk deuh ding makaipi teng ki tel khia hi a, tua zah lian tel ni, kua teng tel ni cih zong a thu om pah hi tuan lo hi. Zomi sung ah biakna makai i muan i suan zawk deuh anuai a miteng kitelkhia hi.

Rev. Dr. Simon Pau Khan En (President) 
Rev. Dr. Do Suan Mung (Assistant Secretary) 
Rev. Dr. Cin Do Kham (General Secretary) 
Bishop Felix Lian Khen Thang (Vice President) 
Rev. Dr. Gin Khan Khual (Member) hi teng hi.

CSD:  Tua leh bang hang in India a om i mi pih Zomi te lak pan makai ding kitel lo mawk a hi hiam? 
GKK:  India lam a te zong makai lak a hel ding ki gen mah na pi in, a mau lam pan no Kawlgam lam pan a teng hong lem phot phot un, no cih bang bang ong zui ding hi ung a cih uh tak ciang in kawl gam a teng tawh ki pat phot phot ding in ki ngaih sun cih ding hi.

CSD:  Hih makai teng pen biakna pawlpi zui in a ki tel dan cih ding ai ve maw? RC, Tuiphum, AG, EBC cih bang dan in? 
GKK:  Ma kai teng pen pawl pi zui in a ki tel hi lo zaw in biak na ma kai teng lak ah a ma dawk teng leh a ki zah tak teng a ban ban in min hong ki lo suk hi zaw hi. Hong ki tel lai in pawl pi lu tang teng ka hih na uh tung tawn in  hong ki tel hi lo zaw hi.

CSD:  Hong ki tel khia makai 5 teng pen CCJ sung a biakna makai 60 bang in hong tel a hih leh minam ma kai cih sang in biak na ki pawl na te i makai hi zaw leh hoih zaw lo ding hiam? 
GKK: Hong tel khia te pen biak na pawl  sung pan makai te hi mah in biakna vai meeting sungpan zong hi mah hi. Ko hong kitel teng lah biak na ma kai teng vive ka hi sawn sawn lai uhhi.   Ahi zong in Chritian up na tawh ki tuak  in biak na nei ta leh nei ta kei leh mi khem peuh it ding cih na tawh ki tuak in ko makai te in zong biak na ma kai ka hih uh hang in biak na min zui lo zaw in Zomi bup a huam ding min phuah ding ka tel zaw uh hi. Laipian, Lawki, thu-um mi, thu um lo mi, kua mah dei dan lo in Global Zomi Allaince ci in a min mahmah zong a ki phuak ngiat hi.

ZLK:  Makai ding cin ong kitel ciangin ong tel teng pen Zomi bup tang mi hi uh hi cih om lian lo a hih teh no lam pan mipi tel mah hi hang a hih kei leh mi pi te ma kai mah hi hang ci in na kingaihsun uh hiam? 
GKK:  Mipi kim in hong tel a hih loh hang, hong tel teng leh hong kitel makai tengin, minam bup a ding in ka ki ngaihsun zaw uh hi. Mipi te in ma kai ki lung gulh mah mah a, meeting sung a om mimal ciat in zong makai ki lunggulh ciat hi. Mi pi te lung gulh na leh deih na tawh a ki tel khia hi zaw hi ci in kei bang in ka ngaih sun zaw hi. Tua hih teh, mipi te  in zong a vekpi un hong sang khin zo kei phial ding zong in a tam zaw in hong sang zo ding in ka lam en hi. 

ZLK:  Minam makai ding hi le uh cin, biakna makai na hih na uh tawh politics lam ah sem thei lo ding ci le hang, a koi ci bang dan in minam pih te a ding in nasep sawm na hi uh hiam? Kawlgam election khawng ah lut sawm tak pi phial na hi uh hiam? 
GKK:  Hi tawh kisai in, Dr. Enno in biakna makai hih na tawh kizui in, minam makai te leh minam a ding nasem te a ding in prophetic role la ni ci in hong gen hi. Kamsang din mun cih na hi. Hih din mun tawh kizui in gam  leh minam ading nasem tuamtuam te a dik loh na leh Pasian thu tawh a ki tuak loh nate uh a tai ngam, a hilh ngam ding cih na hi. Minam makai tuamtuam(political leaders)te ki hel lo hong ci te zong khialsa keng a hi zong, ko ngaihsut na ah prophetic role hi zaw hi. Amau a sem ding, ko a tawsawn ding leh a lamlak ding hi zaw ung. Election candidate a hi nuam te, kipawl na pan khawl ding in a mahmah leh in sem ding. Political party support tuam zong nei lo, a hoih a hih leh support ding, a hoih lo te Pasian deihna tawh ki tuak in a tai ngam ding cih na dan hi zaw hi.

ZLK:  No tawsawn ding na cih uh hang, mipi te lam pan no teng mah sep ding hong deih zaw, no pilna, siamna  leh experience te  in mipi  te a ding in phat tuam na tam pia zaw lo ding maw? No mau mahmah ong ding khia in ah ong sem zaw le uh cin, minam ading a sem dang te zong tha na piak kawm uh in ah.  
GKK:  Khutzep in en ding a hih kei leh mi dang te sep sa gal sai ding bek cih na hi kei.  Prophetic role bek la nung a ci zong hi pah sam kei ung. A pil asiam te a pilna leh  asiam nate hoih tak in a zat theih nang , channel khat a hong sak hi zaw ung, ko hih theih bang in a sem nuam hi ung. Ko lam pan in zong sepding geel ding  tampi nei khin ung. Nung April kha sung Singapore ah meeting lai in gam leh minam a ding nasep ding tampi ka gel khin uhhi. 
Ko sep ding ah, mai lam geelna nih nei ung, 
1. Zomi te ki pumkhat nang leh minam picing khat bang in din zawh nang  
2. Zomi leh Zogam a bu cing in khan toh nang, cih bang dan hi. 

ZLK:  Tu lian in sep pah ding dan na gel uh a om hiam?  
GKK:  Sep theih pah ding a ka ngaih sut uh bel ih gam sung ah za kang a ki cing te ki pawl na min tawh khua kim ah vak kawi kawi in a hoih loh na gen ding leh kum pi mah mah tawh zong ki pawl khawm in mi pi lak ah awareness a om theih nang sep ding ngaih sut na om.

CSD:  Na pawl kilam zia uh, gam khat kilam zia tawh kibang hi lo a hia? 
GKK:  Tua dan pian tawh kibang phial sa mah ung.

ZLK:  Makai teng  in tun committee tuam tuam hong bawl khia ci leng. Zomi sung ah min nei sa leh mipi theih sa a hi, Zomus, Zolus  leh ZRO cih bang dan ki pawl tawh ki gawm khawm thei lo ding maw, a hih kei leh tua te tawh ki pawl khawm in na sem khawm thei lo ding maw? Committee thak ki sam tuam  lai mah ding a hi hiam?  
GKK:  A om sa kipawl na  te phiat ding hi lo, a picing sak zaw ding a sawm hi zaw ung. A mau sung pan a pil asiam te zong ko sung mah ah hong kihel thei ding hi. Kipawl na min tawh hong ki hel thei lo ding a, hong san zawh uh leh mimal  in hong kihel thei ding hi. Mimal te in hong san theih uh ciang, committee convener te a sawt lo in hong ki zasak ding hi. Tua convener sung pan in zong na lam et loh pawl khat hong ki hel thei ding hi. Ki pawl na om khin sa te in a mau sep tek hong sem to suak ding uhhi.

ZLK: Mi hing ngei na ahi ki muan na te a hi lo a zat na, ai tuam phat tuam na ding sep na leh ngaih sut na lang val lua te neih na te no ma kai te sung ah a om loh na ding in kua in no ma kai te ong en cik in ong khalh bawl ding uh hiam? Biak na makai na hih na uh tawh up na in ong ma kaih ding cih a hih tei hang in biak na mah in mi tam pi tak pai khial sak thei in Religious Extremist zong ong om thei zel a hih man hi. Political pau leng, check and balance  (of power) a om theih nang, constitution sung ah koi ci geel sawm na hi uh hiam? 
GKK: Hih pen a om loh a pha mawh leh a ki sam thu hi. A hi zong in hih tawh kisai in kikup na om nai lo a hih man in makai te tang in hong dawng thei keng.

ZLK:  Constitution nei nai lo. No tulai tak makai (5) teng in kum (5) sung hong sem photphot ding. Tua hi leh, no  term man ciang makai thak ding te koi ci kitel ding ngaihsut na om khin in teh maw? No teng in no ong laih ding te Hand pick in tel ding maw? 
GKK:  Ko bel kum 5 sem ding, ko nung a ding te pen constitution hong om ciang kiteel dan ding ki thei pan ding hi. Kei makai dang teng in Constitution at ding in tavuan ong piak sawn na uh tawh ki tuak in ka hih theih zah in, study  in a hoih  thei pen ding in bawlsawm ing.

ZLK:  Nang mah mah in constitution at ding ci le hang, ki teel kik ciang a ding in, delegates koi ci lak sawm na hi hiam? Pawlpi zui in pai ding maw, khua leh tui zui in pai sak ding maw? Ngaih sut na om khin in teh maw? 
GKK:  Kua teng in hong tel ding, kua teng in hong criticise ding, kua teng delegates hi ding cih om hi nai lo hi. Constitution at ciang in tua te zong nasia tak in ngaih sut ding kisam ding hi.

CSD: Constitution cik ciang bang man sawm? 
GKK:  December kha mabang in zo man leng  ut  ing.  Kawlpi ah  Leadership Conference 6-11 December, 2011  sung in om ding hi. Tua sung ah kipawl na tuamtuam pan  delegates  150 ki sam ding hi. Tua ki muh khop  na ah pulak khia nuam ing.

ZLK:  Nam dang, gam dang te tawh ki pawl khawm in na sep ding na gel uh na? A sem khawm ding bang hi leng hih GZA mahmah zong  kum pi maw, a hih kei leh kipawl na lian khat i  recognition ki sam ding hi. Gen teh na in gam dang kumpi khat maw, a hih kei leh UNO maw, cih bang in hong support leh Iegally in i tha hat thei zaw tam? Tua dan na han ciam sawm uh hiam?  
GKK:  Recognition bel ahih theih zah in ki zon sawm. A hi zong kidawm tak in gamtat ding  in geel ung. Zomi sung ah kipawl na  te kiang pan bel recognition lak kik ding sawm kei zaw ung. A sem khawm ding ii hih teh, khat leh khat a kipawl khawm dan in ngaihsun khin zaw ung.

CSD:  Kumpi tawh asem khawm nuam i hih leh  (i.e zakang vai), kumpi hong theihpihna (recognition) zong kisam ding ahih teh, bangci gelna hi uh hiam? 
GKK:  Ngaihsutna leh kikupna nei nai kei ung.

ZLK:  GZA in kua teng huam ding in na gel uh? Tedim kam pau Zomi te bek maw, Zogam khang lam a om Zomi teng a hi, Chin a kici te zong huam khawm ding maw? 
GKK:  Zomi a kicing teng a huam ding hi. A mau hong zuih nop leh amau khensat na tungtawn hi zaw ding in um ing.

ZLK:  A zenzen in Zogam khang lam te bang in, ko GZA tawh ki pawl nuam ung hong ci leh, i Zolai te, leh i sep sawm project te laih kik ding in om pah ding ai ve maw? 
GKK:  Tua tawh kisai in a mau hong lut sawm taktak leh a hunhun in, kikup toh ding in ngaihsut zaw ing. Singapore kimuh khop na ah, tua dan kikupna nei nai lo ka hih man un, kipawl na min tawh hong gen thei keng.

D&K:  Dr. Khual hi bang in na hun man pha tampi tak nong piak theih lungdsm mahmah ung.  
GKK:  Kei zong lungdam ing.



(By Tg. Cin Sian Dal and Tg. Zam Lian Khup: Oxford, United Kingdom, June 01, 2011)


 


Comments




Leave a Reply

    Categories

    All
    Dr. Leo Mang Cin Hau
    Interview

    Archives

    January 2015
    September 2014
    August 2014
    August 2012
    July 2012
    June 2012
    May 2012
    February 2012
    January 2012