WWW.TUNGZANGNEWS.COM

 
ZOLAI SIMBU BAWLZIA by H.Gin En Cin

Pasian in Zomite' Goupi hong kepsak ka matutna  Zokam paute khempeuh tungah kong ko hi.

1907 pawlin A.E. Carson le Dr. E.H. East-te in Zolai bawl na kipan khin uh hi.  Dr. Cope in 1913 ciangin Zomi sia masate tawh na zomto-a 1923 kumin zat theih dingin na zo khin uh hi.A zawhsa uh Laibute: Zolai Simbu Tankhat, Tannih, Tanthum le Tanli laibute, Gamthu Bu, Nate Thu, Cidam Thu, Ganan bute ahi hi.  

1925 Kumin a kizosa laibute, Tanli  Zolai sangte ah kizangpah hi. Sang kikah theih loh hun Japan galtun masiah  limtakin kisin hi. Japan gal khit ciang 1964 dong Kawlgam hun kikhel hun sung teng sang kikah ciangin Lai Simbu teng bek kisin ta hi. 1964 kum  kumpi kilaih ciangin zong Zolai Simbu teng bekmah kisin a adangte mikang in kisina Cope bawl Zolai Simbute kipuah tuan loin 1972 kum dong kum 47 sung kikhel loin kizang hi.

1972 kum (Chin Usi hun) ciangin  Zolai Simbu puahphat ding kipan hi. ABC Chart , Tanlang, Tankhat le Tannih ciang kipuah pha hi. Tua a kipuahpha Lai Simbute  kum sima a kizat theih nadingin Tavuan la dingin H. Gin En Cin, Cope Memorial Press manager kiseh hi. Tua huna kipuah Laibute 1978 dong kizang hi.(Tuate a kipauh hunin Pu Mang Khaw Nang  TEO sep hun hi-a Tedim khua sunga Zolai siam mi pawlkhat tawh kopa kipuah ahi hi.)

Pyithu Council term nihna hun 1978 – 1982 hun sungin 1972 kum a kipuahsate khatvei kipuah kik leuleu hi. Hih hun ciangin Council Secretary Mr.Kam Do Thang Chairman, TEO  Secretary hi a, Tedim khua sunga Zolai Siam thum le NUP Party Secretary tawh Committee ahi hi.

Tua hunin Siapi Lam Za Tint  Tedim ah  S.H.S sang siapi hi a, Tedim a sang sia sem Sia Kam KhanThang, Sia Tawng Khaw Thang le H. Gin En Cin (Press manager) hun bitin puahsak hi. Kha khat val a puah khit uh ciangin Tanlang pan Tanli dong zo siang uh hi. Committee in enpha in kipsak uh hi. Tua huna kipuah pen Zolai sangte ah tuni dong kizang hi.

Hih hun ciangin Lai Simbu lo buang kisinnawn lo hi.  Zolai Simbu pen Zolai baihtaka sin theih nadingin  a olpen pan a haksa pen dong abanban-a sin nading (systematic) a kibawl hi a, khel nading om loin tuni dong kum 40 sung bang kizang ta hi.

Hih Laisimbu pen Tedim Tsp, Tonzang le Cikha Tsp.te a sangte ah kizang a, tuate ban ah Kawlzang le Leitung mun tuamtuama Zomite in Zolai sinna-a i zat ahi hi.

 A kipuah masak hun 1972 kuma kipan a kem cing ding le kumsim a kisamsak lo-a bawl den dingin Laisimbu bawl Committee member ahi Cope Memorial Press Manager H.Gin En Cin tavuan kipia hi. Ama thu loin kuamah in a bawl loh nadingin thuneihna zong kipia hi. Tavuan a kipiak bangin kumsim in kisamsak lo hi.

Dr. Cope bawl Zolai Simbu te puah loh a a kizat  kum 47  sung bang  ahi hi.

Committee in a puah khit ciang H. Gin En Cin tavuan a kipiaka kipan kumpi in a khet kik dong kum 40 sung bang ahi hi.Tua hi a 2013 ciangin kumpi in na lai uh sin theih dingin hong bawl un a cih ciangin Tedim a TEO sem  Pu Ngin Khan Khual makaihna tawh H. Gin En Cin le Tedim a Zolai Simbu Comitee a damlaite le Tedim khuanu khuapate tawh enpha in a kipsak khit uh ciangin Kumpite bawl dingin kipuak hi. Tu-in a kikhetsan laitak ahi hi.

Tua hi-a Pasian in i mipih Zomite adingin kum 40 sung bang hong zat khit ciangin kumpi in hong zatsak kik ding cih ka theih ciangin Pasian  zat theih ding mi tampi om napi kei penpen Pasian in hong zat manin Pasian tunga ka lungdamna hih lai a ente khempeuh tungah kong ko hi. Pasian in i Zolai Ama kammal sim nading le pilna namkim sinna a i neih theih nadingin hong zangsak thei ta hen.

H. Gin En Cin  D.D.
Zolai Simbu Committee tang
Yangon. 
 


Comments




Leave a Reply