WWW.TUNGZANGNEWS.COM

 
Picture

Kawl galkap leh asawltak BGF te'n DKBA t'e thau lawng 30 a guksimsakte uh piakkik dingin DKBA in angetna uh pen Myanmarian Army in, piakik nuam lo uh ahihmanin, DKBA in Ceasefire pen amaulam pan beisak uh ci in, Febuary 22,2012 ni in DKBA thupulak Major San Aung in gen hi. Febuary 22 ni in Karen State khawpi Pa-Ann ah DKBA pan Pu Maung Lay leh M.A pan Maung Maung Onn te kiho uh a, thau lawng 30 te piakik lo ding ci in, Maung Maung Onn in nial ahihmanin, DKBA in zong Ceasefire abeita hi ci in puangkhia pah uh hi. Zomi Independence Army pan Tg Mang in a genna ah, "Kawlte tawh kikap kik ding dinmun ah om ahihmanin, ko ZIA zong zingciang kakuan ding uh hi."ci in gen hi.

Tutung a buai hong kipatna pen Pa-an District sunga DKBA phualpi Myainggyi Ngoo a thau lawng 30 , Kawlgalkap leh asawltak uh BGF pawl in, nagusim uh a, tua thu tawh kisai Febuary 22 ni in Pa-an ah genkhawm uh hi. Tua genkhawmna ah BGF in piakkik ding thukim napi, Myanmar Army palai Maung Maung On utlo hi. Tua hanga DKBA in Hiamkham nusia ahihi. "Tua ka galvante uh pen Kawlgalkapte hong piaksa uh hilo a, DKBA in hanciam a kileite ahihi. Tua ahihmanin Ceasefire khawlna pen DKBA bup kithukima tawh ka khawl uh ahihi." ci in DKBA Major San Aung in gen hi.

DKBA leh Kawlgalakap pen abeisa kha 3 a kipan ceasefire nei uh ahihi. Tua ceasefire kithukimna aneih lai un zong, DKBA thupulak Major San Aung in " Hih Ceasefire pan ngahkhiat ding bangmah omlo hi, kilem ni hong ci uh a, ut kei leng leitung in, hong muhkhialh ding kilau hi lel hi." ci in gen ngei hi. DKBA pen nidang in 7000 val pha uh a, 2008 Constitution pom 3000 valte Kawlgalkap nuai ah Dainawlcing (Border Guard Force) in lut uh a, 4000 val utlo in DKBA min tawh dosuak in 2010 kiteelna kibawl ni a kipan kawlte kapkik uh hi. Nung kha 3 sawt a pan ceasefire anei kik uh ahihi.


Source: Pu Zokhup
 


Comments




Leave a Reply