WWW.TUNGZANGNEWS.COM

 
Muntuam gamtuam a om,

It leh ngaih, laizom U leh Nau, Nu leh Pa, Lawm leh Gual khempeuh,

Ih it mahmah, ih zahtak mahmah, ih muan ih suan mahmah, Dr. Do Kham tungtang tawh kisai vaihawmna hong kozel ungh.

Dr. Do Kham luanghawm pen Tulsa khuapi ah vui dingin innteek bangkua lampanin ka khensat uhhi. Dr. Do Kham luanghawm vuina ding Han (Cemetery) pen a kizon’san laitak hi a, zingciang (Oct. 15, 2013) in Hanmun khat kivaihawm zo dingin kilam-en hi.

Zomi buppi in Dr. Do Kham a itna lian mahmah ahih manin, amanpha mahmah itnate zahtakna leh kipsakna tawh, ama Han pen limtak in lamsak dingin ka geel uh a, bangci bangin lam ding cih pen a Han lam a vaihawmna dan tawh kituak in kikhensat theipan ding hi.

Dr. Do Kham luanghawm pen Oct. 14, 2013 ni nitak lam nai 3:00PM pawlin a kivelna Baltimore Zatopi panin Funeral Home khat ah kipuakkhin a, hih lai ka gelh laitak in, Tulsa khuapi lam ah puak theihna dingin alep laitak uh ahi hi.

Dr. Do Kham luanghawm pen Oct. 16, 2013 (Wednesday) ni nitak lam pawlin, Tulsa Vanleng Tualpi hong tu dingin kilam-en a, tua pan in, Schaudt’s Glenpool Funeral Home (719 East 141st Street, Glenpool, Oklahoma 74033) ah kisialphot ding hi. Dr. Do Kham luanghawm pen Baltimore khuapi pan Tulsa khuapi dong ahong puakna a kipan, Han ah a kivui dong pen, hih Schaudt’s Glenpool Funeral Service panin hong sem ding uhhi. Funeral Service khat a kisawl ahih manin, lamkaal ah a luanghawm kivel theilo ding hi.

Dr. Do Kham luanghawm Oct. 16, 2013 ni in Tulsa khuapi ahong tun theih a leh, Oct. 19, 2013 (Saturday) ni in vui dingin ih geel ding hi.

Dr. Do Kham phawkna (Memorial Service), a innkuanpihte leh adah akap khempeuh kihehnepna, ama tungtang a kihanthotna leh thungetkhopna hunte, Oct. 16, 17 & 18 (Wed., Thu. & Fri.) ni tengin, Jenks khuapi sung a om Newspring Family Church (2907 W. 108th Place S., Jenks, OK 74037) pawlpi biak-inn ah bawl ni ci in innteek bangkua lam panin hong cial ung. Zing ciang (Oct. 15) nitak pen Dr. Do Kham nusiat a innkuanpihte aituam hun la in, a tawl ngak theihna dingun nitak hun kigeellophot hi.

Dr. Do Kham tawh a nunung pen hun bawlna pen Oct. 19, 2013 ni in, Jenks khuapi a om, Newspring Family Church pawlpi biak-in mah-ah bawl dingin kigeel hi. Hun geelna kipelhna khat a om leh a hunlap in hong zaksak ding hi ungh. A hun (Time) leh Hungeelnate zong a kician in hong kokik nung.

Dr. Do Kham luanghawm lei ah ih tuh khitciang in, khua leh tui sung vai khatpeuh tawh akituaklo ding hun khat geel in, Dr. Do Kham phawkna (Memorial Service) leh a nuntakna pahtawina (Celebrate Dr. Kham’s Life) hun khat bawl dingin lunggulhna ka nei uhhi.

Innteek bangkua sung panin Mary Kham leh Mangsen zong, tu ni (Oct. 14) sunkhit lamin, Dr. Do Kham zintunna leh a kivelna zato vahawh thei uh a, Palik thuneite tung panin, Dr. Do Kham van khempeuh latheita uhhi. Mary Kham leh Mangsen-te pata zong DC Area a om Zomi-te in hehnem in tu nitak na tutpih thei uhhi.

Hih lai ka gelh laitak mahin, Dr. Do Kham nau, Pa Vum Nang zong Yangon pan in Tulsa khuapi zuan dingin hong lengkhia khinta a, Oct. 16, 2013 (Wednesday) ni in Los Angeles pan Tulsa hong tung dingin kilam-en hi.

Tu nitak in, Far East Mission Church pawlpi biak-inn ah, Dr. Do Kham in anusiat, a zi a tate, a innkuanpihte leh adah akap khempeuh hehnep tutpihna hun khat kibawl a, hun leh vai bawlnate anuai UStream mun ah Video in kisuaksak hi.

http://www.ustream.tv/channel/zomiinnkuanmedia

http://www.ustream.tv/recorded/39855877

Innteek bangkuate in lungdam kohna pulak ding lei tampi kiba a, hih laikhak pen thuzaksakna bek ahi hi. Kicinlahna khempeuh itna tawh hong telsiam un.

Tutung hizah hong zaksak nung ei.

Innteek Bangkua

tang’in;

Pa Go Sawm Khup

Innteek Thusa

Tulsa, Oklahoma, USA

October 15, 2013. 2:30AM.

 


Comments




Leave a Reply