WWW.TUNGZANGNEWS.COM

 
Ciamnuih gen khat: Hau lua ding kisa, si phawt zuazen. (cihmawh vai lua)

Pasian thu gen khat: Inn dim in kham manpha na nei zongin, na kha hell gam tung leh tua neih leh lamte a mawkna hi. (a hi takpi mah hi.)

Cina khat: Cidamna ding a hih naak aa leh, i sih lawh phial zongin zatui i kisun ke. (Kisun kei leh sawt nungta zaw kha thei ding aive)

Siavuan khat: Na natna pen khuah lua ta a hihmanin, hih zatui pen na sih dongin na nek kul inteh. (Dam nuam aa zatui ne ding pen, sih dong ne ding ci mawk, dam dong ne dilo)


Mihai khat: Ekbuk dum sung ah kham (gold) khat kia in, tua topna ding aa, a uih teng bei na ding ci in acid tui buai suk. A ek teng keu in a nam bel bei pah sam. Tua khit ciang a tuak suk aa leh, a mah mahmah zong a mah tektek ii a buak acid tui in kang suk beh. (hih zongh hau lua ding kisa, si phawt zuazen pawl mah hi sa ing)

Gentehna thu a gen khat: Zawhngeu a vom a hizong, a kang a hizong, zusa a mat ding thupi. (inn sung siangtho aa zusa khawng a om mello aa zawhngeu it ngiat, a deih ngiat te in, a zawhngeu mel (colour) mahmah zongh teel uhhi ei)


Politician kici khat: Zomi i kici zong, Chin i  kici zong, i gam khantoh ding, i nuntak nop ding kisam. (na gam khangto mahmah in, na gam in ong kiciapteh sak nawn kei leh bang a khiatna om ding)

Kawlgam cih dan, N-Korea cih dante pen, gam khantohna mit tawh a hizong, political view point lam pan, social/  living standard leh education mit tawh a hizong
Political struggling level ah omin kigen hi.

Indonesia cih pian, Vietnam cih piante pen, gam khantohna mit tawh a hizong, political view point lampan a hizong, social/ living standard leh education mit tawh a hizong
Economic struggling level ah omin kigen hi.

Malaysia cih dan gam pawlkhat te pen, gam khantohna mit tawh a hizong, political view point lampan a hizong, social/ living standard leh education mit tawh a hizong
Social struggling level ah omin kigen hi.

India, China cih dan gamte pawl pen, gam khantohna mit tawh a hizong, political view point lampan a hizong, social/ living standard leh education mit tawh a hizong
Technology struggling level ah omin kigen hi.

Kawlgam zongh Political struggling level pan kahto zo nai mahmahlo sam hi. Ong kahto zo hileh, Indonesia te danin, Economic struggling level ong phuto ding aa, tua ong zawh toh ciang, Social struggling level ong tuak kha dingin, tua pan Technology struggling level ong tung ding ahihi.

Hih level teng pen, a tomin, mipil te'n PEST ci uhhi.
P zolo in E taktak kitunglo ding aa a zomzom in pailo aa T taktak ki ngah zolo ding hi ci uhhi. Ngah mah leh zongh kiplo aa sawtvei kimanglo ding ci hi. P tawh a buai laite pen gam khangto vetlo hi aa, T taktak a tungte pen gam khangto hita hi.

Step 1
Tua a hihmanin zongh, D ASSK in, khantoh ding sangin, Kawlgam pingpei thukhun puah ding lim genin neizaw hi. P thu zahin, T thu lim gen hetlo pah hi. 

Lam khat  pan, khantoh taktakna dingin Politic mah a zungpi a kisam a guipi ong hi penpen hi. Politic (ki ukna) ong hoih leh, thukhun hoih ong om ding aa, thukhun hoih, thukhun kip, thukhun muanhuai ong om hileh, nasep silbawl zia hong nuam ding ahihi. P level pan E level kitung ding ahihi.

Tua a ahihmanin zongh, Kawl kumpi in, gamdang sumbawlte Kawlgam ah nasep dign a sapsap hang, tawmtawmta bek ong lut tuautuauna a hang pen, thukhunte muangzo taktak nailo uhhi. gtn. business law te, kawlgam sung ah hingzo taktak nailo. P hoihlopi in, E level kitung theilo cihna ahihi.

Step 2
Kawlgam sung khua mukholzaw deuhte in, Crony te thu lim gen mahmah uhhi. P level ong kizo hi leh, E level ah kibuai lai ding cih a muhkholh man uh ahihi. Kawlgam ah sumhau teng pen kum sawm tampi hong uk khin galkap teng ii mi teng mah ahihi. Kumpi (government) bang khat in, hong uk loh uh hang in, kawlpau in (a yin-shin sa-nit) ong tun khak ding dahhuai hi. gtn. Zogam ah company ong bawl, industry ong lam uh in, Zogam leitang mun tampi ong lei uh or ong sap uh leh, Zogam leitang mun tampi ah Zomite in thu nei thei tuanlo veve ding hi. Tuate deihlo in phalna kipia kei zel leh, khantohna om ding hong haksa zel ding cihbang hong hi kawikawi ding aa tua pen Economic struggling level kici hi.


Step 3
E level hong hoih ciang, S level social ah buaina hong omto leuleu ding ahihi. Gam ki ukna hoih, thukhun gina cih ciang tawh, mimal khat leh khat, minam khat leh khat liangko kikim ding cih ziauh theih om hetlo hi. A thu bekin hi ding aa, kideidanna, kinenniamna hong om thei lai veve ding ahihi. gtn. nasepna ah a lian lamte tawh kithei te mah in maipha hong ngah lai veve ding hi. Hih pen kumpi ii sep hinawnlo aa, mimal or kipawlna khat in a neihsa uh tawh nasem a hihmanin, tulaitak aa Kawlgam pen gamdangte in hong saisai dan un, hong kisai thei nawnlo kha ding hi. Malaysia aa om ngeite in tel pen kha diing uhhi. Tua pen Social struggling level kici hi.


Step 4
(P) Ki ukna hoihin thukhun ong hoih, ong kip ciang, (E) Sum bawl paai bawl hong nuam pan ding aa,(S) neih leh lam, sumlut kilawm, kikim hong om ciang, a neizawte pum zahtakna cih bang hong bei in, khasum ong kikham ciang golh guk ong kiam ding aa (bei ding ci ngamlo), a pilte a pilbang in pahtawi in uliante ta a hihman aa pahtawi hinawnlo ding hi. A siamte a siambang, a hanciamte a hanciam bangun hong khangto in, a thei taktak a kiva taktak te hong kidawk ciang (T) mipil ong khang semsem aa, technology cihna ah, pilna tuamtuam gennopna hi in, khantohna taktak hong kipan thei pan ding ahihi. 

Tu laitak aa kawlgam khantohna cih pen, a hawmpi, a hawngpi bek ahihi. Singkung bang hileh, a zukha lopi aa, a gah ding a kiim a paam pan la in, a khai liapluap din mun ah om lai hi. Hih pen lamdawt (short cut) hi in, hoih hetlo hi.
Azung a khak kei aa leh tua sikung pen keu in sikik thei ahihi.

Zomite' sungah zongh, kipawlna khat bang khat in na hong sep ciang, a gah vive kien aa, zungkha maw zungkhalo cih pen et in kinei mello ahihi.
gtn. sum kidong kawikawi in, singgah va lei aa, en vo i singkung Zogam in gah nei ta ei cih ciang dinmun ah ki om lai ahihi.
Hih pen a sia hi peuhmahlo aa strategy benefit hilo in, emergency kiallap khop bek ahihi. Tuabang nasep zongh pen i kisap mahmah a hih sam hangin, zukha nasep (strategy planning) tuamtuamte i mangngilh khak ding dahhuai mahamah kasa hi.
Ahi pakpak, a min dawk zal, gualnop khengkhang pak, so henhan pak cih dan bek tawh minam pen kiksal suan theilo ding ahihi.
Vision neilo minam in mangthang ding cihi. Blue print kician, long term planning, short term planning tuamtuam te baan ah plan A plan B om zawh ding kisam lai ahihi.  

I zawng luat lai mahmah manin, zomite' lungtang ah nasep pen annekna ding, sangkah pen gilpi aa ding, i hihna bangbanag nek leh dawn aa ding kisa kha lai hi.

Na khempeuh sum (money) a hi kha phial zongin, tua sum khempeuh pen gilpi aa ding hi khin gai kha hetlo ding hi. A kitel ziau dingin gen lehang, sumhaute in gilpi aa ding ciang bek in na semlo uh aa, a mau ii lungnopna ding entertainment tuamtuam en uh, zong uh, bawlsak uh hi.

Atung aa i patna ciamnuihte tawh gawmkik lehang:
Zomite in i gengen Zogam khantohna ding pen step 4 na ah omin, ei level pen step 1 na, politic level om kitham lai hi. Kawlgam mahmah hi.

Tua a hihmanin, Zogam khangto sak nuam lua liang aa, minam zuak, Zomi nusia liang, nam dang pom, nopsakna ding khantohna ding a hih naak aa leh, Chin kici zong cih lungtang pen, lamdawt (short cut) ngaihsutna, zulhtat nopna leh a mawkna aa deihna, a baihsa bek ngahnopna lungsim ginalo ahihi.
Khantohna i gengente pen step 4 na ah om aa tanlang khat in tanli zawh ding gengen tawh i kibang lai phawt hi.

Chin kici in, Zogam khantohna ding semsem aa Zogam ei khut sung ah hong om tuan kei leh, a mawkna ahihi.
Hau mahmah napi in, khanggui mangthangte, pil mahmah napi in kua ma noptuam pihlohte pawl pen, gammang tulak aa singkung golpi ka ma zatloh leh phawk khak loh, a keuhun ciang aa keu, a mah leh a mah bek aa om cip tawh kibang hi.

Khantoh ding hah gen lua kisa aa Zomi leh Zogam i letcip kei aa leh a khan in bel ki khangto thei sam mah ding aa, a hizongin, tua a khangto Zogam pen,a  khangto Kawlte gam, Chin te gam cih hong hiveve ding a hihmanin, pilvang huai mahmah hi. Khantoh nop luatna in, minam hong zuak sak thei, ong bei sak thei in khantohna lo minam vai, ngeina, khansawnte aa ding cihte ngaihsun kha nawnlo aa hong mencip khak ding lauhuai mahmah hi.

Tua a hihmanin, Zomi, Zogam cih mah lenkip masa phawtphawt aa, tua tungtawnin, khantohna ding sep theih tuamtuam hanciam ding thupi penpen kasa hi.

Khangto lua ding kisa, si masa phawt a cih dan aa ciamnuih level pan P level taktak ah i tun zawh beekna ding in, a sisa Zomi cih min zum kong mangkong ah hong hin kik ding thupi mahmah ahihi.

Lungdam mahmah
Kei ii sanzia leh ngaihsut dan a hihmanin, kitelsiam ciat ni.
Topa Thupha

Tg. Lian Than Tuang (Tuang)


-- 
 


Comments




Leave a Reply