WWW.TUNGZANGNEWS.COM

 
30/9/2013 ni zingsang nai 2:30am in ka phone hong ging a ka phone ging in hong phawng hi. Zan 12 in alum ka hi a nai 2 sung khawng a ih muta ka hih man in ihmut suak lua in kua in phone hongset hi dih dih ding a hiam? Cih teltak in zong ka en kei hi. Ka phone ka let leh “Lawm aw, ko kiang ah Operasi hong lut in ka lawm te palik te in man mang uh hi. Tu lai tak na inn nuai vuah om uh a na ki dawm mah mah un” ci in phone pan aw khat ka za hi. Hih thu kazak lian teh ka ihmut suah mah mah pen hong bei vat a ka pilvang hi. Phone hong set pa pen ka inn veng te uh hi a, a mau om na ah Palik te a lut khit ciang ko lam ah hong lut sawm uh ahih man in hong lungphat mawh pih in hong zasak a hihi. Kei zong ka padenpauh pan un inn nuai ka et suk leh Palik mawtaw leh Palik te ka mu hi. Kalai sai…mawk aw…Operasi a ki cite hong lut taktak ding hi ta maw? Ka theih ngei loh leh ka kih tak mah mah thu atuak ding ka hi ta ve ci in lau mah mah sa in ka om hi. Ka zi bang in hong kiman kha leh cihna tawh a puan khawng na laih a, nau vanteng khawng tawh na ki thawi khol hi.Banghang hiam cih leh ka tapa uh neu lai hi. Ka khan pih te uh zong ka thei sak a, amau zong ko sang in lau zaw lai uh hi.



Palik te ka inn nuai vuah nai 2 sung ding bang om uh a, dip kua sa in ka om khin khian uh hi. Ka lungsim ah Topa in Tuubang a kei hong cing pa hi a, bang mah ka lau kei hi ci in kei leh kei ka ki hangsan sak hi. Zing sang nai 4:30 lamciang ka innnuai pan un palik te pai khia uh a, tua khitteh ka dip uh kua kua lai in ka ih mu theikei lai lai uh hi.Palik te in ka innnuai uh pan in innkong khak nih a om lak ah ko inn ah hong lut lo in ka innveng te inn lam uh ah a lut a hih lam a zingsang ciang in ka tel theih pan lai hi. Ko inn ah zong hong lut nuam hi le uh pen nak ol lua mah mah hi. A hizong in ko inn ah hong lut lo a, ka inn veng te inn ah a lut sese uh pen lamdang kasa hi. Kongvang nih a ki zom tin ten mun khat ah kong vang khat ah lut sese uh cih pen banghang himawk ahihiam? Ka phawk thu khat hong om hi.


“Note om na inntung a sisan in note a ding in lim hi ding hi; sisan ka muh ciangin note kong pai san ding a, Izipt leitang ka vatgawp ciang in note hong susia ding gimna note tung ah hong tung lo ding hi.” Paikhiatna 12:13


Israel te in Izipt gam pan in a pai khiat ni ding zan un thu piang ahihi. Tacil khem peuh Topa in ka vat gawp ding a, ka si sak ding hi ci hi. Tua haksat na dahna sung ah na om loh na ding un na innkong khak tung uh ah tuno si, keel no si, ganno sitbang lo khat go in na inn kongkhak tung uh ah a sisan na tatding uh hi. Tua sisan a kitat na inn pen vantung mi te in tacil khem peuh a sihsak na ding pan un paisan ding uh a, sisan a ki tat lo inn khem peuh pen tacil khem peuh sisak ding uh hi cih a hihi. Ko inn ah Palik te hong pai loh na a hang pen Topa in hong om pih in hong kep man bek cih ka tel theih hi.


Tua bek hi lo in 29/10/2013 ni zingsang nai 2:30 am in nasep na pan kaciah leh lampi ah Palik honkhat in inn khat na buluh leuleu uh a, khuamial pian tawh bang mah thei lo in ka palphei bengbeng lel hi.Ka muh lian ciang in lah Palik te tawh ki maingat ta ka hih manin ka tai thei nawn kei a kei bel hong sit taktak ding uh ahi ve maw ci in ka lung sim a lau hi. Tua lai tak in “Sihna lim guam sung na ngawn ka nawk hang in siatna ka kih ta kei hi. Banghang hiamcih leh na moh tum leh na ciang khut in kei hong lung muang sak hi.” cih ka lung sim ah hong om a, lau na bei in laulo tak in ka pai phei vetvet lel hi. Lau pai lo ka hih manin palik te in zong gamdang mi hongsa lo uh a, hong sit lo uh hi. Topa hoihna hang bek mah hi cih ka phawk hi.


Na inn kong tung ah tuno sisan na tat ta hiam? Na lungsim leh na nuntak na ah Zeisun sisan tawh na ki sukha ta hiam?Nang leh kei mawh na hang in Zeisu in singlamteh tung ah sih na hong thuak hi. Tua Zeisu sisan ih kong biangtung, ih inn sung, ih lung tang sung leh ih nuntak na khem peuh ah ki zeel sak ding hi hang. Ei te in Zeisu sisan hang in a gual zo ding te ih hi hi. Zeisu sisan in hong tat na thu a tel siam ding in laisim mimal kimTopa'n thu pha hong pia ta hen.

.....Deih Tung.....

http://vunghdeihtung.blogspot.com/

 


Comments




Leave a Reply