WWW.TUNGZANGNEWS.COM

 
Mimal thuzaakna-pan pulaakna: 

Tu ziingsang saangpai laaitak Melbourne-a ateeng Tg. Daalkhek-in phone hong sam-a, "Sia Do Kham-in hong nusia cive-aw," hong cihvat ciang-in ka' diipkua-in, umlah umngam paklo-in, "Kician-maw?" ci-in ka'dotkiik hang-in "kiciattuak mahmah" hongci-a, lecture leh tutorial hunsung suun thapaai-in ka' lungsim-ah professor te' thugen luut vetlo-in, thaneemna lianpi ka' thuak-hi.

Mimal Kipulaakna:

Dr. Chin Do Kham-pen cilehsa lam-ah Haatlangh' Tapa hi-a, ka' kinaai kei-hi. Khua-in cileng Saaipi Mual hi-a, ka' kigamla-hi. Ahizong-in minam uplehsaanna-ah adiak-in Zomi cih huamna leh veina lamsang-ah kei' uplehsaanna-tawh akibang saanna leh sepna anei ka' Thallohpipa ahihziak-in ama' tung-ah aminsial ka-hihi.


Haatlangh' Tapa Chin Do Kham; 

Zomi' Angtanna (The Pride of Zomi), 
Zomi minamvaai Kalsuanna' Meivaak (the Light of Zomist Movement), 
Kiniamkhiatna Pasal (Man of Humility)
Nang hongki pahtawi-hi (You are Honoured).

Amaaipha na' zonzon Pasian' kiang-ah nong' ciahsan kuamah-in hongkhaam theilo-hi, ahizong-in na' minamte-in naakpi-in dah-in lungzuang uhhi. 

Na' zii na' tate muanhuai khinzo mahleh na' mipihte muanhuai naailo kimlaai nong' paisan-pen pulaak theihloh lungziinna honglawh-hi.

Lungnuam-in Pasian' kiang nana zuan ta-in. Na' pumpi taksa-in nong' nusiat hang-in na' khutma, na' khemate na' minam sung leh namdang sung nangawn-ah thaamden dinghi. 

Adiak-in nangma' uplehsaanna Zomism akitatsat loding-in kana' zomto ding-uhhi, lungnuam tak-in pai ta-in!

Zomi sung-ah na' uplehsaanna kisuut dending-a, "Zomi" cih abei mateng na' min bei ngeilo dinghi.

Minam vaai-a ka' Zuapa-aw, laailung muang-in Thangvaanzawl tuang vatung-in! Sinlaai thee-bang hawm-in, naubang kahna luankhi nang' ading-in lung ka-siit lo-e. Ka' luankhi thulguahbang aluan' hang'n buanbang nuul mawh'ng-e, Meitei guun-tawh ka' luangkhawm sak-e!


Lungzuansial bek-hilo, dahcipna sung-ah (Not merely in mourning but in Grief),

Zokhai


Suutkiikna:

Kiniamkhiatna Pasal (Man of Humility) ka' cih-pen apumphat ka-hi kei-hi. Dr..pa bang-in agamleek, amadawk, alawhcing, civilisation sung-ah athuukluut, atualbial mi khat hi kimlaai, bangmahlo Zomi khat maimai leltak nangawn paampaih lo-in, amah agensiasiate nangawn hopihsiam, nuakbawl selo, lawmbawl ziauziau veve mi-pen kiniamkhiatna taktak ahihi. 

Keimah-tawh kaalthu nangawn-ah, hunkhat laai-in minam-vaai kitelkhialhna ziak-in Australia hongpai masak (kei' tunzawh) laai-in Pastor Gin Do Daal-tawh honghawh uh-a, limci tak-in kana muak hetkei-hi. Hongpai kiik ciang-in hongpelh tuanlo-in hongpai-in thungetna hong neihsak teeiteei-a, ama' tung-ah ka' muhna hong kidang mahmah-hi. Anunungpen zaandiak-a hongpai ciang-in ziing-an hongne-a, "Zokhai, kong' pai masak laai-ate' sang-in hong itzaw-ta na-hihiam? Nong' itzaw takpi-hiam? Hong muang zawdeuhta na-hihiam?" hongci ngiatngiat-a, tuateng tuni suun thapaai ka' bil sung-ah kithawn dumdum-in, ka' gilpi hawm heehaa-hi. Hihbang mi-kiniamkhiat Zomi sung-ah ka'mu ngeikei-hi. Thupi ka' sakna sang-in ka' itna lianzaw tham-hi.

Akhialhna "khial-ing," aci-ngam, maaitang zahtaak neilo-a, thumaan agen setset mi, khialh asakte-zong hawi tuamlo-in agen sukpah lianlian mi-pen "Kiniamkhiatna Maantak" ahihi. Tua man-in Man of Humility aci kahihi. Zomi ataangpi bangmah theilo, bangmah hilo pipi akiphasak liauluaute-tawh ka' etkaak ciang-in Dr..pa ka' itna naakpi-a akhansaan laaitak, ka' Tung Suunni-in Mual hong liamsan-a, "Taikhua ka' vaal zodiam???" ci-in laaidiip neem-in duangvul tang-e.

The Light of Zomi Movement: Ama' mapanna kipawlna leh kipawlna tuamtuamte leh minphatna tuamtuamte thupi-in ka' seh hetkei-a, minam-vaai Ama' uplehsaanna leh akalsuanna Zomi buppi sung-ah athupipen-in ka' seh-hi, banghanghiam cihleh ulian dangdangte-in Zomi acih ciang-in taksa leh lungsim-tawh huamzawh lohpi leitang zaapi huam zeel-a, Dr..pa ahihleh "Kampheen kuullo, Zomi akiciteng" huam-in abulpi nasepna apankhia-pa Chinism-zong alangdo tuanlo, Zomist Pasalpha ahihi.

Silehsa leh ama' mimal taangthu ahihleh innteek lampan-in hongki pulaakding kana ngaak dinghi.

Dr .Chin Do Kham' ading-in Lungzuanla leh Laainatna la khatpeuh phuak manlo ka-hih man-in ka' Pianna Pa-in hong nusiat-a ka' lungzuansialna la-pen Amahzong ka' pia-hi. Angai-man I-omleh!
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                     
 


Comments




Leave a Reply