WWW.TUNGZANGNEWS.COM

 

Mikim in, a gualzo ding leh a minthang ding ki ut ciat aa, a lunggulh lo ki om lo hi. Tua a hih man in leitung ah Migual zo te koi ci bang in gamta uh aa, a koi ci bangin kalsuan uh hiam cih en suk dih ni!

1. Ngimna, Tupna (Vision) ki cian nei uh hi. Paunak 29:18 ah “ Ngimna om kei leh mite sia cip hi” ci hi. Na nuntak na ah mi-hoih na suah theihna ding leh, na siat cip loh nading in “ngimna” na neih ding kisam masa hi. Pasian in mihing te tungah a tawm pen siamna khat ciat ong pia hi. Tua hi aa, ih siamna, ih kivak nate tungtawn in Pasian in hong zang ding hi. Tua a hih man in na ngimna in bang hiam? Pastor maw, Sangsia maw Sumbawl, na uukpen khat in na ngimna bulpi ahih ding thupi hi. Mi minthang, mi lawhcing ih cih te pen a nasep uh a kician tak a, a thei te ahi uh hi. A hih hangin tua Vision pen ni khat thu tawh hong piang vat lo thei mah ding hi. Pasian ii hong laptoh hun ih ngak kul ding hi. Mihing te I hih leh, tun suan tun at pah nuam thei hi hang. Pasian in hun a sak leh mihing in hun ih sak hong kibang lo thei kha mah ding hi. Pasian in hun
a sak ngak siam ding ki sam hi. Ih ngak zawh loh man in leitung ah thubuai tampi piang ngei hi.

1. Abraham in Isaac pen kamciam a ngah khit kum 15 teh ngah pan hi. Ngak zolo ahih manin innkuan sung buaina tu dong om pai suak hi. (Arab leh Isreal te)

2. Joseph in a mangmuh na pan in makai a suah dong kum 13 bang sawt hi. Tua kikal sung haksatna tampi thuak tentan hi.

3. Ih Topa Zeisu zong kum 30 sung bang, nu leh pa huh hithiat phot hi. Tua khit ciang a nasep ki pan hi. 

Ih Vision hong tangtung masiah ih lungkiat loh ding hong thupi ding hi. Ki aap na leh cihtak na zong hong kisam pha mah mah ding hi. 

2. Nakpi tak aa lunggulhna, deihna (Desire) nei uhhi. Mi kimawl siam te in, thaman a ngah nading un nakpi tak in lunggulh natawh hanciam uh hi. Moses in Israel te a pai khiatpih theih nading in Pharoah tawh ki saai ziah ziah phot uh hi. Lunggulh luatna khempeuh, ahoih hi khin lo zel hi. Pasian deihna tawh a ki tuak lunggulh na leh ci leh sa deihna Satan hong guat lunggulh na zong om zel hi. Elisha in lunggulh na takpi tawh Elizah kiang ah thupha a zah nih ngen kenkan aa, ngah pah hi. Nakpi taka a lunggulh na leh deihna in gualzawh na a piang theih nading in a bulpi (အရင္းအျမစ္) a hi hi.

3. Lungkiat na neilo uh hi (Not to-give-up) Ih sep khat peuhpeuh hong tangtut ma in, lung kiat na lianpi hong om thei zel hi. Tua bang hun in a lung kia, a nungtolh tampi zong ki om hi. Leitung ah, Mipil min thang 500 bang a kidot ciang in, tua bang lungkiat haksat laitak in nakpi tak aa thuak keei kaai in, a lung uh kiasak vetlo in, a phut tentan man un hih bang a suak thei bek hi ung, ci uh hi.

Lungkiatna in gual zawhna ih ngah theih nading in hong nawng kaisak, a hong dal “Satan vanzat” a hi hi.

1.Moses in lungkia lo in Pharoah tawh kisi uh aa, gual zo hi.

2. Nehemiah in, galte hangin buaina a thuak hang, lungkia lo in Jerusalem hong lamkik hi.

3. Abraham Lincoln zong mun tuamtuam pan in 40 vei (election ah 11 vei) bang a lelh ngei hangin Kumpi na suak veve hi.

Tua a hih man in,Sanggam aw, “Lungkia ing ei, ngap nawn mah mah kei ing ei” ci a na lung na kiat sak masiah a guallel na hi nai kei hi.

* Spicer Zolengthe sunga ka at, ka puahphat kik a hi hi.

Hanciam ding a lunggulh
-Sia Nangpi

Ref: AAS Thelnah Lom 2 Hawm 1, August 25, 2013
 


Comments

Nangpi
06/15/2015 09:44

Kicin na ka neih loh hangin, lai-at peen ka uuk mahmah khat hi a, hi bangin, TZN sungah ka Article te hong koih sak na hih manun ki paak mahmah ing.
Sia Nangpi
AAS Tedim
Phone: Contact no.
0930588012
09250325010
070-50159

Reply



Leave a Reply