WWW.TUNGZANGNEWS.COM

 
Gam leh minam khantohna ding a kingakna in Khrist ahi masa ding ahi hi. Pasian thu hiin leitung thu hita leh hih bang zahta a i khantoh theih loh a, minam nuai bek bek a i om na in  i Khristian na  a i ginat loh man  ahi hi.Khristian na pen  i Khristianna suangphuh hilo in i minam leh gam suangphuh hi zaw hi.I nisim nasepna  leh i biakna  Khristian na i tuam koih uh a, Kumpina leh Khristianna i tuam koih leu leu uh hi.Hih te pen i minam khan mawhbok ahi hi.Leitung leh a sunga om khempeuh Topa a ahi hi. Tua ahih manin na khempeuh tuam khen loin  siangtho leh hoih  takin sem ding hi hang. Banghang hiam i cih leh  Topa lenggah huan vi ve  ahi hi.M.K.Gandhi in mikang hong lut te leh a mainawtna uh mu mah tase leh  India gam a it manin a gam leh lei tawh kituak in kizem hi. Pt Jawaharlal Nehru in India gam a nam tuam tuam pau tuam tuam te a et ciang in “ huan sunga pak nam tuam tuam kilawm mah mah a pak” bangin mu in kilawm sa mah mah hi.

Tua mah bangin i minam makaite in i gam gen thei leh liangvai mah mah pen hong it thei le uh i gam minam vai nasepna ah pek khat zong hong nesim ngam dingin ka lamen kei hi. Leitung mihingte in a thupi ngaihsut pen in gualzawhna ahi hi. M.K.Gandhi, Abraham Lincoln, Nepolean te leh Churchill te i phawkden na in gualzo mi ahih man uh ahi hi. I leitung nuntakna a hong tuamtu gol pen in Nainganji(politics) hi ding hi. Banghang hiam i cih leh  minam leh gam saitu ahih man ahi hi. Na khempeuh khami zah donga i pan kei leh gual zawhna i ngah ngei kei ding hi. I minam nainganji vai pen sum metbawlna dinga phuan hilo in gam leh minam makaiha mite tawh kalsuan i kikim na ding a kiphuan  ahi hi. Gam leh minam kido na ding hilo in nam leh gam khantoh na ding ahi hi.

I minam makai dinga i telkhiat te in  gam leh minam itna  lungsim tawh  ma hong pangta ding uh hi. Banghang hiam i cih leh minam dangte gual i en na nasia lawta hi.I gam sung i state sung i District sung en leng infrastructure lian deuh e.g. power leh  industry etc  ah mi i pha zo kei uh hi. Banghanga USA te  ki tung et den hiam i cih leh  a lungsim uh lian in nasem kei mah le uh  gamdangin  ki tunget den hi. Amau namdangte tunga leng ding lungsim puasa lim lim uh hi.M.K.Gandhi in zong  leitung pen  ngam(challenge)mah mah  hi. Tua lungsim mah ei Zomite  in zong i puak ding uh ahi hi a, tua pen i khantohna ding bulpi zong ahi hi. Tuamah ahi i gam sunga a khangto minam i hih  na ding uh. I ngaihsutna a niam laiteng gam thupi i ki tun zo ngei kei ding a, na lian zong i sem thei sam kei ding uh hi. Bangkua sunga nu leh pa  tavuan a gol mah bangin i minam makaite tavuan  zong gol mah mah hi. A paisa hunte nusia in  a hong tung ding  hunte ah Zomi khempeuh in lungsim thak puaciat ni. I gam makai ding me i khiat ciangin lungsim takpi tawh ngaihsun pha ciat ni. I nu leh pa  ding tel ding i hih manin  kidawm siam ni.Myamar gam mi hi zo i hih manin  i gam  makaite zong mangngilh kei ni.Yangon huhna ki hello in  na lian i sem thei kei  ding hi.

Tua ahih man Centre lamte thagui i ngah theihna  dingin i lungsim  ki hongsa in  om ni. Central nainganji ah zong kiphum sawm ni. Myanmar gambup makai ding  Zomi te i hi kei ding cih  kuan gen thei a hiam ? Pawlpi a tavuan gol len i hi phal zongin  nainganji pen mawk huat bawl ding hilo hi.Tuamah bangin  nainganji saiten zong  biakna lam a neu ngaihsut peuhmah leh zuih tak lo makai suak ding hi.Kuapeuh in a pian na gam  a leitang dongin a it kei leh  Pasian nasem tu maan hi thei ngeilo ding a, kua peuh in a mihing pihte  a hehpih theih kei leh  amah piangsaktu bangci it theih ding hiam ? Na khempeuh thudik thuman a piangsakpa deih banga a pai theih na dingin a bulpi in Khazih ahih pelmawh ding kisam hi.Hih i khalam na leh  leitung nainganji bek hilo i sumbawlna tanpha in  mankim hi.Lawhcinna bucingh leh khantohna bucingh pen Pasian pan piang ahih man ahi hi.

By: Pa Kham Do Pau

Aizawl, Mizoram, India

 


Comments




Leave a Reply