WWW.TUNGZANGNEWS.COM

 
Kawlgam OM National Director Phuitong Liim Ah:



Kawlgam ah OM National Director Sia Zambawi (Rev. Dr. Go Chin Zam) Phuitong Liim ah hong tutkhawl. A hun manlah mahmah kawmkal ah hun tomno hong lengla in thungetna leh hanthotna limci tak hong neihsak hi. Ama genna ah Pasian i muanna pen a gol mahmah ding hi, cih uang gen mahmah hi. Mihing in 'hitheilo ding' cih lungsim tampi kinei mah hi, ahi zongin Pasian muang peuh leng 'hithei ding' cih lungsim tawh kikhek khin thei hi, ci hi. Mihing in pilna siamna kisam mah hi, zong kizong thei, kinei thei hi, tuate ban ah Pasian in hihthei khin hi cih upna, muanna leh muanngamna kisam pha diak hi ci hi. Gam khat makai, kipawlna lian khat ah gambup makai sem theite muhna leh upna leh mi nautangte muhna leh upna a kikhaihna hong langsak ahih manin thupi kasa a, hi kasa mahmah hi. Ama kamsung pan thanemna, khuisakna, hihzolo ding cih ngaihsutna leh kammalte zangkhia vetlo in lametna, upna, muanna kammal vive a pau khia makai picing Zomi sungah a etteh tak ahi hi. Gam khat kipawlna makai ka hi ciin kiliansak sese lo in ama sep ding teng sem mengmeng lel in a matutna teng zong kisialsial kei leh kilawm kasa hi. Ama tavuan zo in ama seppihte pattah zo ding a, ama makaih kipawlna in zong nakpi in a kumkum in khantohna kibehlap ding cih ka um hi. 

Zomi Innkuan kikhopna ah November 10, 2013 6:00 PM a thugenna ah "Na  muh nailoh thuphate hangin lungdam khol in," ciin mipite hong hanthawn hi. Muh nailo, ngah nailoh, theih nailoh thuphate hanga lungdam khol ding cih pen mihing ngaihsutna pan a omthei mah maw, ahithei mah maw cihnop huai hi. Kha Siangtho mit tawh en leng a kimu theilo omlo hi cih hong theisak hi. A piang nailo, a om nailo, a kithei nailo, a kimu nailo na khat, thu khat, vai khat, lawhcinna khat tawh lungdam khol ding cih pen Christian upna tawh a kituak mahmah khat ahihna hong phawksak kikkik hi. Vantunggam pen mihing mit tawh kimulo a, nak tawh a nam kiza lo in bil tawh zong a ging kizalo hi, ahi zongin upna mit tawh en leng a nopna kigenzolo hi. Tua bang a upna leh muhkholhna pen vantunggam adingin leh i kha ading bek hilo in i mihing nuntakna leh i nuntak sungin zong nakpi takin zat ding ahi aci nuam ahi hi. Mihing in Pasian i batlohna leh i phaklohna pen i ngaihsutna tom mahmah in tuni a i muh teng, tuni a i theih teng leh i zakkhakteng bek khawng a kium himawk hi cih hong phawksak hi. Christian te in a vanglian Pasian i neihna leh tua a vanglian Pasian pen nakpitakin phat ding, pahtawi ding, nakpi takin zong ama kiang pan thupha ngen ding, limtak in zang ding hi hang cihna hi.

I Pasian pen gol lua mahmah ahih manin ciil zat kei ni cihna hi. Nakpi in zang ziahziah leng zong a kizang khin zolo ding himawk hi. Tua manin kidam hetlo, kidek hetlo in zang ziahziah ni. 

Zomi Innkuan mah ah November 17, 2013 ni a thugenna ah i Pasian pen eite nuntakna ah hong ki innteksak hi cih a gen hi. Nang leh kei pen hong mi tuambawl hetlo in i nuntakna ah hong kihel nuam den hi, tua manin nang hong itna kammalte Singlamteh tung pan a thawhkik khit ciang kammal 7 a paute pan kithei hi, ci hi. Pasian pen a gamla om hilo in na nisim, tulaitak a nuntakna zong a tel mahmah leh hong kuppih nuam den pa hi, nang hoihna ding leh na khantohna dingin. Nang kong it hi cih a lahna dingin na kahna khituite zong Topa in ahang thei nuam hi. "Bang hangin kap na hi hiam?" ciin amah a kisialna hankhuk a vehte kiangah hopih hi, dong hi. A hopih ciang a min tawh sam hi. Na min thei hi. I min thei hi. Eite hong theihtel mahmah na thu zong mite kiangah gensawnsawn leng a deih Pasian hilai hi. Imcip, selcip cih bang deihlo hi. A guk tat, a kiselsim Pasian hilo in ahihna khempeuh a kilangsak nuam Pasian ahi hi. Thupha pia in khamuanna thu gen den hi. Samsiatna leh kona, mindaisakna leh selphona cihte a kam pan a kizalo Pasian hi. Thupha leh lungnopna a piangsak kammalte a genden Pasian a neite i hi hi. Tua thupha leh Ama hihna te mite tungah zong a tangko sawn zel dingin hong deih Pasian hi a, ei bek in hamphatpih, ei bek in nopsakpih ding a deih Pasian hilo hi. Mite, minamdangte kiangah zong a gen kawikawi dingin hong deih ahi hi. Ama hihna a umlah, a um ngamlo, a muangzolo a om tanghial leh zong ama khutmate lawngsak, ensak, musak in ama hihna a kilak khia Pasian ahi hi. Tua banga a telsut, a phincil leh a genhakte sangin lungsim siangtho tak leh muanngamna tawh a um pahpahte tungah thupha tamzaw ahihna leh thupha sang baih diakte ahihna uh zong a gen hi. 

Pasian mizia leh Pasian hihna tampi kicing takin hong gen ahih manin hih Nipini nihte manpha in tha kingah mahmah hi. Pasian mizia i theih khit, i tel khit ciangin i sep ding, i kalsuanzia ding zong kicing takin hong lamlak hi.  

Muhsa thupha tungah lungdam zah mahin muh nailoh thupha tungah zong nakpi takin lungdam khol ding Jesu nungzui Christian te ihi hi. Tua bang kalsuanna pen upna tawh kalsuanna hi a, upna takpi tawh a kalsuante in Pasian vangliatna leh ama hoihna a kicingin mu zel hi. 

Topa in Sia Zambawi nasepna leh kalsuanna ah thupha pia in Ama gam leh lei adingin a sepnate khempeuh ah mavan daupaina leh gualzawhna ban ah a sangzaw sem, a tamzaw leh a zaizaw ah Ama minthanna dingin hong zatsak semsemta hen. Ama minam adingin zong thupha luanna nak hong hidenta hen. 

Phuitong Liim ah hong tutkhawl kha ahih manin zong nakpi takin nuamna leh lungdamna ka pulak hi. 


 
Hau Za Cin
Phuitong Liim
www.hauzacin.blogspot.com
 
 


Comments




Leave a Reply