WWW.TUNGZANGNEWS.COM

 
Picture
Tukum pen kum dang sangin guahtui tam zaw dingin kiciamteh a, leitung mun tuamtuam ah tuikhang, memcipna hangin mihing tampi sihna le inn le lo tampi kisiacip hi. Tua bang kawm kalah Kawlgam sung le Zogam nangawn ah guahtam luatna hangin, mihing tuikhang i taih asi le inn le lo suplawh mi tampi om khin hi. Nung nipi sung September28-29,2013 ninih sung Kawlpi ah um le beel abuak bangin, sun le zan tatsat loin guahzu ziahziah ahih manin, Kawlpi khua sung Hawk guam khempeuh tuikhang in let zihziah ahih manin, kum 20 sungah a nasiapen dingin kigen hi.

A diakin Leipi lui nasiatak khang ahih manin Seihkantha Lei zong sehthum suah sehkhat (1/3) tui in paipih banah akiang a inn 5 kim zong taimang (paipih) in atamzaw Zomi inn vive ci hi. Tua banah  leipi luidung suk ateeng mite buai mahmah uh a, guahzu lakpi mahah inn kiphelphel tawh tui taihtaih tawh cih bangin khasiat huai mahmah cih kiza hi. Tua bek hilo-in Paangpi veeng le Tuitum veeng lam luigei a teeng Zomi inn khat zong Tuikhang in nawt sia mang ahih manin inn singte le vante hemkhia man uh ci hi. 

Tua banah September 29,(Sunday) ni sun lam tuikhanpi hun sung mahin Tahan A.G pawlpimi Nupi khat zong tui-in tai in hong nusia pah ci hi. Tua nupi pen Motor Cycle tawh numei khatin a nungah a tuansak (Teen) hi-in, Tuikhang a kantan laitak un amah leh amah Motor Cycle tung pan kia khia ahih manin, tui in paipih pah a, tawlpi khat tui-in a taih khit ciangin akhang lam diakah asisa in a luang kimu cih kiza hi. Tua nupi pen apasal om nawnlo a tate nangawn asi khin hi sawnsawn in, amah bek a damlai sunsun cih Pa Vial Khan Do (a) Dopu (President of ZOFA), in gen ci hi. Hih Kawlpi tuikhangna hangin asi amangte banah tuahsiate khempeuh ading thungetna le panpih theihna lampi tuamtuam tawh huh ciat ding hi hang.

 Peter Khampu & Rev. Thang Khan Khai (Tongsan Reporter, Kawlpi)


 


Comments




Leave a Reply