WWW.TUNGZANGNEWS.COM

 
Picture
INTERVIEW | DR KAMKHENTHANG
  
Pu Dr. Kamkhenthang, India Zomite laka Doctorate degree ngah masa pen ahihkei leh leng a masa pawl, Paite MIL leh PLS a khuampi poimoh khat leh laigelh, laibu bawl lam a i nam sunga mi suan huai mahmah tutung in ZOL in i houlimpih thei a, manpha i sa hi. Amah Pu Thang in i gintak sangin i houlimna hon ngaih poimohsak a kipahhuai isa sawnsawn hi.
Tu in i houlimna kuapeuh in a simtheih dingin i koihkhia hi.
ZOL: ZogamOnline KKT: KamKhenthang
ZOL: Chibai Pu Thang! Houlimna ding hunlem na hon bawlsak man ka lungdam uhi. ZogamOnline website na veh ngei diam ah, internet tungtawna khovel mun tuamtuama om Zomi te kithuah leh kizopna ding ka bawl uh ahi a...
KKT: Chibai!Nong houlimpih man un kei leng ka kipak mahmah hi.
ZOL: Pan pah mai le, na neulai, na laisim dan khong a haksa leh a nuam na tuahte non share zek thei diam?
KKT: Haksa tamkhop kituak mah ei! Himahleh ken huai haksatnate a problem pen in ka ngaihsun kei. Mess fee ding a om nak leh ka lung a muang hi.
I ut leh laisim pen haksa hilou ahio. Laisiam masate, Tanpu pate lawi khawng in haksa ana sak pen uh bel ihmut suak ahi. Amau a humsam khau in biching ah khih kawm khawng in ana pang ua, himahleh ken bel huchi lawmlawm in kana pang kei. Ihmut a suah chiah ka ihmu mai… ha…ha…ha…
ZOL:Doctorate Degree bang kum leh koi apan a ngah na hia, na thesis toh hon hilh thei diam? India Zomi laka doctorate masapen le himai lou ding na diam?
KKT: Kum 1977 in kana ngah. Kathesis ahihleh “Household Council or Inndongta among the Paite of Lungchin, Manipur south District” ahi. India Zomite lak a di’n a masapen ka hi mai di e… Manipur ah leng a nihna ka hi.
ZOL: Na nasepna lam tomkim non hilh thei diam, singtang mite a dinga bangbang hamphatna om thei ahia chih khong toh?
KKT: Ka sepna, Joint Director (TRI), Directorate for Development of Tribals & Scheduled Castes, Government of Manipur February 29, 2008 in ka na retire ta.
Singtangmite a dingin provision tuamtuam tammah e. Himahleh eilamte’n i Right, Act leh provision tamtuamte I thei kei ua, huai ahi a problem lian leh a poi mahmah khat. Hiaite theihna di’n imi-isate education piak a kul a, kenleng ka hihtheih khomkhom in ka na hilh sam.
Ka seplai in haksatna tampi a om, himahleh, i gensa mah bang in hiaite a problem in ka ngai kei a, side income zong bel ka hi tuankei. Mi hih utluh nna neuchikchik khawmgte ka sem sek a, ka sepna hih ka lunglut a, ka sep di pentaksemkha hidi’n leng ka um hi.
ZOL: Na laibu bawl, adiakin sappau ate mi nautangin a copy bang a ki mu kholkeia, a simkha ki tam khollou dingin a gintak huai. Comment na nei hiam?
KKT: Comment chi le……… nei sam e! I theihkhaklouh ziak bel Research bawl kuamah omlou i hih ziak ahi. Kawl leh vaite lak leh hiai Antropologist circle khawng ah zaw kizang sam mah e…
ZOL: Na laibu bawlte bang na gimpih pen a? Bangbu hoih nasa pen?
KKT: Ka laibu bawlte lak ah ka thesis pen ka gimpihpen. A zial bel, kum sawmthum (30) sung vengveng ka buaipih ahihziak in.
Hoihsak tuam bik di le ka neikei a, himahleh, Geneve tangthu ka bawl pen mipi a diak in nupi te’n a kipahpih mahmah uh hi’n ka thei.
ZOL: I ngeinate hi khua leh beh a tuam dungzui a tuamna nei chiat sim abang a, a tangpi a hiai i nam ngeina ahi chih ah haksatna a om nasa hiam?
KKT: Haksatna tam tham mah. Khua leh beh a tuam zungzui in I ngeina a tuam a, huaipen a hi ding mah leng a bang simta. A ziak bel, Delhi khopi khawng ah Inndongta a kivaipuak theihlouh eive. Delhi phetlou ah leng hiai Imphal khopi tan bang a leng hih theihlouh na chiang om hi. Ei lak ah leng banghiam hihna khawng ah i lawm nam dangte i chial leh Tanute a fel uh ngai eive! A ziak ahihleh ei nek dan maimai a amau ne utlou ding uhi. Hun leh mun a kikhek dungzui in i ngeinate kikhek thei tham ahi.
ZOL: Kawlgam lam ate India ate sangin na kulmut zaw leh ngeina kemching zaw uh abang. Bangziak taka i ngeina tamzaw te ana nusia ki hi ding ahiam?
KKT: Hiai lam a tengte hi, i pempem ziak ua tua i omna mun kitung I hi ua, Burma late bel a innbul ua, nidanglai mah bang in kitenna khawng ah neih-le-lam tampipi ana seng lai uhi. Hiai a innbulna un amau ana kulmutsak in, ngeinate ana kemchingsak zaw hi.
I ngeina tanzawte i nutsiat ziak hihleh neih-le-lam ziak ahi. Mizoram a Dapzal te’n “Sialkhumsa ka nei kei uh” a chi uh. A neilou ahi kei ua, Sialkhumsa a goh zohlouh ziak uh ahi. I khosak dungzui in leng hiai i ngeinate kikhek ana hi kha sek ahi.
ZOL: I ngeina kepchingna ding sorkal panpihna a museum khong bawldan omlou a diam? Manipur sorkal in museum a neihsate ah ei ngeina lui vante a kim thou hiam?
KKT: Bawltheih tham mah ei, himahleh, kuamah a sai khezou ding i omkei ua hiven. Department of Culture……. apan leng panpihna tampi ngah theih a, ngah mawk lengle a sai ding i omlouh chiang in bel hitheilou hi. A sai omte leng kuamah Delhi tual tan tunpihzou leng I omkei uh.
Manipur museum ah bel i ngeina vante uh omzek sam mahleh kim zoulou deuh bang hi.
ZOL: 1980s lak hiamin Khupching leh Ngambawm Drama a chin chih khong a om ngeia, nang malakna hileh a kilawm. Tuni in hiai dante film khong a bawldan omlou ding a diam?
KKT: Hiai Drama kei makaihna nuai a kibawl hisam mah ei… Hiaidan film-te tulai in bawl theih tham mahleh, eilamte film lam a train taktak I omlouh ziak uh hia, hitheilou khat suak hi.
ZOL:Literature lam ah lut le, PLS in Paite laimal palzut a laimal thak bawl chi a ngohna om pen nang bang na chi muh a?
KKT: A theihlouh man uh ahi. Mihing chi 4 (four) i om ua, huaite ahihleh – a theih thei, a theihlouh thei, a theih theilou leh a theihlouh leng theilou. I pau hi pau a i va neih ziak a siam mawk ahi kei. You acquire the knowledge of your mother tongue through unconscious process while you acquire the knowlwdge of English through conscious process.
ZOL: PAL toh PLS kibatlouhna bang ahia?
KKT: Aw!!!... Pauzachin te pawl hilou uh maw? Beita le hilou uh hia?... Bauihuai mahmah eive ua… Board khawng ah hong hek ua, himahleh..
ZOL: Na muhdanin lai gelhsiam kitasam i hi hia ahihkei leh market omlouh ziaka laibu gelhnuam tamlou ki hi zaw?
KKT: Kitasam lua…kitasam lotel! Imphal ah ki-om inchin Tribal thil teng ah kitel. A khente’n bang Kamkhenthang lou midang omlou hia… achih ton uh bang leng omsam eive! La hi’n laibu hitaleh, i market uh kia hilou Christianity/i sahkhua zuih in leng thu pua ahi. Etsakna in, Christianity in i khanglui late uh hon dem. Huailouin i lai gelhte uh bang Bible basis ngen in a kigelh sek hi. Short story, critics writer chih khawng omthei le. Minthanna deih lo pah kei ni!!!
ZOL: I laibu (la khong le hithou) market bangchi keklet theih dingin na mu a?
KKT: La leh laite i bawl chiangin simtak lehg ngaihkhiat taak taktak dingin bawl le a pushing hong hat dia, copy 500 bang hun tomchik sung a bei mai di eive. Huaichiah, hiai market zaalou peng lungkiatna in ngai kei le. Ken ka lehkhabu balte leng mi ka piak chiang in bangzam man a chi’n hon dong sek ua, ken bel “a sung a thute hoihtak a na sim leh huai aman himai” khawng ka chi sek.
ZOL: Nang muhdanin Literature lam ah bang dinmun in i dinga? Manipur singtang mite laka a sangpen a i kigen sek ahimah na sa hiam?
KKT: Sangna khat ah zaw i sang uh, laibu quality nei taktak leng i nei uh, himahleh, Saptuam toh kisai hi’n mimal toh kisai hitaleh Literary value a tawm thei mahmah.
India gam a Museum of Mankind, Bhopal a om in lekhabu a kaihkhawm na ua ei a pen a list ka bawl a, Dr. Tualchin Neihsial in revision hon bawlthak nawn hi. Hiai list dan in bel singtangmite lak ah i tampen uh. Unau Thadou te’n leng a nei ua hileleng a list a bawl chet thei kei uh.
ZOL: A saikha na hih leh louh ka thei kei, laisiangthou ki letthak, NIV pen a kampau zat Paite pau hi salou deuh pawl om abang, i neihsa pen hoih zoulou sakna ziaka a hoih zaw ding a kibawlthak ahi diam ahihkei leh i nam maban ding etna a kibawl?
KKT: A bawlte ahih uleh Semi-Pseudo Scholar ahi ua, Theological background nei a bawl ahi uh. A vek in leng a lak theih kei a, a kizang khawm vek hi. Ken bel Paite Bible ka simlouhna a sawt simta. A ziak bel, ka sim chiang in huchi di…kha chi di…huchi zaw deuh leh chih khawng ka hau thei lua a, nuam kasa kei.
ZOL: Kawlgam ah leng NIV translation Pu Gin En Cin makaihna a pailel khat om hileh a ki lawm zel a, ki hihkhawm khollou hileh a kilawm zel a..
KKT: Huai pen ah nithum (3) tel ding in hon chial ua, ni khat (1) chauh ka vat el. A ziak bel, amau toh semkhawm thei di chi ka hihlouh dan ka kitheih ziak ahi.
Pu Gin En Cin lawmte khat in hichi’n hon chi “Kei Greek, English- Sappau a thil kigelh dan pen ei pau a i leh chiang in bawl lamdang zek a ngai sek hi. Banah, ‘Toupa aw, hong huh in’ chih di a chi ua, kei ngaihdan in bel ‘Toupa aw, hon huh in’ chih ding ahi. A ziak bel, hong pen gamlapi a om chihna ahi a, hon pen naichik a om chihna ahi. Etsakna di’n, ‘Na camera hon pe di le’ chih theih en chi, kinai chik, khut batphak a om i hih chiang a. Innkong lam a om hilechin bel, ‘na camera hong pe zual dih’ kichi di eive. Eh! I gen sau lo kha ua…
ZOL: A tung lai in kawlgam lam Tedim leh India lama Paite in Laisiangthou leh labu kibang ana zang kha le fel vek mai ding abanga, a kibang i zat khaklouhna, huailai a haksatna bangbang om ahi ding, nang theihdan na hon hilh thei diam?
KKT: Huai hunlai a kei theihphak dan in, huaulam ah Haogou a om a, hiai lamah amah contemporary Pu Nengzachin a om nawn a. Amautegel ana kithutuak kha le uh bel ana hoih mai did an chu eive.
ZOL: Paite literature leh pau, Paite MIL toh kisai ah na hun, na tha leh na lungsim tampi na seng ding chih theihsa ahi a, na contribution mipi in appreciate na chang theilou nasak ton a om hiam?
KKT: Ken bel huchi lam in ka na ngaihsun kei. Taksap awnghu ka himai. Kisuanna in leng ka la kei. A hih di omlouh ziak a kana hih a hi a, banah, I mi-I sate khualna ziak liauliau a hih ka hi. Learning I chih chi nih (2) a om - Technical leh Social. Hiai Social ah hi I khuatang a di’n ahihkeh I mi-I sate a dia I hih theihtheih ana hih ding ahi.
ZOL: MIL laibu sunga thute, i subject te lungkim huai thokhat nasa thou hiam?
KKT: Lungkim huai khat in zaw lungkim huai thou mah. Syllabus himhim phuahtawm om theilou ahi a, a format omsa a bawl ahihziak in a haksa mahmah.
ZOL: ZOUMI leh ZOMI spelling kibanglou tungtang bang gennop na nei a? Tulai bangin mi tamzaw in Zomi zangta uh abang a.
KKT: Hiai tungtang ah a diktak pen chu OU di ahi a, a ziak bel O pen OU ahihlouh ziak in. OU pen Lushei-te literature ahi a, amau a hihleh translation literature ahi. Zomi-Zoumi thu a kinawk tuahtuah sang in meeting khat nei khawm in gen veng thei le a ut huai mahmah.
ZOL: India ah Paite Kawlgam ah Tedim i hi na chi a, mi tamzaw in huai hon chihpih theilou uh bang zel a. Bang gennop na nei?
KKT: Paihte chih ding ahi a, himahleh Indian Constitution a Article 342 nuai ah Paite chi a ana kitheih ziak in bangmah i hihtheih a om nawnta kei. Hiai thumal hong pian khiat dan hichidan ahi. Nidanglai in khua a om a, Paihte khua, Lusheite khua.
ZOL:Manipur ah Paite te’n Zomi ki neitusak chi a ngohna a oma, Paite khenkhat in lah Tedim kampaute’n ki neitusak a chi zel ua. Zomi zat siam nailou i diam?.
KKT: Hiai toh kisai ken le tamveipi kana genta a, himahleh, ei a culture neisate a ding in bel Kuki or Mizo va kichih ding haksa mahmah hi. Kuki te’n Kut hon zang ua leh Paite, Mizo, etc. te leng a tel ua, PAite, Mizo, etc. la leng a sak sam di uh eivoi… Tua hilou a, a stage bang Thadou puan ngen a dim. Eimi te’n leng Khuodou Pawi zang dupdup mai ta le ut ka hi.
ZOL: Suangtu khat/nam khat i hih ki pomveka napi, pau leh puan (nampuan i chih) in hon tuamsak abang. Geographically in i tenna leitang kizom mahleh politically in gam, state, district tuam chiat ah i oma Zosuan bup kisaikhakna (interaction) om khollou in mahni omna chiat ah kimkiang’ (environment) influence dan tuam nei chiatin in kum tampi i na survive ta. Huai dinmun ah unification/reunification i chihte a practical in na mu hiam?
KKT: Practical tak a chu thil haksa, kilamet huailou mahmah eive.
ZOL: Imphal khong a khosa na hihna ah Meitei toh politics lam ah i interest a kikalh hiam ahihkeileh sepkhawm theih dan om in na mu hiam?
KKT: Amau bel Kangleipak… hiai phaizang sung nidang a a Lengte un ana ukna teng vengbit din g chih hilel hi. British te’n Meitei-te hichi’n ana chi uh “They have a religion which they know. They have a God whom they do not believe. They have…”
ZOL: Sahkhua leh politics a paikhawm ding ahi chih na pom hiam? Na pom/pomkei leh a ziak tomkim in hon gen ve maw.
KKT: Ka pomkei. Sahkhua toh politics chu paikhawm kei leh. Etsakna di’n Nagaland for Christ chih bang hai huai lua. Pathian in a gam hilou in a mi eive a deih.
ZOL: Personal deuh ki dong le. Na hinkhua ah lohching na kisa hiam? Huchi in na hihka leng chia kisik velvulna na nei hiam?
KKT: Kisik vulvul nang zaw nei keng. Tu’n ka kum sukiam thei leng ka chi. Lohching in bel ka kingai kei.
ZOL:. Mipi theih dinga gennop leh vei deuh na neih dang a om leh hon gen ve maw.
KKT: Gen di zaw tam mah e. Hmm… I society kha leitual a kinga ahi a, feet khat bek in domsangtou thei le.Tangval vai maimaite khawng in khutsiam silbawl khawng hahkat thei le a hoih zaw di’n ka ging.
ZOL: Ka kipak e. 

 


Comments

Experience of the students and individuals is very priceless and finesse oriented. The operations of the studies are very nice written and formed. The formulation of the theories and then its practical nature is vital and pivotal.

Reply



Leave a Reply

    Categories

    All
    Dr. Leo Mang Cin Hau
    Interview

    Archives

    January 2015
    September 2014
    August 2014
    August 2012
    July 2012
    June 2012
    May 2012
    February 2012
    January 2012