WWW.TUNGZANGNEWS.COM

 
Dr.Levi Sap Nei Thang tawh Interview

Kachin Independence Army (KIA) leh Kawlgam kumpite kikal ah kum 17 sung tawntung kilemna om khin hi na pi'n, abeisa kha 10 lai akipan Kawlgam galkapte' in Kachin gam sungah Kachin mite abawlsiatna hangin, kidona nasiatak hong piang kik a, tuni ciang dong nisim phialin kikapna khauhpai semsem ahi hi.  Tua kidonna hangin mawhna nei lo Kachin mihonpite inn le lo nusia in gamsung ah galtai dongtuak (Refugees) in mipi a tul a then asim in om uh hi. Tua bang a dongtuak a om Kachin mipite pen Kawlgam sung le gam pua pan minam tuamtuam le ei Zomi min pua in WZC in panpihna kipia hi. Tua bek tham loin, NLD ,NGO tuamtuam le USA, UNO cihte akipan leitung bupphial in lainatpih in huhna kipia ziahziah hi.

Tua banah adiakdiak Zomi (Chin) minam sung pan leitungbup huam a Pasian thupha piak khat ahi NGO mihau khat ahi  " I Love Myanmar " pan makaipinu Dr. Daw Levi Sap Nei Thang in a ma pumpi mahmah tawh Kachin dongtuakte' phualpi ( Refugee Camp) ah va pai-in, huhna tampi piakhia cih kiza hi. Hih bangin i sanggam Kachin dongtuakte ahuhna hangin, Zomi (Chin) minamte le Kachin miinamte Unau i hihna kitheikhiasak semsem hi ci in, Kachin mipite in pulak uh ci hi. Tua bek tham loin " I Love Myanmar " te pen Kawlgam sungah Kumpite zahtak tham dingin nasemkhia bek tham loin, leitung gam tuamtuam tuahsiatna khat peuhpeuh a om ciangin, huhna apiakhia den kipawlna khat hi-in, UNO nangawn in a theih le a zahtak khat ahi hi.

I Love Myanmar te in minam,biakna deidan het loin, adiakdiak in a pianna Kawlgam le Zogam (Chin State) khantohna ding nasemte panpih in huhna piakhia den uh hi. Tulaitak in zong Zogam, Tedim gam sungah Coffee , Niangteh, Dol singkung akipan singno tuamtuam tawh Zogam apuahsan laitak ahi hi. A diakdiak in abeisa 2008 kum Nargis Cyclone huihpi hang a Irrawaddy Province sungah gentheih thuak Kawl mite inn le lo, sanginn lamsak in nuntak zonna ahi Gunkuang kisiate bawlsak in tuni dong huhna pia uh hi. Kumpi khat nasepna sangin a thupizaw phial semzo ahih manin, Kawlgam kumpi in zahtakk mahmah uh hi.

Tua hi-in,  I Love Myanmar makaipinu Dr. Daw Levi Sap Nei Thang in Kachin galtai dongtuakte phualpi ah vapai ngiat in huhna a puakna tawh kisai-in Khonumthung News Group te in holimpihna ( Interview) anuai abangin bawlpih uh hi.

KNT = Khonumthung & ILM = I Love Myanmar

KNT :  Kachin galtai dongtuakte phualpi ( Refugees Camp) ah bang hunin vapai a, bang tanvei va tam cih nong gen thei diam?
ILM  : April 4,5 nite in Kachin galtaite phual (Refugee Camp) akigawm mun 15 kong tung man hi.Kawlgam Kumpi te Ministry of Social Welfare te i hongsap   (invite) na leh hong vaihawmsak nate hang atung theih ka hi hi ci hi. Kachin gam tawh kisai,kizoppih ding mi neihlo leh kua te tungtawn pan nasem khawm leh huhna piakhia ding cih,theilo hi ingh. Tua hang(Ministry of Social Welfare)te i hongsapna te thaklat thumah in,kasangpah hi.Ministry Department pan a milian (Officers) te in Kachin State sung dong hong puakuh ahi hi.Kachin gam tawh zong kimutuahna leh kikupna, holimnate kaneih khawm uh hi.

KNT :   Koihlai teng a om galtai dongtuah te (Camp) te vapai thei nahia?

ILM :    Myitkyina,Luai Hmaw khua kim khuapam tawh kinai na om,Refugee camp te vatung thei-ingh.KIA te'n a khutsung
           a aletcipna zawdeuh uh,gam a om munte ah katungzo kei uh hi.Tu a katun masaknate in Pasian thu-umte
           Biakinn huang sung a mitampitak te aomkhawm namun te ahi Biakinn (Church)15 te i huang sung te ah katung uh hi.
           Kawl biakna phongyi sang khat bek ah dongtuah(Refugees) te(Camp)khat bek kikoih hi.

(KNT)   Kachin dongtuah (Refugee camp)te napainopna thu le natup,nanimna thute nong gen theih diam?

(ILM)    Ka pai sawm hun apan,inn le lo tana opnading neihlo mite,i innmun te ah inn thak lamsak sawm a pai hing.

(KNT)   Tua te a ding Sayama pinu (or) I Love Myanmar min tawh bangteng hongbawl khia khin na hiam?

(ILM)     Keitung pan Kawlgam huhna kapiakkhitsa peuhmah,I Love Myanmar min beh tawh akhatveihna ading in
            inn100 lamsak ding cih gelna le ngaihsutna neih ingh.

(KNT)   Inn100 tak lamsak ding nacih ciang bang inn namte ahi diam?

(ILM)   A inn danding simple omkhinta,Sikkang inn,Bitlatmee(Cement)kiphah, Sing tawh kium,azaina 24'by24'

(KNT)   Tua innte lamnading in kuateng in tavuan neih a aptheih ding nahiam?Kachin State kumpite maw?

(ILM)   (Ministry of Social Welfare)te in,lamlahna le huhna tampitak hong pia uh hi.Ken kuamah meltheih neihlo in tu
          ciang dong mah amauh huhna tawh asemtheih bek hi-ingh.A kisam teng ah zong honghuh le hong panpih laiding 
          in zong lamen ingh.Nargis hunlai a kasepbang a inn neihding te khutsung ah amanma asum khempeuh apziau 
          cih dan bawlnawnlo in keima mah in aman dong etciknopna te neih ingh.Inn kalam sak khit hang in amauh kisap 
          nasep silbawlna ahi sumzian ding bawlsak lai leh innkuan sung vai naupang te sangkah theih nading cihte dong 
          ngaihsutsak kul lai hi.Nargis lai kapiak sum tamlua ahih manin,kiciantak kiencih zolokha hong suak ahi hi.
        
(KNT)  Innte Kachin State koih lai munteng ah,lamsak sawm nahia?

(ILM)   Myitkyina leh Wai Hmaw khua kim teng ah.

(KNT)  Tu bang a Kachin ih Unau te haksat le dongtuah nate namuh teh bang cibang in ngaihsutna neih nahia?

(ILM)   Khuahun siatna thuak a tuaksia te tawh bel kibanglo hi.Khuahun hang hileh apatna pan kipan atawp dong ki
          huh thei in,gal leh sa hang a galtai te nakhempeuh avekpi in sumkhin nailo a pawlkhat te akhua uh ciak kik 
          nuam in ciak ngam nailo in omuh hi.Inn a anusiat uh akhawisa aganhing te uh Kawlgalkap te in neksakin beita
          cih uh hi.Khamlo te bel kikhokik theih lai sam inteh ci'n agen uh ciang kalung nuamtheihlo hi.Khuabup a
          meitawh kihalsak ahih ciang a inn neih nawnlo te inn a agankhawisa beite,lokhawk nading neih lo te khem
          peuh inn kalamsak ban ah,alo bawl theih nading ciang dong uh kavaihawm sak khin hi.

(KNT)  Tulaitak Kachin galtai dongtuah (Refugees) bangzah bang apha tam?

(ILM)   Tul 70,000 val bang pha in teh 

(KNT)  Galtaite i tulaitak aomdan te uh nong gen thei diam?Genteh na Bangcidan a om,annek-tuidawndan,Laisin theihna
          lam bang cibang haksatnate thuak cihdan teng khawng e?

(ILM)   Galtai te i tulaitak aomdan lian uh,Akilam tawm bukno te ah om uhin, tua bukte biakinn (Church) huang pi sung
          a kilam tampen hi.Leitang a awng tam lai,pawlkhat apang cipeh(gua) leh atung sikkangte,pawl khat te Plastic,
          atung le apang palastic tawh kilam zong om, guah tui kia leh bel baih hetloding,guah zu leh avek pi akawt gawpin,
          buk-inn pawlkhat UN te lamsak zong tampi mah naomin,Mipi lampan abawlsak uh khatzong om kei,acillai hih bukte 
          tampitak akisap mahmah lai theih kha lengbel kei zong kabawlsak nuam hi.Mihonpi omtheihna buk-inn alianpiante
          kyats tengh 50 bangbek bei thei hi.

          Annek tuidawn bel UN,World Food Program pan in,Antang Sathau,Ci,Be leh thaneihtheihna vui(Powder)cihte pia uh hi.
          Apulam pan huhna apia omlo hi.An leh a ding bel lungkham omloin,pilna sin nading lam ah tuciang dong mah 
          sangte kihong zonai loin,kikhak cip lai hi.


Source : Khonumthung News Group

 


Comments




Leave a Reply

    Categories

    All
    Dr. Leo Mang Cin Hau
    Interview

    Archives

    January 2015
    September 2014
    August 2014
    August 2012
    July 2012
    June 2012
    May 2012
    February 2012
    January 2012