WWW.TUNGZANGNEWS.COM

 
Lamet lohpi:
 
Zomi sungah i Minam makaipi Rev. Dr. Chin Do Kham in ong nusiat kazak phetin kamang maw katak maw ci-in am baibai sa in ka om hi. Umzolo lua kahih manin, ZAM Hotline kahopih pah a, amau zongh nadah thei mahmah uhi.
 
ZAM zumpi panin Minam makaiten Siapi Dr. Kham' ong nusiatzia teltak in ong gen uh ciangin, ka khitui ong tak keuhkeuh in ka cih nading kathei nawn kei hi. Tuni pen kei adingin, ann nezolo, bangmah semzolo in ka omcip hi.
 
Hibanga ong nusia vat dingin ka ngaihsun kha ngeikei a, ka lamenkha ngeikei hi. Siapa' tungtang ah Mihingte' nuntakna pen ei khutsung ah omlo cih ong phawksak phapha a, kei' khaamtheih hileh maw ci in ka kapkap hi.
 
Ama pianzia:
 
Siapa pen lungtai, maitai, citak, kuhkal, thuman, maingal in hanciam nopna lungtang tawh akidim den mi khat ahihi. A tup asawmna khat peuh lungtung takin sem a, muibun in gualzo hi. Deihsakna lungtang leh hehpih huaisakna lungtang anei ngiat mi khat ahihi.
 
Apianna:
 
Siapa pen Zogamsung Khuaneu khat ahi, Saipimual Khua panin napiangkhia a, Pu Haat Langh suan sungpan khangkhia Zomi khat hi a, USA gam Tulsa Khuapi sungah azi ata tawh innkuanbup in khuasa uhi.
 
Pilna zonna:
 
Kawlgam ah Kumpi Tan 10 azawh khit ciangin, Biakna Sang Yangon panin B.A ( Theology ), South Korea panin M.Div. USA gam Oral Robert University panin, D.D., D.Min, Chicago City panin Ph.D. Pilnate ong ngah khia in, pilna ah akuitung leh Zomi' sungah Doctorate thuap 3 ngah masa penpen ahihi.
 
Nasepna:
 
Tuipi galkai Zomite' haksatna tuamtuam ah mapangin Leitungbup Zomi Innkuan naphut khia in Makaipi nasem toto a, ama' maban zomto dingin Zomi tampi na pantah hi. Tua banah Global Zomi Alliance ah General Secretary semin Leitungbup Zomite' adingin Zingvaihawm ipa khat ahihi.
 
Tuabek hilo in, Leitungbup huam a gamtangthei ( International Level ) mipil khat hi a, Biakna thu, Leitung thu, Minam thu ah liimbelh phungpi khat ahihi. Leitung tawh liangko kima nasem taktak khat hi-in, Zomi leh Zogam adingin maban limci tampi hawmna gelna kician nei zihziah hi.
 
Hong nusiatna:
 
Washangtan DC sungah Gospel pai in atunna Hotel sungah hibangin Topa'n anuntakna hong laksak hi. Sawtpivei nakhol cih bang hilo in, hibanga ong nusiatvat kamuh ciangin Elizah bang kaphawk lianga, Pasian kiangah ong ciahsan hi a, Mipihte' adingin Vantung panin Zingvai ong hawmpih ding cih khamuanna kanei hi.
 
Dahna Khitui tawh,
 
Dal Sian Hung
Zomi Foundation Home Mission
Kuala Lumpur, Malaysia.
 
 


Comments




Leave a Reply