WWW.TUNGZANGNEWS.COM

 
Dr Chin Do Kham pen si le sa ka kinaipih zong hi peuhmah lo, ka khuapih cih thadah ka khua veng zong hi kei. Amah Hat Lang beh hi in kei Ngai Te beh ka hi a, beh le phung kizopna ,ki mematna dan om het lo hi. Zomi leh Zeisu sung ah anau pianpih laizom bang a hong it hong vei khat a hih man in hong nusiat ciang in ka khitui malte in thu gen hi. Dr Chin Do Kham hang in dahna kahna lainatna khitui tampi luang in, Zogam aksipi; Mikang mivomte le leitungbup in hong pahtakpih khat in hong nusiat ciang in amah ka ngaihna leh Zomi buppi i supna khat ahih na hang in kadip ngek na in kuama hehnep lohpi in keima tumtak in ka dah mahmah hi. HOng nusiat ni zingsang in sihkohna bekbek phone hong pai ni loh a, tua ni zingsang in N Okala , le N Dagon lam ka pai laitak ahih man in sanggam pa Sia Peter Mangpu ( Dr Kham te unau nautumpen ) kiang ah ka delh pah thei kei hi.

Ka pawlpi upa pa Olive Pa Mung " Suan Lian Mung" in ka dah ka kah ding mah hong theihpih ahih man in phone hong set a, na inn ah hong hawh phei ning hong cih ciang in kei ka inn ah om man kei ning Dr Kham' naute omna Alone ah pai ding hing, kei man hong zawn zaw ning ci in ka upa pa zawn in ka pai khawm uh hi. Sia Peter Mangpu te kiang ka tun uh ciang in alawmnu Siama Siannu zato ah na ki at sawnsawn ahih man in lungnopmawhna hong khang semsem hi. Sia Vum Nang le Sia Peter Mangpu te unau leh lengla pawlkhat tawh tawmvei tukhawm in, cihna mel ding thei lo in thungetsak in ka ciah kik uh hi.

KA PHAWK PHAT DIAK NA ATOM IN

1997 kum in Dr Chin Do Kham, Sia Khai Suan , Dr Thuam Khan Thang, leh Dr Chin Khua Kham te Zogam khuapi Hakha ah hong zin in gamvan in hong pai uh hi. Hakha AG biakinn pi ah Dr Chin Do Kham in hun zang ding cih za ka hih man un ka sunglam lawp mahmah na khat hong om hi. Nipi ni zingsang siapi te nohset ding in Hakha AG biakinn ah ka pai to a sia Khai Suan leh Sia Dr Thuam in mei lum na awi uh a, kei zong amau kiang ka tu phei hi. Sia inn phaitam lam pan Dr Chin Khua Kham hong lut phei in dam maw sia Kham ci in a khut ka len a, Dr Chin Khua Kham in, kei Dr Do Kham hi keng ei ci in amah leh amah hong ki meihset hi. A den deuh ciang in Dr Chin Do Kham hong lut leuleu a, a khut ka let leh nang kua na hia hong cih ma in Sia Khai Suan in sanggampa pen khanlawhna la i gam sung a lok mahmah THUMAN PUANPI phuakpa hi ci in mel kitheihna hong bawl phet lian leh Dr Kham in alungtang khempeuh kei hongpia tawh kibang liang in it mahmah na nuih mai hong pia in ama geiteek teek ah hong tusak in tawm vei ka ho lim uh a, nipi kikhop hunta a hih man in Hakha AG biakinnpi sung ah ka lut uh hi. A thugente zaknop kisa in khitui naptui luang in mipi te ki-ap ziahziah uhhi.

Hakha AG biakinn pi pan kikhop ka man uh ciang in Ciimnuai (CCF) biakinn ah hun zang ding ahih man in CCF biak inn ah ka tai suk henhan leuleu uh hi. CCF a hun zat khitteh Mikang hun bawlna ah hunzang a paipah lianding ahih man in pawlpi mite niangtui awm nangawn tu lo liang ( din kawm ) in ka hawp uh hi. Tua hun laitak in CCF te in keyboard ngah na ding thu a ngetnget laitak uh a hihi. CCF biakinn tual ah mipi 200 kiim ding kawm sa in niang tui ki hawp , ki ho kician mel zong om thei lo, mipi hi sesu Sia te hopih nuam tuamtuam mah bang mah tam in ki hi hehu kawmkal ah la tomno " thupha hong pia hen thupha hong pia hen , Topa inthupha hong pia hen" cih la ka sak pih ngeingai a, siapi te lam ah ka khut uh ka vaan ngeingai uh hi. Vial nih khawng ka lumlet uh teh Thupha hong pia hen cih lamal pen" KO KEYBORD DEIH UNG , KO KEYBORD DEIH UNG , TOPA IN THUPHA HONG PIA HEN " cih in ka sa ziahziah uh a, pawl khat bang khitui luang liang in nui uh hi. Ko keybord deih ung cih la sak ka man uh ciang in Sia Khai Suan in TUN KAP TAKTAK TA EI, ci hi. Mikang pau tawh mun khat ah hun zatna ding omlai siapi te manlah lua ahhih man in Dr Chin Do Kham in Keybord bel hong pua het kei ve ung in ahih zong Yangon ka tunteh hong khak ning cih tawh ki khen bawl in Methodist te biak inn ah mikang pau tawh hun zang ding in ki paito ngeingai leuleu hi. Yangon a tun sukkik phet in Keybord hoih mahmah khat hong khak to pah a CCF Ciimnuai te in amasa pen Keybord hoih aneihna uh hong suak hi.

Hih nitomno sung in Dr Kham in keimah David Kham pen it cipi in hong it in a ang a tawi theih bang hi leng nautawi in hong tawi nuam , hong namnam nuam liang zah dong in (akineih hi hetlo ) sunglam itna tawh hong it in hong hopihpih hi. Ciim nuai innkuan te in zong aam bawl in kikholh pih nuam uh ahih man in zing khat Zomi ulian eimi Mazada teng khempeuh leh Zomi te bus ( hmanlong ) teng khempeuh kaikhawm in mawtaw vekpi 30 sang tamzaw tuang in CCF pawlpi bup in Siapite vakpih in Hakha khuapi pan agal khat Keplo Mual dong vak pih in VIP te sang nasia zaw tham in ki pahtawi in Capt. Keplo mual zang ah zolamvui sai in Dr Chin Do Kham pen lailen tawn kiaukiau bang in hong lam kiaukiau pen kuama ciat cimul hik tho sak mahmah hi. Dr Chin Do Kham i Zo Papi lam kiaukiau pen Hakha a om Ciimnuai innkuan pawlpi te mitkha ah mang thei lo ngei loding hi.

Capt. Keplo Mual pan in Hakha khua pi lam ka ciah kik uh a Bus (Hmanlong ) VIP tutna ah Dr Chin Do Kham in kei mah tektek hong tutpih in kuama dang tawh ki ho lo liang in keimah bek hong lunglut in hong holim pih hi. Na khua koi teng hi a, na nute na pate koi ah om?Bang vision nei na hiam ? Kumpi nasep nuam na sa hiam ? Zi nei zo maw nei nai lo? cih khawng hong dong dong a kei zong tangval pi ka hih tawh genloh phamawh a hih man in hong dot peuhpeuh ka dawng hi. Ka ho limna sung uh ah bang vision nei na hiam cih pen ka dawn ding nuam ka sak pen hi a, ka vision teng ka gengen leh lungdamlua ahihman in tua ahih leh kumpi nasep khawl in Pasian nasep sawm takpi na hiam ci in hong dong hi. Pasian nasep ahamsat zia te zong hong genpih in ka lungsim hong ze-et hi. Ka kipiakna leh ka veina te hong theihpih ciang in laisiangtho sang kah a Pasiannasep ding hong deihsak ahih man in sangkah na ding akisam sumlepai khempeuh keima mawhpuak hi hen. Nang zong nakpitak in na ki-ap toto in. Maikum sang hon ciang kah lian theih ding inhong vaihawm ning hong ci hi. Dr Chin Do Kham kiang pan hih thu manpha ka zak khit ciang in kei zong 1998 kum April kha in ka kumpi nasepna Hakha khuapi nusia in Yangon lam pai ta ding ka hih man in ka pianna Buan khua a om ka Pa Thual Zam leh ka nu Do Khua Nuam te tung ah ka vai teng kuppih in nule pa phalna ka ngah khit ciang in Yangon manawh in sang a kah ding in ka ki thawi ta hi.

Yangon khuapi ah ka sangkah sung kum nga vilvel sum lepai sapna om lo zah dong in hong huh hong panpih Dr Chin Do Kham pen kei a ding in akimu thei ka leitung pasian a hi a, ka pianna nule pa lo buang ding in hi zah a hong angvanna te ka ngaihsut ciang in Pasian a itna leh Zomite hong veina , ama neek awl taak awl a mibansam mi lenliang , mi genthei teng ahuhna , te phawk kawm in Dr Chin Do Kham' nusiat azi atate , asanggam laizomte leh atu atate khempeuh leh Zomi adah akapte i khuitui malte khem peuh i gawm khopna in hih lai malte hong gelh khia ing. TOPA IN ADAH A KAPTENG KHEMPEUH AMA KHA SIANGTHO TAWH HONG OM KHAWM SAK HEN LA HEHNEPNA SANGPEN HONG PIA CIAT TA HEN.

Dr Chin Do Kham a itte khempeuh sung tawh adah khawm ;
David Kham
Pastor , Olive Christian Church , Yangon

 


Comments




Leave a Reply