WWW.TUNGZANGNEWS.COM

 
Picture
Zomite'n Zolai neihzawh kum 100 Jubilee pawipi kikhaamta
Dear In vekin,

Zomite in Zolai \simbu neih zawh kum 100 cinna pawipi pen Pasian' panpihna leh nomau teng thunetpihna tawh nuamtaki kipan thei khin ta hi.

Ih kizaksaknaom bangin zanitak lam 5:00 PM.hun lianin pawi honna nuamtak leh thupitain kinei thei hi. Tua tak ah Revd Tuang Khan Kap (Pyidawtha) in Mukpuak pum 100 a kikhih khawm, khau at-tatna hong nei hi.

Leenglapi diak a ka theih ka ciapteh khak pak teng hih a nuai a bang ahi hi. Revd Dr JM Ngual Khan Pau + Nu Dimnu, Dr.Hau Za Cin, Revd Khoi Lam Thang (BSM), Revd Dr Thuam Khan Thang, Revd Dr Thang Cin Lian (Yangon), Revd Dr Nang Sian Piang (TCC, Yangon), Revd Suan Khan Thang (ZBC, Champhai), Revd Sut Khan Thang (CBA, Churachanpur) te a kipan kham leh zang pan Pasian' nasem zahtakhuai siate tampi hong kihel thei uh hi. Revd Khai Khan Suan (D.D) zong hong pailai ding cih kiza hi. (Tua lo a dang ka theih pak loh pawlkhat om thei lai kha ding ahi hi).


THUSINNA LEH BIAKPIAK HUNBAWLDAN A TOMIN:-

Zanitak a kipan biakpiak kikhopna kinei pah hi. Hun-uk pen Revd Khup Khen Pau (Church Pastor, CMBC & Asst.Executive Secretary ZCLS) hi a, Revd Dr Thuam Khan Thang (Principal, BBC, Tedim) in hanthotna nasiatakin nei a, thupi mahmah kisa bangah cim om vet lo-in kingai hi. Revd Lian Khen Pau (GS, ZCLS) in thuzaksakna tuamtuam leh mel kilahna cihte hong nei hi.

Tu zingsan a kipan thusinna kinei to pah hi. Hun masa in Bishop Felix hong pai theih pak loh manin Lamka, CBA panin Revd Sut Khan Than (D.D) in thusinna ong pia hi.

Hun nihna pen Sia JM Paupu hi a, tha kingah lua mahmah ahih manin huncin lam bang kiphawk kha lo liang hi. A thu i gen zo vat kei ding a, Video leh Audio tawh limtakin kikhum ahih manin mailam ah i hawmkhia ding hi. Phone nei khempeuh leh MP 3 nei mi tampi in omna tek pan kikhu ngeingai a hong nopci sim tham hi.

Hun thumna pen Revd Khoi Lam Thang (Bible Society of Myanmar, BSM) in hong makaih hi. Ih Zolai neih hong kipat zia leh tuama hunte zong hong gen a, dotna leh dawnna zong hun tawmlai hong neih pih hi. Tuabang kawmkal ah Revd Suan Khan Thang (ZBC, Champhai) in zong pawlkhat mah hong genbeh a tel thak thu pawlkhat kibehlap hi.

Hun lina pen Dr.Hau Za Cin (Ph.D, Science) in Nate Thu leh thu hun cih tawh Power Point zang kawmin hong khil to ngiatngiat a, thuthak theihna tampi kibeh lap a, sensang kisa mahmah ahih manin hong dot ciangin dot na ding bang pen ki-am liang keei khatin hong koih hi.

Tunitak zong a nitak nihna biakpiak hunbawlna ah Revd Lang Suan Thawn (Director, ZACC & Asst.Pastor, KBC) in hun hong makaih a, Dr.JM Paupu mah in hanthotna hong nei a, akuamapeuh in kilunggulh ciat ahih manin biakinn in hong kita zo lo zah dongin thungai kipai a, a ciatnawk zong om het lo, hun siangtho leh thangahhuaitakin kizo thei hi.

Nek-le-dawn tawh kisai leh tanu nasep teng pen Innteek leh ZCLS in vaipuak hong la uh hi. Mi a kisam zah sangin a tamzaw kipai ahi hi. Zanitak bangin pen Zolam leh daklamte pawl kimalep khol a nasia thei mahmah uh hi. Numei lamsaina bang om liang hi. Zing lam ciangin a lici tampi om lai ahih manin tualsung a om, a paiban zo dingte hong kinek ngaih mahmah ahi hi. Paibaih kei leh innpua lam bek mah mu kingah zo ding dan hong suak hi.


BULLETING VAI.

Tua lo a dangte Subject dang khat ah Bulletin kong khak na sim le uh teh kitel pen ding hi. A kiet theih lohna a om leh hong theisak un. Video lam ah makai khat suak ka hih manin hun pen kingah khol het lo ahih manin tu'n hong zasak kik thei pan ka suak hi. Vainuamtak a a kizawh siang theihna dingin thungetna tawh hong phawkpih ciat lai un, ci-in kong cial uh hi.

Thupuak,

Peter Khampu
Media Dept. Zolai Kum 100 cin Pawipi
Tahan-Kalaymyo

Peter Khampu
CMedia, Kalay


 


Comments




Leave a Reply