WWW.TUNGZANGNEWS.COM

 
Lawmte,
Lamka khuapi ah Global Zomi Alliance a Founding General Secretary a sem laitak 3rd World Zomi Convention October 25 - 27, 2013 a thugenpi ding khat a hong pai ding ci a a kitang koko laitakin Sia Do Kham in hong nusia hi cih a kizak phetin khatlekhat kihilhsawnin cihna ding mel theilo  tekin kiom hi. Ken tu ni zing nai 5:43 lianin ka cellphone msg panin ka za masa a, a sawt loin CYA Hqtr General President Sian Pau in hong phone a, a tatak hi hiam ong ci hi. Kihokik in internet ka hon leh a takpi mah hi, ci in ka kihokik uh hi. Tua ahih leh Tedim Chin Cultural Club Hall, Lanva ah program bawl ding maw ci in kiho a, aki om lai in New Lamka a a nuneu Nu Neng Khan Niang om hi, amau kiangah sun nai 12 in program bawl ni, ci in kizasak in tua ah hun khatna kizang hi'

Lamka a Tedim kampau zang khangno kipawlna ahi CYA Hqtr min a sunna tomkim hi bang hi: President Nang Sian Pau in hunuk in CBA Vice President Gen Than Lian in thungetna tawh hun ap hi. Thugenna:
1) CYA Hqtr minin Adviser Dr. Neng Ngaih Lian in Siapa hong nutsiatzia utube leh internet pana kisuah tomkim pulak in Siapa biodata gen hi. Siapa in minam leh gam adinga a kizatna leh Zomite aneu a lian a khualna nasep banah phawkhuai thu tampi gen hi.
2) Tedim Chin Union Hqtr minin Pa Nang Khan Thang sunna thu gen hi.
3) Dr Thang Khan Piang, Tedim Chin Student Assn Adviser in Sia Do Kham tawh a kithuahkhakna leh Pasian min tawh minam makai ahihna gen hi.
4) Dr Dal Lian, CYA Hqtr Adviser in zong minam ading a supna lianpi ahihna thu gen hi.
5) CBA minin Rev Dr Enn Za Sian in CBA minin sunna pulak in, Zomi hih zumpih het lo a, sangpitak a hong pulakkhia, a thalehzung neih lehlam sumngam lianga nasem ahihna gen hi.
6) Nu Neng Khan Niang in Saipimual leh Tuimui a sangkah lai leh innsung khosakzia a kipan amah it in huhna a khakzel ...... gen hi.
7) Pa Kham Khan Lam in a U Kham tawh a kithuahna leh a innsung dong uh khual a Mangkang gamah om ta leh u leh nau mangngilh lo a a om thupi asakna gen hi.
8) New Lamka CBA Pastor M Khup Khen Mang in Sia Kham nutsiat a zileh tate leh innsung mite khamuanna thu leh Pasian it minam makaipi tan i hihna thu gen hi.
9) Sia Dal Sian Pau in Sia Do Kham a ithuaizia leh thupi mahmah asakna leh Zomiten tanlianlua ihihna gen hi.
Hun khakna kum 95 a upa ahi Pu Gin Za Kap, Pangzawl in thungetna nei hi.

Zomi Council Hqtr mina Sunna:
Nitak nai 3:00 a kipanin ZC Zumpi Lamka ah Zomi makai ahithei bang teng kikaikhawm in sunna hun hi bangin kizang hi:
3rd World Zomi Convention Worship Department Co-ordinator Dr Neng Ngaih Lian hunuk hi. Zomite Aksipi tanglai hong kevat hi ci in Sia Kham nuntakzia leh hihna tomkinin pulak hi. ZOLLS Chairman Rev Dr B Luaichinthang in hunapna thungen hi. Sia Dal Sian Pau, ZOLLS Secretary in Sia Kham hong nutsiatzia leh tuhun laitaka omzia update in ZOLLS minin sunna thu pulak hi. 

Hunpi: 1. Pu L B Sona, Chairman, Zomi Council in Zomi Council Hqtr minin sunna thu pulak hi. Condolence message simkhiatna nei hi.
2. Dr R. Sanga, 3rd WZC Covenor in Convention minin sunna thu pulak in condolence message sinkhia hi. Sia Kham Bio data leh achievement pawlkhat pulak in, a bio data kikaikhawmte Convention Souvenir a suah ding, Obituary dan a zong suah ding, Sia Kham lim Poster lianpi suan ding pulak in suansuan pawl zong kinei zo ahihna gen hi.
3. Pu K Vungzamoi, 3rd WZC Programme Co-ordinator in Sia Kham in Convention a ding article hong khak 'Zomite Tuibang kigawm..... cih laimai 4 pha simkhiatna nei hi.

4. Condolence Prayer Rev Khen P Tombing in a neihma in Mipite dingin Daidide in Miniute 2 sunna hun kinei a, tua zawh in Siapa in Sia Kham nutsiat a zi leh tate, innkuanpihte leh leitungbup Zomi adingin thungetsakna nei hi. Thunget zawhin Siapa in USA a Sia Do Kham tawh a kithuahkhaknate uh leh amau innkuan tawh a kipawldan uh, mipithupitak mitampi US a kailut...... ahihna gen hi.

Hunpite khitin inntek lam panin Pa Kham Khan Lam in Zomi Council mina hi bang sunpihna lungdam ko hi. 3rd WZC Co-Convenor Suanmoi in Oct 9 ni a Sia Kham tawh a kihona thu uh leh siapa hong pai cianga a lunggulh a gente pulak hi. Pu Kapbanyan mimaltak a a puaknatna, Pu William Vaiphei hihzahta mithupi tanlian a kisakna leh Nang Sian Pau Shoute in Saipimual electric om lo a, akpikang lai nangawn a vom liangzah a meilah meivak a nei hi ciang tung thei ahih leh eite... cih Sia Kham kam gen ngei i meivakpi  in hong nusia cih gen hi. Pu Ginhau tanu a U Ching in Sia Kham tawh a kithuah khakna teng leh a puaknatna gen hi 
A kalkalin hunukpa in Sia Kham nasep thupi tuamtuam -Mizoram CM Pu Lalthanhawla kianga Aizawl a Zomi vai, Malaysia leh Delhi a Zomite UN palaite kiang, GZA vai, American te kianga Zomi Pastor masa, kum 1979 pawl a Agape khui tawh Zomi la casseette hong bawl masa, lasiam, Mangkam siam leh fund raise siam ahihna te pulak hi.

Hunkhakna dingin Rev. Cin Kam in thungetna nei hi. Tua bangin khuamial dong hun kizang a, mittui leh lungliap kawmtakin kikhen hi.

Sia Kham tawh ka kithuahna uh ka phawkna leh Ama tawh kisai ka hih theihsun sun hi bangin report na dan ka gelh ciangin ka dahna nuamtuam sa ka hih manin keima aituama kong suah hi. Genkhelh leh genval a om leh hong theisiam un. 

Sia Do Kham ka sunna hi.

Dr neng Ngaih Lian
Lamka
 


Comments




Leave a Reply