WWW.TUNGZANGNEWS.COM

 
Houlimna | Pu K Guite, Adviser ZRO



Zomi Council (ZC) ai-oh a Delhi hong zin Zomi heutute toh Arunachal House, Delhi a kikhopna ah ZogamOnline leng va kitel hi. Thu kigente leh a kigenkhaloute theisiam seem nuam, ban ah, huai meeting a tellou tampite khualna in heutute (adiak in Pu K. Guite) houlimpih diing in kidawp a, hun kibichilh takmai kaal ah houlimna diing hun ahon sihkhiak thei ua, kipahhuai petmah hi. Huchi in, the 30th March 2011, 3:00pm vel in a kingakna mun uh Central Delhi ah, ZOL apan Tg. Khaikhanmung Ngaihte leh Tg. Jonathan Naulak va dianglut thei ua, amaute leeng kizen sak in a om mahmah uh. Kihouna simsuk ni:-

ZOL: Knock Knock (kong kiiu).
K. Guite:
(Pu K. Guite in hong hon) Eh, Hong luut ua. Hong tungta uh maw…

ZOL: Hi hong tungta. Sena Bhawan lam hon va en masakha ung a, hong tunghak sim.
K. Guite:
Poilou. Kou le ana buaisim lingling lai ka hi uh.

Bangbang hiam kihou maimai phot in a om a, huchi a awl a kha in ahon polh tak in houlim pat ahi hi. Amau mi 4 hongzin uh ahi a, hall/room khat ah lupna 4 a kizom in om a, tutna diing leeng a omkei a, lupna tung a tu keuhkauh kawm a kihou ahi mai hi. Dotna teng awl in ahon dawng hiauhiau a, khat veivei bang mitsi kawm diaudiau in ahon dawng a, khat veivei lah theihsiamna di’a lupna tung khuttal a giit tiautiau kawm khawng in thute ahon hilh hi. A nuai ah:-

ZOL: ZRO’ thiltup bang ahia? I kipat tuung apan i tup uah i tolhta uhia?
K. Guite:
ZRO in i tup bel, leitung maikaih a Zomite kigawm kiikna diing ahi. Huai diing in stage thum a poimoh a, huaite bel:

(i) Moral integrity; hiai ahihleh, unau-sanggam i hi chih kitheihna, kipomna ahi.

(ii) Physical integrity; hiai nawn ahihleh, Zomi sung a nam khat hong sita leh, kidahpih theihna. Nam/mimal khat in lohchinna khat hon ngah taleh, kipahpih theihna. Innlam sang in mundang ah hiai physical integrity a om zothamta. Hiai a tung a nihte’n gamgi a neikei.

(iii) Territorial integrity; hiai pen ahihleh, a kigen pha naikei. India solkal i dou zoukei dia, huchi bang in Burma/Bangladesh solkal le. Himahleh, moral leh physical integrity hoihtak i neih nakleh, khovel kiheihei a hong ki evolve thei ahi.

A lompi a geen in, i kipatna uh a sawtlouh toh teh in i haat ua, tua i dinmun leeng a senai hetkei.

ZOL:International i mangmat lai in, SoO chi in Manipur integrity sukeeklou di’n suai i kaai ua, bangziak ahia? ZRO’ maban diing bang ahia? Muih dek houh i hi diing uam?
K. Guite:
Muihdek hilou e. Kum 20 i pha naikei a, hilele mipi’n ngaklah i hita. Banghiam lu-ngakna diing leeng neilou a, hichia i paitouh zeel leh muih maimah theih ahi zaw. Bangtak ahia chi in i kinoh thu in solkal bei ekh diing chileng, manpower in i daihkei a, resource i neikei ua, i gam aneu a, tomchik leng i pangzoukei diing uh. Huaiziakin, 2004 lak in heutute’ kiang hiai ngaihdan ka luikhia a, “Mipi’n theisiamlou diing uh ahi” achi ua, himahleh, sum leh manpower ah Churachandpur apan contribution 90% ahi a, hiai mite’ a diing banghiam i laihkhiak masak keileh, mipi’n ahon ngaklah gawp diing ua, kisuihpuk theih ahi, huai hun a Pawlpi in lu-ngakna diing leeng neilou a omtheih ahi chih ngaihdan ka na zuakta.

Laithei na hi ua, khovel khangthu en vengveng le uchin, politics a kum 100 i chih sawt hilou ahi. Italy bang en le uchin, mikhat in laibu ahon gelh a, huai laibu kum 100 bang hong ki circulate a, huchi a mipi’n theisiam a ahong min mahmahtak a revolution hong om dan ahi. Ei ki-en le’ng, u T.C. Tiankham in B.A. a pass na a sawt naikei. Khang haattak chu i hi. Himahleh, mipi’n hiai’ saang a kinzaw deih. Huaiziak a lu-ngakna diing authority neukhat i neihkei leh, ei’ dream lah kum 20/30 a hong ki evolve khephut diing hilou ahihchiang in, i organization pen sawt ki run zoulou diing ahi chih a kimuhchiang luat ziak a hichi bang a thil kihih ahi. Gamlapi ki-en a thil kihih hisaam ahi.

ZOL:International politics la?
K. Guite:
I gen bang in, lu-ngakna hoihtak le neiloupi a international politics sai a haksa mahmah. Tulel dinmun in i haat hetkei. Hilehleng, hihtheih khomkhom in i unau Kachin helte toh kimeltheihna kibawl a, amun mahmah a va vehna bang leng a kinei tham. Amau lak ah leeng, Zomi chih min pom a omthamta uh. Huaikia hilou in, nam tuamtuam toh leeng i hihtheih tan a kimeltheih tuahna kibawl tham ahi.

Huailou, Geneva khawng a leeng, any forum min a va kitel zeel ahi. Politics hipahkei lehle, mi’ file a va tel himhim. I sum seen uh toh kituak kholkei mahleh, denlam chiang a hong phatuam d i chihman ahi. Hiaitan-huaitan tung va chihtheih a omkei. A vekpi a geen in, hiailam a haatzou nailou i hi.

ZOL: Galbuai khit nung khawng in bel, ZRO/A’ hih chu ‘hih’ ahimai a, kuamah a pau/dong ngam a omkei. Himahleh, tu chiangchiang inbel, a huchi nawnkei chih i mu. Gamchiam zuan a pai, lamhaih maimah kisakna hong lian a, ZRO chih khawng a gin naakleh mipi kikamsa a ki-omsim gige pen mipi’ moh i chithei diam? Amau’ a dan a koih a, lauh sim toh kineihsak thuah a thukan lotel ngamlou lah ngaikhawk ve teei bangle hithei. Mipite communicate poimoh hilou hia?
K. Guite:
Tamveipi ka suggest ta a, publicity ka tangkou pih a, himahleh, a piang naikei. Mipi’n a theih d dawl i theihsak leh mipi lungkim diing ahi chih le ka thei tham. I sawm touh zeel diing uh chu ahi peuhmah.

ZOL: Huchi kawmkal ah… nautang, mimal (leh cardre-te’ tung mahmah a) gamtatna huhamte, tunglam a kipan mah adiam?
K. Guite:
Ahitak gen le’ng, tangvalte lai sinlou ahi taangpi ua, a service un daih, caliber niam, hilehle, kaisang sak ngai chih bang omtham ahi. Huaiziak a, khatveivei hong huham lokha zeel uh ahi. ZRA hi in, army himhim hitaleh, kigawt d dan training kipelou ahi. Police te’n bel training hoihtak a nei uh. Ahi a, huaiziak a justify ka hikei, huchibang hun khawng in ka ngaihtuah sek a, “Heutu hoihdeuh, graduate beek hileh huchi khalou deuh d hi a…” ka chih vungvung ni a tam.

ZOL: Guta, khutkhial…te i handle dan uah; khenkhat gawt, khenkhat koihhoih, khenkhat police, inndongta… hiaite hihkhaak dandan hia? Ahk, set of rules om a kihih?
K. Guite:
Hiaite ah set of rules a kineikei.

ZOL: Saptuam heutute toh kitheih siamlouhna bang ka zakha uh abang a, bangchi dan ahia?
K. Guite:
Khatvei YPA hall ah, ngohna tuamtuam paulam in saptuam heutute kisam kha mah e. Huai ah kitauhtuah naksim in a om a… Amau le hehlua zaw ahi d ua, “K’on thumpih nawnkei diing uh” khawng a chi ua, himahleh, huai ni a ka gen tuni mah in ka gen di. “I hoih ni in bel thutuam chi zezeen ni, himahleh, i hoihlouh lai ahi thumna i poimoh. Huaiziak in, thum mite’n na thumna uah hon phawk gige un.”

ZOL: Na gen nuam de aw… ka zakha ngei abang a, president masa na hi a, adviser na hi tawntung a. Hilele, khatvei hong pokhe ngei uh hiale?
K. Guite:
Inn-le-lou nusia a, gam-le-nam iitna ziak a hongpai ka hi a, mimal’ chitlouhna hiam, kua hiam in thilkhat a hihkhelh ziak hiam a ka iitna apan nungtolh diing ka hikei. Nou leeng gam leh nam na iit taktak ualeh, a paisate enlou a, kiim-le-kiang a thil khat-le-nih ziak a kithadahsak mailou a, gamlapi en a lam-etna toh pan khoh a i pai diing uh ahi.

ZOL:Hiailam a thil banghiam a kihih chiang in, asia a i theih hi hetlou napi, innlam apan call a ngah zeuhzeuh theih mawk a, huaikia hilou, na sungkuante koi a teeng… chih dandeuh piante kha, a nuam hetkei a…
K. Guite:
Huchibang om ahihleh, mawk patauhlouh a hoihtak a kanchet di’n a hoih di. Ei’ sung lou ah leeng huchibang a tamta a, President i nei a, Secretary i nei a, a khawmbawlte a omlaai ua, thil i theihsiamlouh a omleh mawk patauh sang in kanchian pahpah le’ng. Sum lam thu bang ah leeng, mi khat peuhpeuh in hon mawk nget thei eive ua, huai bangle, Finance Secy a om a, “Huchibang khachibang a om a, nou’ a kipan thusuak mah hia?” chih bang a in theihlouhte chian le’ng, amau le open mahmah diing uh ahi.

ZOL: Ahimhim in, Pawlpi in mipi toh communication gap bangziak a hichitel a liansak ahi d’uh? Ngaihkhawk a omlou mah adiam?
K. Guite:
Communication kichi Pawlpi’n a utlouh ahikei a, a siamtheih mahmahlouh khat ahi. Kei leeng hahpan in ka pang a, bridge seeng ahikei. PR lam i chaau mahmah uh.

Huaiziak in, mi na naih leh, amau leeng ahon naih diing ua, khatvei na dot a na theihkei leh nihvei dot a thei diing le hi maithei na hi. Lungke pahpahlou in, iitna leh theihsiamna toh kineisak a i pankhawm chiat diing uh ahi.

ZOL: Ahihleh, ‘Information and Publicity Department’ bang omtham hang a, huaite’n bang hih uh ahi diing? Kumkhat in mipi/government muhtheih di’n laipek bangzah a suah diing ua aw?
K. Guite:
‘Information and Publicity Department’ om mah e. Nna kizoulou ahi chih leeng a kithei. Pawlpi i hatlouhna mahmah uh leeng publicity ahi. Pawlpi a athupi pen khat, State govt. leh Centre govt. leh namdangte’n ahon theih uh ahi.

Etsakna diing in: Innlam ah program thupitak i sai ua, i ommun uah i thawm uh a ngaih mahmah a, himahleh koimun mah a deengkei chih i mu. Huaisang in, Delhi apan bang journalist khat 1lakh bei a chial in, frontline ah hon suah tale uh, inn a sial 10 i goh saang un a phatuam zotham diing. Tawmvei ka genkei. Puannuai a zangliit bang a a phattuamna om? Hiaite kitheilou ahikei a, a kizou nailou ahi.

ZOL: Huchi a ki-accept i hihleh, bangtan ah pan a kila a?
K. Guite:
Huchi a hatlou i hihleh chi in, khut-le-khe a zat di’n frontal organization tuamtuam a kibawl a, student wing bang, mothers wing bang, economy lam sai d bang, rights wing bang… hiaite official tak a pawlpi toh kizom daan a theih d hikei mahleh, pawlpi’ a ahi. Hiaite beek hong haatle uh chih deihhuai mahleh, azou tuankei uh.

Huchi kawmkal ah, nou (media) lamte leng, Zomi interest ah publicity na hatkei uh. Ka hon mohsakei. I vekpi ua hatlou i hi. Mathak i laak ua, i pankhawm ua, haat i sawm diing uh ahi.

ZOL: Huai na chih ngei leh, internet khawng a kigen momotte ngaidah sim pawl om hiale?
K. Guite:
Nou voluntary work ahi na sep uh. Fel ka hon sa a, ka hon kipahpih mahmah. Hilehle, mihing bukimlou i hihna ah, mimal’ weakness khawng tam va taklat luat hi, hoihlou ahi. ‘Vok in baal a duh a, hileleng, a baal mah zang a a vok i deen leh, taai maimah’ chih dan a, i kinaihtuah diing dan uh lemtang zaw om d ahi. Mi mizia bang ahia, bang ahia a buaina uh chih khawng thei in, huai apan a constructive zawng in thil genle, a phatuamkei diing i chi theikei.

ZOL: A buaihuai nawm mahmah bel, mipi’n a ut bangbang a gentheihna forum ahih ziak a, i site khawng mi’n ngaina hi a, mi’ thugen di restrict theih mawklouh a…
K. Guite:
Himah e. Tua i gente za lak a tamlouchik khawng lel ahi diing. I nam’ adia responsible person i hihvek ua, iit taktak i hihleh khenkhatte’ hih bang a, frontal attack phokphok louh a, weakness leh remedial measures-te khawng hoihtak a luikhiat chu kipahpih kia hilou a phatuam mahmah diing ahi. I pawlpi hatna di’a huailam i hahbawl diing uh ahi.

ZOL:Mipi’ sou na muhdan na hon gen thei diam?
K. Guite:
Democracy a khanglian, theisiam lozezeen in, full of curiosity hi in ka mu. Huai ban ah, ngakzohna neiloute i hi. Thil i deih khat i ngahna di’a, huai thil ngaklahna in hon kipalbuaisak dekdek a diam aw ka chi. Thil hoih i deih a, a hoih penpen i deih a, huai le kindeuh a deih zomahte hi hang a…

EBC sungbang hileh; Upa khat a omleh huai Upa pen Pastor bangbang hileh chi, Pastor pa Director bangbang hileh chi, Director pa Executive Secretary bangbang hileh chi, Executive Secretary pa Angel bangbang hileh chite i hi uh. Thilhoih i deih uh asia ahikei. Hilele, ei’ deihbang leh ei’ deih hun a pianglou om ahi chihle i theihsiam uh kiphamoh hi in ka mu.

ZOL: Saptuam nah on genleh… zoudawn school puahna dia panlakna a om hia? Mipite’ health/welfare lam la?
K. Guite:
A kinei a, khatvei laai teng a kibuaipih mahmah a, himahleh a sung a thil tampi a kigolh ziak in a fail. Tu in, strategy khat a kikhoh nawn a, Council toh kithuzak a hihtheihtawp suah kisawm ahi.

ZOL: A chihleh, i gam a contractor-te, ei’ a te (or i recommend) ngen ahi sim ua, bang undertaking la a amaute kipia ahi diing? I nasepte ulah, phatluat diing a om vakkei a…!
K. Guite:
Government piching tak i hihlouh ziak mah a va genkhiak theihlouh lah kilawm mahmah thil kisai om leeng ahi maithei. Himahleh, a bangteng hitaleh leeng, eimi chi a kideihsak piak i hihleh, Meitei-te’ contract na te khawng toh teh a hoihzaw ahih zeenkei lehle, a quality kikim beek in nna hon semle uh chih zaw deihhuai lotel mah e maw…

ZOL:MLA te ei chinsak mah hiliau uh ahih chiang in, i zangthei uhia? Assembly a thu kigente, ei’ adia i theihtuak, gam leh leitang vai, (CoPTAM’ min a i buaipih uh overlapping) thu khawng, awareness ahon pe-ngei uhia?
K. Guite:
MLA te a kizang theikei. Kizangtuah siam nailou i hikha diing uh. Regards kipiak tuahdan bang kisiam lawmlawmlou inchin. Mohsak tuam di le theikhang. Himahleh, a paita in bel development politics lel khawngle ahisim a, Pawlpi’ zatna diing thu genle’ng, tu apan azatna diing uh omta hipan in leeng ka musim. Pawlpi’n nget khat ki-define theita ahihna ah, hiai thu toh kisai a amau i zat mahmah diingte hong hi diing uh ahi.

ZOL: MLA election thu ah la…?
K. Guite:
Free and fair election saang a hoihzaw a omkei. Hilehleeng, a sung a thil om leh ikiim-ikiang khawng i et chiang in, kitukluut louh theihlouh dinmun khawng a omkha sek a, a hoihpen hikei mah e.

ZOL: Zomi Nam Ni 2011 a MLA ut te ‘talk show’ la… ei’ sai diing a zenzen maw!? Miss contest i chih khawng le, tuailaite’n naaizeen a nuamsa a, gam hausatak hileh kilawm a sum bang leeng phungphung maimah? Sum tapitak seeng a kisai, huai a i lohtaak uh om hi in na mu hia?
K. Guite:
Guite kual ah Paite siang ngen i hi ua, hiaibang ni khawng in mundang deuh a zat ka ut. Leizangphai lam, nam tuamtuam in i zat theihna mun a mipite’ kiang a thugen ka ut a, huailam ah Zomi Nam Ni ka va zang.

ZOL:Dotna omnawn khat bel, Indian Army-te toh kikaap ngei le hilou, bangziak a SoO chimawk i hi diing uh?
K. Guite:
Mipi’n i theihsiamkei leh, donglou a kholai a kikou mawk hang a… Mi’n sisan-naisan pal a, luang tampi kikham nung a SoO achih laai ua, en tuate pallou a SoO i chih theih… What is the brain behind this? Chih beek le ngaihtuah hoih hi a… Solkal toh i bulphuh chu, hong slow sim lele, beimawklou diing ahi.

ZOL: Eh! Nguttak. SoO hita hi a, sum kikhonkhon lai diing mah adiam?
K. Guite:
I Pawlpi bei hi zenzenlou ahi.

ZOL:I Pawlpi in sum naak dang a nei hialeh?
K. Guite:
Neilou.

ZOL: Huchi a mipi’ sum, mipi’ pawlpi ahihleh, bangbang khawng a sum kizang ahi d? Mipi’n a theih hoihlou di hia?
K. Guite:
Thautawi pawlkhat kihisaam inchin, i thuduh dante uh kha, nasa thei lotel!

Kuamah hichibang pawl in ei tuk a thil hoihtak a maintain vaang mahmah diing ahi. Khaguk dan a audit ahi a, annual audit statement kimtak a om gige a, na sumthohte uh mawkmai in a mangthang hetkei. Huchi a mikhat in, hichitel a theinuam ahihleh, Finance lamte’ kiang ah, amah sumthoh dan leh a kizat dan statement tanpha kimtak in a va enthei gige di. Va ngen le uchin a honna ensak mahmah diing uh.

Hilehle, huchi khop a thautawi pawlkhat sung a sum kizeekdan tantan theinuam a kua ai a va thuduh di? Supply ah hiaizah, arms ah hiaizah, thautang hiaizah, medical lam ah hiaizah… chih khawng thuuk lodeuh hilou diing hia? Amah thuduh ziak keleu, thei lele amah di’a phattuamna omlou di, gam-le-nam’ adi’a le phatuamlou di, mi bangzah hiam hinna risk sak hi laideep diing hi a.

ZOL: Heutu a sepluat uhle theihlouh a hausa hulhulte la? Hiai undue growth in, nautang’ tung a sum deihtaakna lungtang pia a, seemlou a summuh poihsaklouhna, sum zahtaklouhna tun hilou hia? Tuailai leh sinlai naupang tamtakte’ moral su se behlap nalai?
K. Guite:
Mikhat hauhsak mi khat hihkhelh khawng i buaipih luat ua, i tangkou pihpih diing uh hilou ahi. Pawlpi’ sung a nam iit kichi napi, a nasep uh theihlouh phet hilou a, amau mahmah inle a nasep uh bangtak ahia chihle a theilou hunkhop ki-om. Mulou a kihikei a theilou a kihikei. Va hihtheih geih omlou lam ahizaw. Ahi a, intellectual leh laisiam pipite’ buaina diing hiai hiloupi. Hiaite kheel a, maban a bangchi bang a panlak ahoihpen dia? Saupi en a, study bawl a, research khawng bawl a, i pawlpi makaite toh kikup/thuzaak zeel chih khawng ahih zawk diing ahi. Banah, huailam i mitvakna uh ahih a, hihtheih om ngelloupi khat a en i hahgen luatleh, Zomi integrity tanpha susethei i hi chihphawk a, responsible Zomi hih i sawmchiat diing uh ahi zaw.

ZOL: Achih lelah… Cadre te’n loh neita uhia le? Bangchi dan a piak ahi?
K. Guite:
Cadre te’n loh/stipend nei mah uh e. Hilehleeng, Manipur solkal in Muvanlai a omteng a diing kia ahon pia a, hawmsiam a reserved/inn a omteng toh huai sum kihawmsak ahi.

ZOL:Muvanlai a bangzah om ahi diing? Mikhat in bangzah mu uh ahi de aw?
K. Guite:
Muvanlai ah cadre te a vek un a om kei ua, Ch.3000/- per head dan a chu hongpai ahi.

ZOL: Achihleh, en thauteng chabi i kalhkhum laai in, mi’n buaina hong bawl bang hitaleh?
K. Guite:
Huaite khawng leng kingaihtuah tham ahi. Thau bel, hun hikei mahleh, ei’ kivenna di’n bangzah hiam tan ahon phalsak uh.

ZOL: Ahihleh, tua cadre te’n bang hihta diing uh?
K. Guite:
I poimoh hun a saptheih di’n suty dan in inn ah a kipaisak a, khenkhat in lou nna khawng a sem uh.

ZOL: I poimoh hunhun a zang a sam gaihgaih (d) hang a… amau rehabilitate na nna lampang la?
K. Guite:
I Pawlpi’n huchibang kihih zoulou ahihna ah, solkal lam a i phuut uh ngai di ahi.

ZOL: Cadre tengteng in a sum d uh bangchik chiang a a kim a mu diing uh ahia?
K. Guite:
Manipur solkal in Muvanlai a na om kim chiang un a kim in kon pe diing uh ahon chi ua, i kong bangkim ua nantheih-nanmoh a hon nang uh chu ahi ve. Chidambaram kiang bang ah, “SoO sung a sum khonkhon lai uh ahi” chih khawng peuh in ahon heek ua, Chidambaram inle, “A sum diing uh na hentangsak taak un extortion ahih mahkei diing ua” chihsan aka.

ZOL: Achihleh SoO thu a bangziak a Kuki min gingging a, Zomi’ min ging ngeilou ahi di?
K. Guite:
(i) Noule en le uchin, UPF nuai ah KNF a om a, UKLF le a om. A theiloute’ adi’n Kuki helpawlte chihtheih diing mah ahi. A langkhat ah lah, KNO ahi a, Kuki min mah ahi zeel.

(ii) A diktak in, UNLF/PLA te khawng ei’ tung ah a siam petmah ua, regards le ahon pe mahmah uh. Amau Burma ah a om ua, phaizang ah a om ua, ei’ gam ahon enlah mahmah uh. Sum leh thil khempeuh ahon tah ua, “Na gam uah hon omsak un, kimelma i hikei uh” chi in ahon kunkun ua, himahleh, hun saupi i en vengveng ua, a dawnna chu, ‘No’ ahimai. Huai phet hilou in, i zat diing bangtak in zangthei (nai)kei le hangle, i kizompih Burma ah Chin State i nei a, India ah Mizoram in nei ua, huphulh sim leh iplah ahon thuah nalai ua…

Huchi in ahong thangpaih pan ua, “Kukite Naga hel lak ah tampi a om ua, Meitei hel lak ah leeng tampi a om ua, huchi mah bang in, pawl tuamtuam ah a tel vek uh. Hilele, nou mite huchibang na omkei uh. Nam kisathei na hi uh” ahon chi ua, kimawk phatna hilou in ahon thulak/lau pen ua, haat leeng ahon sa ua, a pankhohna uh khat ahihleh, “Imphal media himhim a hiaite cover louh d” chih ahi. Huchih naak lai a media lam a hatlouh thuah behlap laideep hang a…

(iii) Ban ah, iimlouh in amau media ah hat ua, lobby a bawlsiam uh. Hilele, patauhna diing a omkei. Propaganda ahi. A taktak gam ahih chiang in India a khem zoukei diing uh. Churachandpur a 100% Kuki va chih bangle, census a om a, tribe recognition bang le a om a, huaite’n Kuki a pom uhia… Lauh huailou ahi. Lauh huailou i chih kawmkawm in, enle, media lam hiaisang a i hahbawl zawkseem diing uh chu ahi peuhmah.

ZOL: Ummm… ZRO or UPF in demand a nei hialeh?
K. Guite:
Neilou.

ZOL: Autonomous Tribal State (ATS) pen kuate’ nget ahia chih le kitheilou a?
K. Guite:
Zomi Council min a kingen ahi. Ama in bel a ki publicise kei mah. Himahleh tu in bel, memorandum a kikheta a, kuakua hiam i muta ua, a thu zuak a lobby i bawl diing uh hita ahi.

ZOL: Huchi a ZC in a nget ahihleh, SoO lah ZC in sign lou a, bangziak a huai sang a deihhuai zaw ngenlou hi diing uh? Ban ah, ZC in bang dia Zomi’ min a ngenlou? State within a state ZC in a nget pen, ZC’ tup neulua ahi diam?
K. Guite:
Policy nihvei bang a kikheek. Ahimah, Manipur integrity suselou di’n ZC in suai a kai kei. Adik. Hilele, en vengveng le uchin, Kuki te’ demand viable i sa uhia? Ahihkei leh, Naga te ‘alternative arrangement’ pen bang genna ahi diing? Anih tuaktuak a viable lou ahi. Tu in enle amau hih bang in, selfish tak in thilkhat ve demand tale’ng, amau toh i tuamna omlou, amau toh kikim kihi maimah diing ahi.

Viable hita zenzen lehleeng, Kukiland in Nagate leh Churachandpur a heetkha a, Naga te’ thildeih in Kuki area tampi a heetkha. A naih deuhdeuh leh, eiteng kina/kigaal deuhdeuh di. Hiai kaal a i et vengveng chiang in, Meitei te’n chance tampi a nei uh.

Huaiziak in, ZRO cabinet meeting ah ka poluut a, “Manipur integrity sukeeklou a i ngettheih uh lak a a hoihpen bel, State within a state ahi” chi in. A tuung in theihsiam pah hikei mahleh, consultation a decision lak dia thupuk ahi a, tu in consultation ah a kipomta.

ZOL: Achihleh, Zomi Re-unification Organization’ thil deih/tup leh ZC’ thil nget hong kikalh khaleh?
K. Guite:
ZRO/UPF te charter of demand nget in a ki-om a, thil geel vengveng lou a kisai ahikei. A khung a hong ki-collide thei di zawng a thil sai hilou na ahi.

ZOL: Huchi chu, ZC in a thilnget pen, ei Zomi te’ a diing kia hilou chihna eivoi maw leh?
K. Guite:
Hi, hilou. Manipur ah i selfish leh, bangmah i lohtaak kei dia, gaal kibawl i hizaw kha di. Huai kia leeng hilou in, Centre in ahon ngaihsak tuankei diing. Naga te’n hiaitan ana sualta ua, i thei mai uh. Ahih haang in, North-East State te a thil paidan i etleh, Manipur a Tribal te’n chu, banghiam ki deserved ta ahi. Huaiziak a, ei kia hilou a, i (or Centre in le a) hih masakpen diing leh a baihlam pen chu, phaizang gam leh tribal te’ gam a tuam a khenkhiak phot ahi.

ZOL:Tribal State chihmawk le a min vague lua hilou maw?
K. Guite:
Meghalaya, amin kipiak thoh ahih bang a, huailam zaw a haksatna omlou ahi. Huaihun’ chiang in amin khat peuhpeuh honpe le uh a poikei. India in phaizang mi leh singtangmi khen a, singtangmite kepbitna diing a provision a neihte ahon piak ngeingei diing uh i rights ahi. Huaihun a, tua en i ngetpen, Article 244A nuai a provision omte zalzoh theihna diing ana tumlawk i hi. Tua en i hih diing uh bel, hiai Tribal State (diing) sung a a ins-and-out study bawl a, Parent State toh a relation diing bang ahia chih khawng i khuat a, Centre i convince diing uh ahi. I na kigin diing uh chihna ahi.

ZOL:Huchi… i tribal pih dangte’n hon ‘amen’ pih diing uh amawk maw?
K. Guite:
Amen kei le uh leeng a lampi diing dang omlou ahi. State tuamtuam ah lah ahon khen teltulkei diing ua, UT lah ahon pe teltulkei diing ua, himahleh, Tribal te kepbitna diing provision hon bawlsak diing uh ahi chih chu ahon muchiang pah diing uh. Huaihun chiang a, tua ei’ nget peenlou adang a hoihzaw ei toh kituak di kitheilou ahiphot.

Tu in leeng laibu ka kaikhawm a, study hoihtak in ka bawl a, hiai ngaihdan zuak a kidiang diangta ahi. “Yes” hipah geihgeih kei lele, Naga hi in Kuki lam hileh, a moderate group te’n bel in-principle in lem a sa mahmah chiatta uh.

Tua i nasep diing uh khat bel, hiai ngaihdan zuak ahi. Nautaang’ kiang ah i zuak diing a, politician te’ kiang ah i zuak diing uh. Pu Rishang, SC Jamir te khawng (congress) leh kuakua hiam a kimu khintham a, hoih asa mahmah uh. En i gen mama bang a le amau mahmah in Home Minister kiang tan bang ana tun khin mawk daan uh ahi. Lobby i bawlsiam a, ngaihdan zuak i siamleh, hong kindeuh thei diing chihna ahi. Mohpuakna nei chiat i hi.

ZOL: A moderate group loute la?
K. Guite:
Singnuai mite’n sixth schedule sual ahikei ua, Statehood khawng sual ahih chiang un, Govt. in lah hi asa theikei diing a, i na et vengveng chiang in (tu leh tu a a alternate d dang kitheilou ahihchiang in) hiai ah ahong kesuk thouthou diing. Government in le a deal diing a, en le i bei zeel diing a, nikhat ni chiang a hon theisiam na diing uh ahi.

ZOL: I chih bang in, kimohsak i thangsak mahmah ua, bang ahia na ngaihdan?
K. Guite:
Eimite misia i hikei. Hilehle, phunhaat i hia ua, mi’ a leh mi’ thil a va kidaih zouzaaite i hi uh. Vengsung ah nupa kikhen khat omleh, vengsung mite’ houlimna himawk! Ka ngaihtuah ngei kholkei a, mi le gen d, mi’n le ei hon gen d, huai a hehlouh d chih kaan a lampi geen d ka theikei.

ZOL: Na hun awl a bang hihsek na daw leh?
K. Guite:
Ken chu, India a Schedule Tribe, SC leh OBC te’ tangthu, India khua-leh-tui hihna a provision a neihte uh chih kigelhna laibute khawng ka kaikhawm a, ka simsim.

ZOL: Kare, nuamlua. Hun neitam deuh le uchin, kihoulim uthuai lolai hia.
K. Guite:
Hun kibichilh theilua a, awl a thil gen hiauhiau khawng zaw uthuai mahtham e.

Kaare, amau a pawtna diing uh bangleeng omlai ahih man in (tuale a lawmte’n office khat-le-nih va pha khin, hong tungnawnta uh hizezen aihteh), a kihunsak phot a, dotnop tampi omlai mahleh tawp phot ahi. Huchi in, kipahthute bang ka kigen tuah ua, a ziingchiang a apaina diing ua lamzang leh nuamtak a apai theihna diing ua deihsak thute kikhak in, haat leh damthei diing a deihsakthu toh chibai peuh ka kibuuk thakthak ua, ka paikhiak dek taktak tan un chu, mi 5/6 bang ahong pha ua, pawt nawn di’n a kisasim souhsouhta uhi.

__._,_.___

Source:Zogam online

 


Comments

03/30/2015 00:30

You blog post is just completely quality and informative. Many new facts and information which I have not heard about before. Keep sharing more blog posts.

Reply



Leave a Reply

    Categories

    All
    Dr. Leo Mang Cin Hau
    Interview

    Archives

    January 2015
    September 2014
    August 2014
    August 2012
    July 2012
    June 2012
    May 2012
    February 2012
    January 2012