WWW.TUNGZANGNEWS.COM

 
Amasa in Dr Hau Za Cin tawh kiho theihna ding hunpha ngah i hih manin lungdam hang.

Vaphual: Hehpihna tawh na tangthu tomkim nong gen thei ding hiam? (Na min, pianna, pian kum, sangkahna, nasepna, leh innkuan, zi-le-ta…etc)

Dr Hau Za Cin: Ka min Hau Za Cin Suante hi. 1974 in ka pianga, ka khua uh Murlen ah Middle School ciang kah in, Hnahlan leh Champhai ah High School ka zo hi. Shillong ah College leh University ka zo a, PhD ka zawh ciangin kum 5 sung India leh gam dangah na ka sem hi. Research bawl in ka zin kawikawi hi.

Unau 9 sung pan a 3na ka hi a, ka zi it mahmah Vung Deih Cing  (photo below) d/o Pa Thang Za Vungh Valte tawh pumkhat suak in, tuni ciang dong Topa in hong kem, hong ompih in, lamet batloh thupha tampi hong pia hi.

Vaphual:  Na laigelhte ZoNet (Zomi Yahoo! Groups) ah tampi in ki sim in, simnop kisa mahmah hi.  Tua na laigelhte mah pan in Ka Laikung Panin cih laibu nong hawm khia hi. Laigelh a lunglut tawntung khat na hi hiam? Laibu bawl ning ci in bang hun pan in hanciam na hiam?  Hih na laibu bawlna leh zuakna pan in bang sinkhiat, phawk thak na nei a – Zomite in laisim minam ahi hiam?Dr Hau Za Cin: Gamdang ah nasem in ka pai ciangin nasep hong olzaw in, computer hong kicing a, ‘e he, ka pa Khup Za Go in laibu bawlbawl a kei zong hih lai pan hanciam leng piang thei ding hi,’ ciin ka ngaihsutna panKa Laikung Panin cih hong piangkhia hi.

Tan sawm ka hih lai pan laigelh ka kipan zo a, kei khom in a lunglut ka kisa hi. Ahi zongin diehzah in ka gelh zo nai kei hi.

Hih laibu bawlna pan in ka phawk khak thuthak pawlkhat om hi.

1). Zomi te in laisim hahkat zo taktak lo hi.
2). Zomi te tha kipia lo in, ki el, ki dem, ki haza, kiko bawl zaw hiam ka ci hi.
3). Zolai a lunglut taktak mi tampi kisam lai a, tua ahih kei leh Zolai, Zomi leh Zogam pen history suak pah ding hi.
4). Zomi leh Zomi kipahtawi siam zo nailo i hi hiam cih khawng hong phawksak hi.

Vaphual: Na laigelhte I sim ciang in Zomi sung thu-le-la, khanglui thute leh khangthak thute hi ta leh na theih mahmah na kilang hi.  Nang lah Zomite tawm mahmah na Mizoram pan na hi hi.  Koi pan thu kan a, koi ci theih na hi hiam?  Bang hang in Zomi thangthu leh Zomite thute theih kisam sa na hiam?

Dr Hau Za Cin: Zomi thu pen ka hih theih zah in ka kan a, ahi zongin History ka lunglut lo in, philosophy leh career ka lunglut zaw ahih manin Zomi thu kigelhna laibu khempeuh ka simsuak nai kei hi. Ahi zongin Zomi in bang maban nei lai, bang matut ding nei lai, bang kisam cihte ngaihsut leh pulak pen ka lunglut lam hizaw hi.

Mihing khat i hih ciangin i kipatna theih kisam hi. Zomi na hih leh Zomi thu na theih kisam hi.

Vaphaul: Leitung mun tuamtuam ah Zomite omna khua leh tuite ah na va zin koikoi a, Zomite nuntak zia leh khuamuhna a tel ding khat in kong um hi.  Na muhna ah India Zomite leh gam tuamtuam a teng Zomite nuntak zia leh khuamuhna bang ci na sa hiam?  Zomite a tangpi in khuamuhna bang ci na sa a, Zomi society inclusive na sa hiam or exclusive hiam?

Dr Hau Za Cin: Gam tuamtuam ah Zomi omna ka zin khak hampha ka kisa hi. A diak in gamthak tung Zomi lak bang lunglut huai sem hi.

India leh gamdang Zomi tawh kisai ah, India Zomi pen a thutheihna uh international mahmah a, ahi zongin neih leh lam haulo, sum leh pai neilo ahih manin a theihzah in a pilna uh zang theilo tawh kibang hi. Gamdang tungZomi te in India gam Zomi te theihna ciang a bat pak loh hangin tuzawh kum 5 sungin hong makhelh khin man dingin ka um hi.

Ahi zongin khangluite in, ‘Ui mei kawisa kawi veve’ a cih uh mah bangin i ngaihsutzia pawlkhat a kawi veve nawnlo dinga i tangsak sawm tentan ding honkhat om dingin ka um hi.

Zomi society pen mi huai kisiam lo hiam cih khawng ka ngaihsun hi. Khua khat, kuam khat khawng bek i ngaihsutna in huapsak kha ihi tam aw cih khawng ka ngaihsun hi. Tua bang i hih leh bel Zomi pen gamkek hetlo hi ding cihna hi.

Vaphual: Zomite in minam khantohna (progress and development) ding i gen ciang in kipumkhatna (unity) kisam masa kici tawntung hi. Tua i cih ciang Zomite tulaitak kipumkhat lo cihna hi mawk hi.  Maan na sa hiam?  Kipumkhatna i gen leuleu ciang in uniformity (ngeina kibang, biakna kibang, lai kibang, kampau kibang, etc) kideih hi leh kilawm ka sa hi.  Pluralistic society (ngeina kibang lo, biakna kibang lo, lai kibang lo, kampau kibang lo, etc) tawh Zomite kalsuan zaw lehang khantohna leh i khuamuhna zong zai zaw lo ding hiam?

Dr Hau Za Cin: Zomi te’n kipumkhat na ding i sep masak pen ding hi den lai mawk hi. Sem khin manlo in mi kawmkal ah i mangthang khak ding ka lau hi!

Eima thu ciat i deih den lai pen i khantohna sang nailo, i khuamuhna toi lua lai, i theih thute tawta (local) lualai cihna hi a, a taktak in ci leng i deih zong a thei nailo hi leng kilawm hi. Uniformity maw, pluralism maw… i zuih zawk ding a tel nailo hi hang!

Tua ahih manin Zomi mangpha a khak masasa a khuamuhna a manlang ding tawh kibang hi. Ahang pen a khangto nuam khat in gamtatna ding kuam kicing neilo a kuak neucik sunga kikhum den utlo uh hi. Zomi, Zolai, Zopau, Zongeina mangngilh a namdang pau leh ngeina a thei masa leh a pomsuak vet te Zomi sung pan zong a khuamuhna leh a khantohna a manlang pen ding tawh kibang hi (ama mimal nuntakna ah); ahi zongin tua bang piang hi leh Zomi leh Zogam liangvai semsem ding hi.

Vaphual: Vaphual – Zomi News & Online Magazine min in, hun nong piak man leh thu manpha tampi nong hawp man in lungdam kong ko hi.

Dr Hau Za Cin: Kei zong ka lungdam.

 


Comments




Leave a Reply

    Categories

    All
    Dr. Leo Mang Cin Hau
    Interview

    Archives

    January 2015
    September 2014
    August 2014
    August 2012
    July 2012
    June 2012
    May 2012
    February 2012
    January 2012