WWW.TUNGZANGNEWS.COM

 
Tusung dahna leh patauhna-tawh minambup phialmah ki-amcip gawp-a, ngaihsut kician meellozong hong luutgawp (thei) ahihman-in kihalhsuahna (refreshment) ding-in phawkpak thu khat:

"Hih Tui Kaangpi na' peektan (zaptan) zawhleh dollar 1000 hong kipia dinghi", (gentehna-in) cihthu tung-ah ngaihsut masakding-pen,

  • Tui ka' peekthei-hiam? Ka' peek theihkeileh hih pahtaaksilpiak kei-tawh kisailo-hi. Ka' peektheih lehzong, mualmi tuizap daanciang-hiam, ui tuizap daanciang-hiam, tuivaatsiam, khangthak tuipeek kidemte' zapdaan kahihthei-hiam? Tuipeek kaki ngeinaseh-hiam? Saupi ka' peek zodiam?
  • Peektan/zaptan nading Tui Kaangpi bangcia-in zaii-hiam? Ka' kingeinasehna-in azo-diam? Alang ka' tunma-in tansa-taai/pheisa-taai cihte ka' tuak khadiam? Kei' peekngei tuite-tawh bangci lamdang?
  • Dollar 1000-in kei' ading bang honghuh theiding? Kei' deihbang-in suakta tak-a zattheih-hiam? Tax piak akuul-diam? Hongpia uliante niangtui taih akuul-diam? Abuppi keima' thuthu-hiam? Za-aseh khenkhat ciangbek keima' thu hiding-hiam?
Hihteng ciantak-a I' theihtel khitteh kipan lehang kisiikna omlo tuam-hi. Alampi maan ahihman-in gualzawhna limci-in vaangpha-hi.

Kei mimal' muhna-ah Zomite ataangpi-in hihbang khapnate-pen ngaihsut ding-a thugui masate ngaihsut-in nei vetlo-in a-pahtaaksilpiak (reward) hih thutomno sung-a a-dollar bekbek ki-enpah tiuteu ka' sa-hi. Tuipeek siamloh thu-khat, tuipeek lo-a, agaal khat-a dollar "upna-tawh ka' la-hi" cih lamsang kihaat lua-hi. Hihpen khangthakte' khang-ah ahoihkhomkhat kikhiam theileh-a, lunggulh-huai lehkilawm ka' sa simsim-hi.

Thu-om khatpeuh analyse (telgeh) lopi-in uutteng sammsuk, upmawhteng kawksuk, deihteng suahsuk gawpzeel hang-a, "upna-tawh lading" cih-tawh ma kipang phangphang-hi. "Upna" ci-in upna-tawh sepna omkei mawkleh aseem, agim, asihpih zawzeente' ading-in bang lawhtaak omding-hiam? Moses-in "upna-tawh Canaan tungzo" cici-in amite paikhiatpih keileh tuni-in ZEISU' thu zaloding hang-a, beh tuulpite (dawithoih siampite) bekmah biakna sia-in neiding I-hihlam ngaihsun lehang khatveivei I' tualniamna-in hong henniam seemseem bang-in kikia suksuk-tawh kibang simsim hihang.

Khangthak Zomi sung-ah apiicing kalsuanna a-om theih nading-in I' muiingiim/muiituum (aim) leh ngiimna/tupna (target/goal) telcian masa-in tua ngiimna lianmah I' khaak nading (to hit the exact target)-in akisam masapen, anihna, athumna cihbang-in ki-ngiimleh I' kalsuanzia themcik akhangto theideih tammaw cih lametna ahihi.

Zomi Pasian' Thupha!

Zokhai



 


Comments




Leave a Reply