WWW.TUNGZANGNEWS.COM

 
Na nuntakna ah kalsang khat na suan ciang, lawhcinna khat na tuah ciang a ban ah bang omlai hiam ciin na ngaihsun ngei hiam? Na muh tam semsem, na theih tam semsem, na tuahkhak thu tam semsem leh leitung pen na lamet banglo, na lunggulh banglo na sa mai ding hi. Lungkiathuai in thanem in na om kha thei hi. Banghang hiam cih leh leitung pen mawhna tawh a kidim hi a, Honpa, Gumpa hanga lametna nei bek ihi hi cih Christian biakna zui khempeuh in i thei hi. Leitung pen mite hong nopnehna gam, lawmte hong ciampelna gam, nu leh pa kitotna hanga kikhenna gam, zawnna ngauna hanga gentheihna gam, zi leh pasal hikhin napi kikhen kikna gam, lametna om nawnlo kikeuh tawh kibang phiala lungkiat theihna gam, innkuan ki it mahmah ngeisa nangawn thuneuno khat hanga kitamkham na gam - i tenna leitung ahi hi.

Tua bang ahih leh bangci in hih leitungah nuamtak in lungdam takin lungkim takin i nungta thei ding hiam? I mai ah teel ding a lian mahmah nam thum om dena i teel khialh leh Pasian phawklo in kinungta dinga lungdamna sangin dahna tamzaw ding hi. Pasian tawh nungta in Ama ukna nuai ah Ama liimnuai ah nungta leng nuntakna manpha semsem ding hi. Teel khialh theih nam thum hih bangin gen samsam ni:

1. Hazatna tawh kidim nuntakna: Midang hazatna tawh nuntakna limlim pen nuntak dan dinga na teel lak pan a khial mahmah khat hipah hi. Leitung nuntakna tomkal sungah huatna, enna leh hazatna tawh nuntak khak pen a kamsiathuai mahmah khat hi. Kuate eng, haza i hia leh? I kiim i kianga omte haza hi hang. Bill Gates leh Steve Jobs te haza banlo hi hang. Amau bel hazat bat vetloh zah in hau in nuamsa khin lel uh hi. Eite hazat leh ente pen i muhtheih i veng leh pam, lawm leh gual, sangkahpihte, sanggam u leh nau leh meltheih tanau sung, pawl sung leh khuasung khawng hilel hi. Sangkahna kibang, nasepna kibang, pian leh suah kum kinai cihte kihaza diak hi. I tuahkhak thute kibang pianpian nuam hi. Sangkah laiin zong kei sang siamlo zaw hiven tun kei sang nasep hoih nei zawta, kei sang inn nei masa zaw, kei sang mawtaw nei masa zaw ciin kihaza thei hi. Numeite in kei sangin amah a melsia zaw napi pasal hoih ngah vial se, pasal melhoih, hau leh pil zaw ngah vial se ciin kihaza thei hi. Leitung i cih pen liangko kikimlohna gam ahi hi.

Midang enna leh hazatna hangin i lungsim kitamkham in midang dem nopna leh el nopna lungsim hong lut hi. Mite hazatna tawh i nuntak pen midangte in na thuak mello, na theise lo napi a hazapa, hazanu adingin sup-huai mahmah hi. Tua hazatna pen meikuang bangin kizom in a ban lawhto zel a, a kidop kei leh hazatna tam semsem in 'hazatna lungvei' lawh thei hi. Kidop mahmah kei leh i nuntakna hong siasak thei lungno bangin i lungsim sung hong zel dinga i nuntak a manphatna nangawn mankiamna suak ding hi.

2. Pelh sawm den pen haina khat hi: Nuntakna pen phu ngamlo in pelhsawm den hipong mawk hi. Thadah a khutzep a ding, khutzep a tu, khutzep a lum cihna hi. Nasep ngaplo a om mawkmawk, sep theih ngaplo in kipan ngamlo cihna hi. Tua bang nuntakna in i nuntakna laamto hetlo in siasak zaw, phuksuk zaw hi. Hazatna zah mah in huaisia a, hazat manin zong pelhsawmna lungsim piang thei hi. Midangte phazolo ding ka hih leh kipan vet dah ning e ciin nuntakna maban zomlo in tutkhawl, dinkhawl hi. Tua bang nuntakna pen 'pelh a sawm nuntakna' hi gige hi. Nuntak ngaplo zong kici thei hi. Ama thadahna in ama nuntakna thazawmsak dinga, a seploh manin thaman ngahlo ahih manin zawm semsem ding hi.

A phu ngamlo mi khat in ka hihsa hi, ka sepsa hi, ka hihtheihsa hi ciin sepbeh ut nawnlo hi; sepbeh kulsa nawnlo hi. Maban zop sangin zu leh sa tawh kidiah in vaithaamna leh computer mai ah internet sun nituma tutpihna khawng tawh hun beisak zaw thei hi. Hazatna neite leh nuntakna ngeina a pelhsawm te in a haksatna tuah uh a kibang hi a, a nih un huhna a kisam uh hi. Tua nih bek hilo in a midang tawh kikholh loh ding limlim utna nangawn piang to lai thei hi.

3. Midang tawh kikholh a utlo kilkel dinmun: Midang tawh kikholh ut kilkello te dinmun na ngaihsun kha ngei hiam. Tua bang mite pen a lawhcin mahmah hangin a hehpihhuai mahmah himawk hi. Khiatna neilo lawhcinna tawh kibang mawk hi. Banghang hiam cih leh a lawhcinna gah kuamah in nekpihlo, ciappihlo, theihpihlo, hamphatpihlo, lemlawhlo cihna hi. Lutang khat bek hamphatna dinga lawhcing hitazen hi. Kua mahmah in a lawhcinna bangzaha thupi hiam cih telpihlo hizen hi.

Mi lawhcing tampite a kidot ciangin a lawhcinna uh a lungdampih ding mi a om kei leh a lawhcinna uh a thupina omlo cih gen ciat uh hi. Mihau hihen aw, mipil hi hen aw, mi melhoih leh mi minthang hitaleh amau beka lawhcinna pen deih khempeuh nei napi in lungnopna om kilkello nuntakna hi ciin gen ciat uh hi. Na lawm leh na innkuanpihte in hong lungdampih kei leh na lawhcinna zong a mawknapi ahi hi. Tua banga hong uap, hong bawm, hong delh a om kei leh khatvei tuahphat mahmah na bek hilel a, a tuahphatna in a nuntakna ah nopna, lungdamna, lungkimna, lungnopna pia kilkello ahi hi. Lungdamhuai mah si e cih pih ding a neilo hizen uh hi. Mihau mahmah tapa hinapi mizawng mahmah nuntakna a nei himawk hi. Inn ciah leh zong a hawmpi innsung bek ah lut a, a hopih ding, a uap ding, a kikholhpih ding mi omlo hi.

Lawm neilo mi bangin na nungta kha hiam? Na lung a nuam takpi hiam? Na lungnopna ding na mu takpi hiam? Lungnopna ni hong om nave na ci ngei hiam? Nasep hoih mahmah ka neih ciang lungkim ning na ci maithei hi; up huai tuanlo hi. Zi leh ta nei in inn leh lo ka neih ciang ka lungnuam inteh na ci mai kha ding hi; um tuan khang. Nasep na nei a, sum leh pai kicingzaw deuh in zi leh ta neiin innkuan in na om a na lungnuam tuanlo hi. Lungnopna delh in na thapai a, na lungnop ni ding galdon in na hun a bei hi. Sun ni tumin muikhua zinga khuamial bek mah na zawt kik zel hi. Nopna zingkhua hong vak ngeilo a, lungnopna koi ah om hiam, lungnopna bang hiam ciin na zong toto lai hi.

Thukhupna: Nuntakna pen hazatna tawh zat ding hikei, nuntakna haksa lua ciin pelh sawm ding zong hi kei, khat guak bek in lawhcin zong a khiatna om kei - mite khual inla, mite tawh kikhawl in mite tawh nuamsa in. Pelh sawm kei inla, haksa taleh phu teitei in phusuak inla mualsuah in. Tua khempeuh khenlam ah lungnopna nitang in maitai takin hong na ngak ding hi. Lungnuam takin pai inla, nopna nitang ah nuamtak in na nuntakna hun zangin. 


Hau Za Cin
Phuitong Liim
www.hauzacin.blogspot.com

 


Comments




Leave a Reply