WWW.TUNGZANGNEWS.COM

 
Picture
Kalaymyo pan Dr. Kham sihvui hunbawl danding zaksakna
Kalaymyo pan Dr. Kham sihvui hunbawl danding zaksakna

Kalaymyo ah Dr.Kham sihvui hunbawl nading tawh kisai Photo te ah zong hong suaksak ung. Hih a masa nitak sim a tutpih nading geelna pen ZYA te' vaihawmsiamna tawh hong bawl uh ahi hi. Hong nusiat a kiizak a kipan akuama peuh a kawl a zo in hong delh hong tutpih, galna tuamtuam nagawn hong kipia tek uh ahi hi.

HUNBAWL DAN DING PAWLKHAT:-

1. Oct.16, 2013 (wed), (tu nitak) Canaan Land Inn ah hehnepna hun pen, ZCD Kalay makaihna tawh hi ding a, Chairman pupi, SK.Gin Khan Pau in hun hong makaih ding a, Revd Go Cin Laang (Zo Baptist) in hanthotna hong pia ding hi. 7:30 Pm.hun kipan ding hi.

2. Oct.17, 2013 (Thursday), ZYA min tawh tutupihna hong nei ding uh hi. Pa Khan Za Nang (President) in hun hong makaih ding a, Sia Kham Sian Pau in hanthotna hong pia ding hi.

3. Oct.18, 2013 (Friday), GZA Kalay min tawh tutpihna hong nei ding uh hi. Pa Gin Khan Pau (District Admin>chairman Rtd) hi ding a, Revd Dr Man Hau Cing, Th.D (GS, KVBC) in hanthotna hong pia ding hi.

4. Oct.19, 2013 (Sat) 2:00 Pm. hun pen Agape Ministries Center (A.M.C) biakinn ah hi ding a, Special Service takin kibawl sawm hi. Hun hong makaih ding pen Revd En Khan Hau (President, ZBCM) hi ding a, Revd Go Za Nang (Senior Pastor-AMC & Vice Superintendent- General Council, Myanmar) in hanthotna hong pia ding hi.

5. Oct.19, 2013 (Sat) Nitak hun: 6:30 Pm. hun pen, Kawlzang Saipimualkhua Kipawlna (KSK) te'n hun hong la ding uh hi. Chaiman pen Revd Dr.Vum Khan Khual (Principal-ZTS, Kalay) hi ding a, Revd Hen Khan Go (Church Pastor, ZBC Tahan) in hanthotna hong pia ding hi.

TIDIM AH ZONG KIBAWL DING:-

Tedim ah zong hih ni, Oct.19, 2013 (Sat) ni sun mahin Bethel A.G ah limtakin bawl ding uh hi. Dr.Thuam leh Revd Khai Suan te a kipan makaipi pawlkhat in na makaih ding uh a, tua hunsungah Dr.Do Kham tawh kisai thugenna a nei nuam pawlkhat te'n zong genna nei ding cih Dr.Thuam' tungtawnin kiza ahih manin lungkimhuai leh thupi kasa mahmah hi.

Tua bek hi lo-in Zomite omna Leitung mun tuamtuam ah zong Kipawlna min tuamtuam tawh na bawlsawm ciat uh ahih manin i lungsim hong nuamtuamsak mahmah a, a diakdiakin ko a tanau innkuan teng lungdam leh nakpitakin na angtang hi ung. Mite muhna ah zong i minam ki-itna, ki-lainatna leh vaang khat zong om ahi hi.

DR.DO KHAM' LUANG TUNGTANG TAWMKHAT:-

Tuni Dr.Do Kham' luang pen DC pan Vanleng tawh pua ta uh a, a sawt nawn lo-in Tulsa tungta ding uh hi. A phual a a va delh ahi, ka Pu Mangsen leh ka Nu Mary te zong tuzingin ka Pu Kham' vanteng (a kiteen lai a khut zungbuh) tawh ciah khin ta, inn tung kik ta uh hi. Kawlgam pan a luang delh a va pai, a nau pa, Ka Pu Vum Nang zong Los Angeles tuzingin tung khin a, tunitak mahin Tulsa tung dingin kiza hi.

Zomi tampi in i lunggulh ahi, Dr.Kham' i luang pen Tulsa, O.K mah ah vui dingin khensat uh hi, cih zong kiza hi. Ih gam ah zong a thu in hoih sa ta leng vai lian veve ahihna leh a zi leh tate' ading tawh thu ol lo veve hong suak ahi hi.

Pasian mah in Ama nasempa panpihin a luang tungtang nangawn ah a nasepna kilangsak hi. Tulsa ah mi minthang leh mipil misiamte' kivuina han (a special) mun ah vui theih nading ngah uh ahih manin angtang mahmah hi hang. Tua han ah pen mipil dangdang tampi a om ban ah i theihpak dingin T.L Osbon leh Oral Robert te' kivuina han gei no mah ci uh hi.

Mun tuamtuam pan a i geelna leh lunggulhna om bangin Topa'n a mun tek ah lungkimhuaitak a Dr.Kham' i luang lei-ah a "Tuh" khit dong nuamtakin hong zawhpih nading thungetna tawh mapang khawm ciat ni. Ih vekin Topa'n thupha hong pia ta hen.

Thupuak,
Peter Khampu
CMedia, Kalay


 


Comments




Leave a Reply