WWW.TUNGZANGNEWS.COM

 
Tuhun laitak pen Kawlgam bup aa ding ahizing in Kawlgam sung aa om minamtawmte aa ding ahizongin, Leitung gam liannih aa kikhen Zomite aa ding ahizong in hun thupi mahmah sung ah i om laitak ahihi.


1. Kawlgam bup ki ukna Thu khunpi, Thu mei let puahkik ding vai, koici puahding, bangteng puahding cihpen mipi tung ong kizaksak loh hang tukum December kha bei dong ngaihsutna akikaihkhop laitak hihtuakhi.


Hih mun ah Zomi bup in i lunggulhna koici pulak in, bang lampi tawn in pulaak thei ding ihihiam cih lampi i zonloh aphamawh ahihi.


2. Ong tungding 2014 ciang Kawlgam minam simna omding aa, hih minam simna ah, "ZOMI" ci aa kiciapteh zawh nading i hanciam mahmah loh aphamawh thu ahihi. Hihbang hunhoih, hunpha khangkhat in khatvei kingahlohi.


3. India lam aa om Zomite in kumpi ciaptehna district khat maw, nih maw Zomi mintawh ngahzawh nading nasiatak in akalsuan laitak uh ahihi.


4. I ngahdektaksa Tedim District vai mipi leh makaite kop in phuut kik huai tahi. Leitung kiukna ah district ciang lotawh vai kihawm theilohi.


Hih hunsung mah in minam Khawmpi tuamtuamte i sawm laitak ahihi.
Ongtung ding October 24 ni-in ZCD in partry pianzawh kum 25 cinna bawlding kinaak san mahmah laitak uh ahihi.


Tuamahbang in India, Lamka khuapi bulphuh in The 3rd World Zomi Conference pi, Oct 25 pan kipan ni 3 sung kinei dinghi.


Tuakhit Nipi kalnih a cin khit November 14 pan ni 4 sung GZA makai in Tedim khuapi ah makai khawmpi kineih sawm leuleu hi.


Hih hunsung mah ah Zomite i tuntunna, i omom na, i khua i tui ciat ah Khuado Pawi nasia tak aa i bawl laitak zong ahihi.


Hihbang vai thupi leh, minam kikaihkhop ding i sawm laitak in thusunna lian khat kong sung nuamhi.


Khuado pawi ibawl aa minam kikaihkhopna, minam party pawi ibawl zongin, tuhun sung in apawlpawl, alomlom in thusuah gina neihciat ding lunggulh huai kasahi.


1. India gam ah Zosuan Autonomous District ciang ong kipiak zawh nading.


2. Kawlgam thukhunpi sung ah minam tam Kawlte vaiding akigeel mahbang in minamtawm mualtung mite'n, amau' tenna munciat ah, amau leh amau thuneihna, ki ukna, thukhen theihna bukim aneih theih nading uh hel hamtang zawh nading


3. 2014 ciang "Zomi" cih minam min tawh dinkhiat zawh nading


4. Kawlgam ki ukna ah Zomi aa dingkhia gam teng in Autonomous District khatbeek aa dinkhiat zawh nading


cihte hih minam kikaihkhopnapi teng pan thusuahkhiat nei in, akisam bangin kumpi tung leh i gamciat aa political party ciat leh media te ah nasia tak aa "MIPI AW TAANGKO" zawh nading lunggulhna kibang, thusuah kibang, minam vai ah, "lawngkhat, aw khat in hangsan tak in khensaqtna kician tawh" i ginsak ding lunggulh huai kasahi.


Tua ahihman in,
Akhua akhua aa Khuado Pawi i bawlkawm in minam vai thusuah neihsawmni.
Amasa pen ZCD Kum 25 Khawmpi pan Thuusuah gina ong nei un
Anihna Lamka pan minam bup huamding thusuah gina neihsawm ni.
Athumna ah Tedim GZA Khawmpi pan Thusuah gina neih zawh nading sawm ding hihang. Crusade Cialpi bawl ding aa kikaikhawm suah loding hihang. Minam vai akisam bangbang geel, gen, vaihawm, semkhia ding hihang.


Tuakawmkawm in Zomite ongpiangsak Pasian mahmah in ong kalsuanpih nading tatsatlo Thungetna neihsawmni.

Hang Khan Lian

-- 
Hang Khan Lian
Block 646#13-115
Jalan Tenaga
Singapore 410646

 


Comments




Leave a Reply