WWW.TUNGZANGNEWS.COM

 
Ni 14/10/13 ni zingsanglam nai 6:55 in lawmte khat in,lawm Sia. Do Kham si cih nazata hiam,ci-in message hong khak-a, a ciamnuihna sa-in ka thudon kei hi. Nai 8:50am in khat-in hong khak leuleu a, nai 8:7am pawl in khat in hong khak leuleu hi. Ka lungsim hong vut mahmah a, Zomite PA khat in hong nusia takpi ahi tammaw, cikawm in dahsi hang e, mawtaw ci-in ka thuk kik hi. Ahih hangin ka umzo taktak naikei hi. 
UNHCR Zum ah Chief of Mission leh UN Officer te tawh R vai Meeting nai 11:00am a, neiding in aki ciamkhin ka hih manun tua munah Zomi tampi tak-in a lunggulh na gamuh atun theihna dingin laibawl, lai print in kabuai a, lawmte'n zong hong ngak zolo in hong na paisan uha, UNHCR Zumpi ah ka kimu uh hi. Meeting manciang in Australia Embassy ah kaban toh leh a sun-ann neek uh tawh na kituak ahih manin agei a, Nehru Park ah lamka vasiau phei hi. Tuakawm in ka lungsim sungah Sia. Do Kham si cih zingsang a, ka zak pen in ka lungsim hongdo' denke ahih manin a taktak mah aham, ci-in Pastor. TK.Lianpu ka Phone leh himah ei, sabiang buangke  ingei, cikawm in hong gena, a sih dan US a, a UKham genna hong ngaihsakh teh ka upzo pan hi.

Hici bang thuteng kazak ciangin US panin Delhi ah hong zinlai in Zomi Innkuan makaite a tunna HOTEL ah hong ki muhpih in ann hong neekpih in thu tuamtuam hong kuppih banah Zomi Innkuan Zum akhe mahmah tawh hong siikngiat hunte ka phawk ka mitkha ah hongluai dandan hi. New Delhi Bible Bawan ah Zo Sian Khual tawh Cialpi hong bawllai in thu dongnuam naom uh leh ci-in hun hong' honga, mipi mai-ah thu pawlkhat ka dot hunlaite ka ngai hi. Tua hong zin hunlai in Mizogam makai Pu Lalthanhraw tawh kimu in mailam ah Zomite tawh ki zopkhop ding dan leh a zi a tate Zogam siikpih ngiat in a pianna khua ah, ama nuntak ziate ensak sinsak in bawmpua in tui tawisak ding, tutawi in lo khosak ding cih leh a tuamtuam a lunggulhna tampi a gente thupi kasa hi. A visiting Card khat zong hong pia a, ka lungdam hi.

Sia. Do Kham(Rev. Dr. Chin Do Kham) pen Zomite a itzia, a pattah zia, a makaihziate etteh tak mahmah kasa hi. Zomi khangno tampi tak pilna sangpi tungsak in, US leh gamdang mun tuamtuam ah tungsak hi. Zomi kipawlna ZYA, Zomi Innkuan leh Zomite ki pawlna biakna lam leh a tuamtuam ki pawlnate adingin sum le pai, tha le ngal, pilna, siamna itsiit hetlo in nalian tampi semkhia khin hi. Leitungbup Zomi Innkuan leh Global Zomi Alliance a phuankhiate lak-ah makai in kihel in a mailam kalsuan ziading lampi tampi tak khunsak khin hi. Ama lampi hong sialpihte ei a damlai te'n limtak in zui-in tangtun in gahkhiasak le hang, amah zong, a lungdam mahmah dinga, I ki muh teh ka gimna, ka tawlnateng damta ei hongci dingin ka lamen phial hi.

Tulai tak Zomi akua mah peuh Sia. Do Kham hong nusiatna hangin i lungzuang in, I mailam kalsuan ziading tha hong nemsak mahmah hi. Zomi Council te makaih na tawh 3rd World Zomi Convention, Lamka, Manipur ah thu gending khat in kiseh a, Global Zomi Alliance, Tedim ah zong a makaipi, a thu vanpi khat ahih manin tukum Zomite Pawipi nih bel i lawpnateng hong kiamin ZNC/ZCD SILVER JUBILEE zong tukha 24 in Tedim ah ki bawlding a, mun tuamtuam ah Khuado Pawi bawl hun zong hilai ahih manin I lawpding zah in i lawp zonawn kei hi. Bang hang hiam cih leh Zomite hong it-in i omom na gamtuamtuamte ah hongpha hong don' leh hong huh hong panpih hang hi pelmawh khading hi.

 A mah bang,Zomi cikciang in hong piang kik ding hiam? Leitungbup ah Sang minthang penkhat ahi, OXFORD ah zong sapna ngah-in thu genna anei masa pen Zomi sungah amah hikha ding hi. Philippine leh US ah Professor asem masa pen leh leitung gam tuamtuam mun tuamtuam ah Pasian thugen in vak-in Vanleng tawh a kila ngiat masa pen amah mah hiding hi.  A lungduai in citak a, Pasian zahtak in mi tampi tak in gensiata leh thuk kikse loin amaute ading in thu ngetsak in ahuh theihna ding aom leh huhin panpih hi. CNA te'n i mipihte hong thahsak vai in zong ahih theihtawp suah in US Embassy a na semte tawh Tedim, Saizang leh mun tuamtuam ah ki thuah in mapang ahih manin Zomi salpha khat zong kici thei dinga, a nasepna te enleng Zomite hong itdan ki lang kasa mahmah hi.

Hici bang Zomite Aksipi khat in upmawh loh lamet loh pi-in US panin hong nusiat vat mawkciang in a theikha, a zakha a kuamah peuh ki surprise hi. Leitung lungsim tawh ngaihsunleng aluang mahmah zong Zogam leitang ah kiphum ngiat leh i ut hi. A zi le a tate ading in ka ngaihsutsak ciangin azi kampau in kabil hong vut mahmah a, amau omom na ah kivui leh bel a lunglen, a khuangaih uh nuamtuam  thamding ahih manin anih in hoih kasa tuak hi. A damlai Zomi makai te'n Sia. Do Kham etteh in khangthak khangnote ading in lampi sialsak in i gam le i minam puah-in zunni. Eite zong i hunding ki theilo ahih manin i damlai in i biak Pasian lehi gam le i minam ading in i neihsa, sum le pai, i pilna i siamnate itsit kei ni. Zomite Aksipi Sia. Do Kham bangin nasem ni.

Sia. Do Kham aw, nanua ciangah na Zomi pihte daidam lua ungh. Na phamna lailung ah kagel uh ciang, na seppih nalawm, na gualte, na innkuanpih na u na naute leh na mipihte sawlbang vul-in, luankhi tawh mal bang hong koko ung.Na heina tung thangvan Sian Anglai pan laukha bek-in hong vehzel in maw.

Hongphawk


Khaibawi
President
Zomi Innkuan Delhi
 


Comments




Leave a Reply