WWW.TUNGZANGNEWS.COM

 
   Sia Rev. Dr. Chin Do Kham hong nusiatna huhau in dahna khasiat hong suah khit teh thu tampi ka ngaihsutna ah hong lut daudau hi. Ki khanngualkhat ka hih hangun a ki tamthuah hetlo pawltak ka hi ding uh hi. Ahi zongin ka nuntakna ah ka etteh mahmah mikhat hi-a amah hangin milak-ah ka angtan tuamna zong tampi om hi. 
     Zeisu sihna hangin ei bangmah ahi hetlo leitung mimawhte in mawhna maangpa Satan khutsungpan suahtakna i ngah mahbangin, Zeisu thu-um nungzui taktak khat sihna (bangbangin a si zongin) hangin tua thu-um mi Pasian misiangtho khat sihna hangin mawhnei leitung mite sungah Pasian in thukhat teitei hong na genin Pasian Khasiangtho tawh kipawl thuhilhna lamlahna khat teitei hong na geelsak hamtang ahi hi.
     Khatvei Kawlgam laisinna tawh kisai ahoihna leh a hoihlohna ka genkhopna uah, khat in Sia Do Kham min lo-in Kawlgamah tan 10 zong hoihtak beeka ong zolo bangmah thupi kasakna om kei hong ci dihdih ahih manin, tua munah Sia Do Kham pen bangbang hi leh leitunga sanghoih minthangte mahpan hoihtakin pilsinna hong zo ahih manin Kawlgam pan a khuak hoihlo pawl-ah a kiciamteh kha phial zongin leitung khuakhoihte lakah ngualzo ahih manin, Kawlgam pilsinna ah a kisam om hizaw ding hi cih ngaihsutna hong nei sak hi. Tua in i khankhiatna gam leh leitung gamkhangto sate ii ki-uk kimakaihna pilsinna nekzonna a kikaihzia a kilamdan zia hong musak hi. 
     Ka sangkahna munkhat-ah ama roommate ka siapa Rev. Dr. Bara Shing in, ka sangkahpih no mite khat Rev. Dr. Chin Do Kham pen citakin lungsim kuhkal mahmah, hanciam thei mahmah-a, tupna lianpi zong nei hi. Zomi hi. Ka zahtak mikhat hi.- ci-in Sia Do Kham hangin kei zong hong it tuam mahmah a, lawm hoih khat hong muh sak ahi hi.
     Norway gam Trondheim khuapi ah tuma kum nih lai-in hong hawh aa, Bethel International Service pan Pasian na kaseppih pastor teng leh upa makai teng ii kha khat khatvei thu ka ngetkhopna uah hong na kimuhpih aa, tawmvei tak eipau tawh nuamtakin kiho-in khut kilen kawmin thu ka kingetsak tuak uh hi. Hun ngah tamlo manmawh kisa tuak ka hih manun hong angtanpih mahmah ingh ei... Topan thupha hong pia hen! ki cikawm-in ka kikhen uh tu-in leitung a ding a kikhen suaksuak ka hi uh hi. Amah tawh ka kimuh tua ni tektek mahin, tuiphum biakinn-a ka thungetpih Norway putek kum 83 mikhat hong si-a, a luang kivuina ding vai khempeuh leh ama mission nasep maban ahi Russia gam leh Africa gam a tagah a vakte vai ka vaanpih kul ahih manin, Zomite hong ki muhpihna hun ah zong a kimu thei nonlo suaksuak ka hi uh hi. Ahi zongin tunung diak mahmahin, thu hong na ngetpih un, kei zong kong pai baih kha dinga, khatvei peuhmah kimuhkhop thungetkhop sawm teitei ni cih kam hong vaikhakna hong kihilh sawn ciangin thungetna zong ka neihpih hi. Ama taangthu ka zakna tungtawn in ka nuntakna ah etteh-a ka na zat tampi om aa, haksatna ka tuah ciangin hong thakhauhsak ka etteh mahmah mi khat ahi hi. 
     Pasian in Ama na a sepsak Sia pa sihna pen lunglen khuangaihna khitui luanna suaksak lo-in, mitampi kilamthakna leh Pasian Khasiangtho nasepna Zogam Zomi sungah hong tunna hisak henla, a nusiat a zi a ta, a u anau, a sung a pu, a khua a tui a it a ngaih khempeuh tungah Khasiangtho uapna hehnepna, lamlahna leh ngualzawhpihna, maatutna lianpi hong pianna suaksak zaw ta hen ci-in,... ama luangvai, innvai lovai, sepding maaban omlai khempeuh nawngkai nawkkhakna omlo siangtho taka a kizawh siang theihna dingin Zeisu Khrist min tawh thungen in,..... 

Pasian Gam leh minam a ding thungetna tawh hong phawk,
Rev. Solomon Thawn (Sia Thang Khan Thawn Suante)
Norway   
             
 


Comments




Leave a Reply