WWW.TUNGZANGNEWS.COM

 
Picture
Dr. Do Kham' Lungsim Limlang Pawlkhat
Dr. Do Kham' Lungsim Limlang Pawlkhat

Last Updated on Wednesday, 23 October 2013 15:18 Written by Tongsan Admin Wednesday, 23 October 2013 15:10

Hong Nusia khin Dr. Do Kham' tung pan Lungsim Limlang (Some Reflections on the Home Coming of Rev. Dr. Chin Do Kham)Dr. Do Kham zahin apil dang omkha thei mah inteh. Ahi zongin amah zahin ‘avei’ mi tawm ding hi. Amah zahin ‘avei’ mi omkha thei mah inteh. Ahi zongin amah zahin ‘asem’ mi tawm kha ding hi. Ahi zongin ama’ tungtang ah, ‘I gamvai, minam vai avei te in pilna i it theih ding, i pilna neite in i gam le minam i it theihding, le i sepkhiat takpi ding,’ hong masawn hi, ci in i-um hi. Mikang kamhoih khatah, ‘Haksatna(crisis) in makai hoih piangsak thei hi,’ ci bilbel hi. I minam in akisap mahmah tu-abang hunah Sia Do Kham bangin apil, avei le asemkhia takpi makai le khangno tampi i kisam hi. Ahi zongin mikhat ahih keileh nakhatpeuh aomloh taktakteh a Manphatna i phawkpen azekai luadiam, ci in lungngai khazeel ingh. (Genbehna. Khelkhel ah, Z.M.L (3) sungah ei mite’n makaite’ nung i zuih theihlohna le nungzui-hoih i hihlohna te kagen kha a, Khangno, Uham, Numei, Naupang ahong huamzo pen dingin i lam-et Dr. Do Kham in hong nusiatvat ciangin...
Zomite’ Ziahoih tampite Kimukhia hi:

(Siamsin Seminar khatah sang naupang khat i, ‘Siapa aw, ei mite banghangin kipawl thei hetlo i hi hiam,’ cih dotna khat, ‘Eite mipibup hong gawmtuah zo ding (haksatna) thukhat om nailo aitam ci ingh,’ ci in Dr. Do Kham in dawng ngei hi. Hih bangin haksat, lungneem hunah eite (ama’ gen tak-in) i kithukhat thei hi. U.S a om sanggamte’ post Facebook maante panin i muhteh a luanghawm hong tun nailoh hangin a innah i om lieiliai, i tut, i ngakpih khipkhep ka muh ciangin ka dipngeek hong sukha mahmah a, ‘Hih in Zomite hi,’ (This is Zomis!) ci-in angtang tak-in ka kiko hi. Koimun, koimun i tungzong i ki-itna, i kivaanna, i kiphakna, i kipanpihna ahi itna-bulphuh-i-ngeinate it-huai sa mahmah ingh.

Zomite’ Kipumkhat-theih-kipatna ding ahi diam ci ingh.

Hong nusia hi, ci-in i zak akipan in thu kizakna amanlangpen ahi Facebook cihbang Social Media te ah dahna lakna in, kuamawh sawlthu hilo, i ‘Mial’ khipkhep geuh hi. I dahna, lungzuanna te i kihawm hi. Eite i kipumkhat ta hi. Bek thamlo, leitung gam muntuamtuam ah akizeel pha mahmah ahi Zomite i hih mah bangin (Ama’n anuntak hunlai in hong phakzawh man hiam bel theilo), i omna peuh panin ‘Suuna’ ahi zongin ‘Phawkna’ ahi zongin, ‘Pahtawina’ ahi zongin, i bawltek ah, tua-in zong kipumkhatna lim khatmah hipah hi. Tu-pan kipan in, ama’ nuntak sungin amuh nopdet ahi, (ama’ sihnung ah) eite mipibup akipumkhat theih ding, i kithawithawi ta hi.

Khangno Tampite Lungsim Thalawpsak, Hansuahkha ding hi, ci-ingh.

Siangtak in gen le’ng, namdang te’ lakah suahtung akipan ateeng Zomi pawlkhat in i minam enpi masalo maithei ding hi. Ahi zongin tutungah, Dr. Do Kham bangin Pilna lam ah Doctorate thuap 3 bang angah, Leitung (Global) level tawh ataai, Oral Robert University bangin a minpha mahmah khatah Professor asem ngei, sanggam u le nau, khua le tui zong amangngilh tuanlo, ahuh huai, apanpih huai amipih tampite abaankha mikhat hangin tua bang muhna tampite muhdan kilamdang sakthei khading hi. Khangno ahithei ding (of high potentials), ahi zolo aomleh hong thei sak un. Kahih theih zahin pantah nuam, pahtawi nuam ingh, sum le paai tawh kapha zokei zongin ka tuahsa thu (experience) beek ahizong’n hawmsawn nuam ingh,’ aci velvel den Dr. Do Kham in asihnung nangawn ah thu tampi agen na himawk hi.

Zomite’n Pasian i Phawkdet ding, Upna i Neihding ong Hanthawn hi.

Athutak in amah in asih dongin Upna akhahsuahlo Pa, ahi hi. Amah in upna i tapa taktak ahi hi. (When I see him in my mental picture, one word stoop up very tall, and that word is FAITH. Dr. Add Siraporn Kham) Oral Robert University pan Alumni te in laikhat khah a, ‘Alungkia ngeilo, upna neipa’ ci in minvawh uh hi. Zogam a Khuaneu khat ahi, Saipimual panin hihciang dong atunna in Upna hangbek vilvel hi, ci in anuntak sungin ateci pan kaza zeel a, ‘Kei na-ngawn Pasian in hihzahin hong zangh ahih leh note zong Pasian in hih sang’n nakpitak in hong zangh thei ding hi,’ ci in atunna peuhpeuh ah Khangnote thapia thei zeel hi.

Akithuahpih te’ genna bangah hong nusiat kuan lambangin Khanlawhna Cialpi (Revival) te bawlding mah tupbel in nei hi, ci in gen uh hi. (Genbehna. A nunung pen Innlam hong ciahna ahi, Tedim a ‘Tuailai Khawmpi’ ahzong Altar call samin mi pawlkhat gupna ading ki-ap thak hi, cihzong kigen sawn hi.) Pilna lamah Doctorate athuapthuap in angah hangin tuate in Pasian sungah alawpna, a utna te mengsak, kiamsaktuan peuhmah lo-in asih dongmah Pasian’ thu, Kha’ thu apom vinven zong etteh taak mahmah hi. A thutak in amah in a nuntakna lui amang ngilhlo pa ahi hi. (Akipat cilna, Pasian ahi zongin, akhankhiatna thuneute akipan angilhbawl kei hi.) Tua-in, hun hong kihei in Zomite’ ni hong tun, i cihtheih ciang i neih hamtang ding akisam peelmawh lungpuak ahi hi.(Pasian itding, Gam it ding, Minam it ding!)

Zomite Kipumkhat/ kipawl-theihna ding ‘Lamlak’ ahi hi.

Mipil khat ahih mah bangin Khangnote thupi sak in U-hamte zahtak bawl siamden hi. Numei, naupangte vei in mikim tawh akiho thei mi ahi hi. Mangkang gam Secular lam nangawn ah amadawk amah bangin mikhat adingin, eite(amipihte) tawh ngaihsut ziate kikhaai mahmah ding hita leh ‘tualniam e’ ci-in nelhbawl lo-in (mipi te in tel zo mengmeng kei taleh) ama lampan ahong lamnaih den khat ahi hi.

Tua in eite sungah a om thei mahmah khangno-ulian kikeek theihnate, minam vai aveite le athu-mi diakte kikal ah apiang thei mahmah ngaihsut kawhawm (knowledge-passions-gap) te ziak ahi kikeek theihna, ki thukhat theihlohna te su-mai tahen! Bang hangin Pawlpi phutlo nahiam, ci-in akidot ciangin, ‘Keipen pawlpi khat le mi pawlkhat ading bek hilo, mikim tawh kipawl ding,’ aci velvel thei den le, ‘Kei ka DNA pen midangte bang hilo in Global DNA’ hi, aci den mikhat ahi, Sia Do Kham bang, mi-manpha khat tungpan in eite in i sintheih ding thu tampi omkha ding hi. (Genbehna. ‘Zomi’ deih khat ahih hangin amin ah ‘Chin’ na cise hi. Mikang te’n ‘Cin’ cih lo-theilo ahih man in hi, acih kaza ngei hi. Tuasang athukzaw adeihna aomkha tam! / Hihpen Lai-atpa’ ngaihsut behna.

Tu-in Ei’ Hun Hi Ta! (This is our Time!)

A suahpih sanggam khat ahi Sya. Peter Mangpu in, ‘Hih zahin amipi te’n it hi, cih anuntak sungin mukha leh lungkim mahmah ding hi,’ ci ngeungau hi. Eite in hih zah in i it, i zahtak, i pahtak Rev. Dr. Do Kham, anuntak sungin e, akilawm bangin i bawlkha hiam, cih zong ki-dong le’ng kipuahphat ding thu pawlkhat om khathei ding hi. Tu-in ei’ hun hi. Na hoihsep ding hun in tu-hun ahi hi. Hunte ei’ khut sungah omlo hi. I makai te (anuntak sung mahmah in zong) zahtak ni. Ki makaih siam ni, nungzui hoih suak ni.

Rev. Dr. J.M. Paupu in, ‘Sia. Do Kham pen khaicii bang hiding a, hih khaicii lei ah hong kia-in hong palhin, hong muat in amah dan tampi te hong palhkhiatna, hong suahkhiatna ahih ding thupi hi. Zomite citak ni. Thuman, diktat ni. Pasian’ zahtak ni,’ ci in tha hong pia hi. Hi mah hi. I up le i belh Pasian in Sia. Do Kham bangmi tampi hong piak nopman hi ding hi, ci-in i um hi. Pasian in geelkhial ngeilo ding hi. Ama’ geelna in leitung mite’ geelna sangin hoihzaw, sangzaw den hi.

Sia. Do Kham in minam ading atup thu tampi omlai kha ding hi. I minam vaite mailam ah sah mahmah lai ding hi. Haksatna omlo ding, cih hilo zaw in tuabang hunte ah i biak Pasian, eite tawh hong omkhawm hi. A omlai maban te eite khat tek in ei le ei kisuan tawm ni. Zogam hong paallun ngeeingeei ding hi!


 


Comments




Leave a Reply