WWW.TUNGZANGNEWS.COM

 
LEITUNGBUP TUNGZANG INNKUAN (TGA) PAN DR CHIN DO KHAM HONG NUSIAT DAHNA THUPUAK

 

Pasian' muhna ah mi khempeuh a kibanga hong it ahihna ih thei ciat hi.  Ahi zongin Leitungah mihingte ki makaih hun sungin Pasian in a hunhun in a mite makai ding na teel zel a, tua makaite in a mite a nusiat or a sih san ciangin minam buppi dahin kap zel hi.  Tu laitakin Dr. Chin Do Kham banga leitung pilna sang a nei tampi a om hangin amau dinmun leh mawhpuak ciat Pasian in a tuam tek a hong piakna ih mu ciat hi.  Tu tadihin Zomite' aading Dr Do Kham banga a kisapna munmun ah a delh zo kawikawi ding, a vei, a phu ngam ding, a sem thei, a sem zo ding makai hong pian ding baih pakin ka um kei hi. A pil khempeuhin zong vei kim lo a, a vei khempeuh in zong a kisam pilna leh siamna neih ding baihlo hi. A ki sam a hih nak leh amah leh a mah lamsap ki sikin a pai banah, ama aituam ding ahilo a mipihte' adingin maitang singhawng belh liangin(Fund raise a bawl), huhna a ngen ngam mipil leh makai hamsa veve dingin ka um hi.  Tua ahih manin mimal maitang etna hilo, ci leh nam etna hilo, ih minam bup mittang tawh ih et ciangin, Dr. Kham hong nusiat pen dah loh theih ding hilo, lainat loh theih ding hilo in, a innkuan pihte leh a suah pih u leh naute zah mahin Zomi a kua maciat dah tek dingin ka lamen hi.

Zogam khuaneu khat pan piang ahih hangin ama' lungtang pan hong pusuak lungsim hansanna, lungsim puak(Motivation) hangin Zomi Siamsinte leh ih mipihte a hanthotna, a suah pih sanggamte a kipan Zomite a hih theih zaha a huh, a pattah zia, Biakna tawh ki sai a, pawlpi mite a huh a panpih zia, Mangvom Mangkang tawh ki lawmta in Zomite leh Kawlgam aading a mapan zia, a diakin Kawlgam a om U.S palai zumte tawh a ki theih zia, gam tuamtuamah ki pawlna tuamtuam te tawh mapang khawmin a nasep theih zia cih khawngte pen lei theih lah hilo, guk theih lakkhiat theih zong hilo, a hanciam khempeuh in zong a ngah theih kim ahilo talen tuamtuam, Mangpau ih sin ih theih tek hangin Mangkang gam tualsuak lo Zomite' lakah Mangpau a dangnal pente' lakah khat ahihna ih ngaihsut ciangin Pammaih ngaungau mawk hi.  Tu ciangciang a sepna leh a suulte ih et kik ciangin mailamah a sep sawm lai a ngim a tupna tampite zatek dingin kong lamen hi.  Mi namdang zi nei ahih hangin a tate zong a hun khop khat ciang Zopau, Zo ngeina, Zolate thei sakin a pantah zo suak hi.  A zi a tate tawh Zogam vapha in Zomite' nuntak zia va et pih hi.

Hih bangin Pasian thu leh Leitung thu ah ih minam makai muanhuai leh ih lungsim hong lamsang(motivate) ih it mahmah khat in hong nusiat ciangin a suahpih sanggam, nu leh pate leh a zi a tate bek a dah a kap hi nawnlo in Zomi nam bup dahna kahna sungah ko Leitung bup a om Tungzang Innkuan in zong Rev. Dr Chin Do Kham hong nusiat kong dah pihna uh kong puak uh a, ih maban khempeuh, na khempeuh ahih thei, Pasian' khut muanhuai sungah koih tekni ci-in ih eite hong nusia ngeilo, ih biak Topa Jesu min tawh kong hehnem uh hi.   

Leitungbup Tungzang Kipawlna(TGA) tangin,

Mang Khan Khup

 


Comments




Leave a Reply