WWW.TUNGZANGNEWS.COM

 
Makaihzia Nam Nih



Zomi sungah makai a sem tampi kiom a, zong kimakaihzo mahmah hi. Makaih zo lua liangin kitaalkaih phialphial zong om leh kilawm dekdek thei hi. Makai nam nih om kici a, khat pen kiniamkhiat taka a makaihte ading sem ahih kei leh a semsuah makai (servant leadership) hi in khat pen a ukcip kawma makai sem ahih kei leh a nengcip makai (serpent leadership) ahi hi. 

A semsuah makai in bel a makaih mite hansuah in thapia in lawpsak in tawsawn den hi. A siamtawp uh, a theih tawp uh, a hih theih zah uh a sep zawh nading, a sep utna dingin pattah den hi. Mi khempeuh ngaihsutna leh hoihsak bang hiam ciin thudot bawl den a, a muhna uh leh a theihte uh zong thupisimsak in a zui khinpah kei zongin lei denna pahpah lo hi. Amau thu a kilak loh hangin a seppihte in tua bang makai tawh sepkhawm nuamsa in kikup ciauciau, kidot ciauciau leh tutkhawm liliai a nasep pen kha lianga lei kidenna pahpahte sangin nuamsazaw thamtham uh hi. Tua banga kikup liailiaina mun ah makaite leh makaihpihte, mipite in a sunmang uh a lunggulh uh suakta takin pulak ngamin 'khentatsa' bek zuih cih omlo hi. Tua manin a makaipa uh pen u bang, pa bang, nu bang, sia bangin en theiin a thumang uh hi. 

A ukcip makai namte in a tunga tawh kilehbulh linlian hi. A hehna a thangpaihna leh a deih bang a kiseploh ciangin a nuaia te tungah tu in hansuah, ko, samsiat phialphial in awsang tawh hawk baba pahpah hi. A kim a kianga singkhuah suangtum manin lei a denna, a tup man tum, a suih man sui, a nawk man nawk in humpi lungham bang vompi halung vei bangin gamta a, a nuaia teng tawpsak ding, khawlsak ding in phin gawp pahpah hi. 

A semsuah makai leh a ukcip makai namte a kibatlohna pawlkhat hih bang hi. 

1. A semsuah makaite in a seppihte muangin amau muanna zong ngah a kihotheihna leh thu kikup theihna hoihtak nei uh hi. Kiho theihna leh kikholhsiamna hangin kizahtakna leh kimaingapna khangsak a, sepkhawm a nopna leh a lawpna uh khangsak in matutna ding lawptak in nasem khawm sak hi. A ukcip makai namte in bel kuamah muanglo in amah bek kimuang in mite hawmthawh a, amah a kimuan zahin a seppihte in na muanglo kiukiau thei uh hi. Lauh mana thumang bek khawng hi thei in a zahtakna uh tawh a thu mang hilo zaw hamtang hi. Kimuanmawhna leh kitotna piangsak in kikhenna leh kisiatna, kinopmawhna lianpi piangsak hi. 

2. A semsuah nuam makaite in mite itna lungsim takpi tawh makaih in a kisam bangin sem hiathiat uh a, kiniamkhiat in mite deihsakna takpi nei uh hi. Mimal nasepna bek khual hilo in mimal nuntakna mailam dongah a hoih in a pianna dingin khualtoto zo lai hi. A nasepna vuah a nopsak ding ban vuah a mimal nuntakna uh zong a lawhcing hidingin deihsakna tawh pattah thuah lai uh hi. A ukcim nuam makaite in bel ama ankuang leh a ma pakan bek ngaihsut in nei a, ama minphatna ding leh ama min kidawkna ding banah a za khanna ding ciang lel tawh nitumsak den hi. Ama angsung thei in mite muan leh muanloh sangin ama mimal lungtup a tun ding leh tunloh ding patauhpih zaw hi. 

3. A semsuah makaite in midang itna leh zahtakna tawh a kholhpih ban ah ama hihna linlian tawh kikholhpih a,  kineihtawmna om kikeuhlo hi. Tua bangmah in a seppihte leh a sepsak mipite in ama tungah a lungsim takpi uh tawh kikholhpih thei in kitheihsiamna leh kizopna kiptak kibawl thei hi. Tua banga kimuanna ah siamtawp a sem dingin mite kipiakhia ngam uh hi. A ukcip makaite in bel ama ngaihsutna leh ama hoihsakte bek mah thupibawl in midang ngaihsutna leh khuak limlim thusimsaklo in neu ngaihsutsak hi. Ama muhna leh ngaihsutna ah ama khuak hoihpen a, aman thei pen in amah siam pen a, a dangte khempeuh amah a zahin hoihzolo in a koih hi. Mite thusimlo in neubawl a, neumuh in ukcip lai hi. Mite sepkhiat om leh zong ama ngaihsutsa a sem uh hibel lel a, mite in a ngaihsutna uh pan a sep uh hisak thei mahmahlo hi. 

4. A semsuah makaite in mi khempeuh khuak kibanglo hi cih ngaihsutna nei in mi tuamtuam ngaihsutna tuamtuam kaikhawm siam uh hi. A kim a kiang uh pan ngaihsutna hoihzaw a om thei lai ding hiam ciin kanbeh zaw in mite suakta takin a lungsim uh a pulak theihna dingin muanna guang, neisak hi. A ukcip makaite in bel gul gunei bangin a pau khat om leh hap pah lian, a gen khat om leh hawksan pah  lian, a kamka khat om leh a kam humcip sak pah lianlian hi. A seppihte kilausak in a seppihte linglawngna tawh nasemsak hi. Ama lungkim nading a gensiam siam a pakta zawsop hi. A hoih peuhmah ama pat hisak den a, a sia peuhmah a dangte ngawh se hi. 

5. A semsuah makaite in midangte zong makai a sem dingin pattah in sek toto a, makaihdan nangawn kisin sak hi. A khialhna uh a om leh hangsan takin gen ngamin a kisapna uh hilh ngam a, kitheihmawhbawl, kimuhloh bawl cih bang hilozaw in a hoihzaw ding lamlak in haksa taleh hilh, gen ngam hi. Mite pattah siam in a nuaiate zong a hih theih zah in kisinsak hamtang hi. Gamtat hoihte mite maiah pahtawi a, gamtat kilawmlo a om leh mite theihloh in thuhilh in tai ngam hi. A ukcip makai in bel amah sanga minthangzaw ding, amaitang kidawkzaw ding a om peuhmah leh sumit pah, khawlsak, koihkhia, hemkhia in a min kidawkloh nadingin bawl pahpah hi. Amah simloh a min neizaw, a thupi theizaw dingin kuamah khangtosaklo hi. Midangte pattah ding cih thadah amau leh amau a kipattah, a khangto nuam om taleh sawllo, thukimpih lo in nengcip, sikcip zaw lai hi. Itna leh deihsakna neilo cih bek hilo in hazatna leh itsikna tawh hawlkhia, khawlsak hizaw lai hi. 

A ukcip makaite in a tungpan in uk suk uh a, thu khauh, kam khauh leh thatang zat ding phamawhsa lo uh hi. Mite sawl ziauziau in a ut leh a deih uh semsak lel a, a sepzawh kei uh leh makai dinmun pan lakhia in a dang ama thumang ding khat lamsang lel uh hi. Ama thumang ding a om kei leh a thuzawh penpen semsak lel a, a hoih a hoihlo cih omlo ama hoihsak bang a semte a hoih hiziau lel hi. 

Tua bang makaihna pen tuhun ciangin kizang thei nawn phalo napi a zang mah om lai veve hi. 

Tuhun kiukna leh kimakaihna pen mite lamsang ding, mite pattah ding, mite khangtosak siam ding cih hita a, mite a lawpsak thei, mite a kikholhpih siam, mite a lungdam sak siam, mite a thalawp mahmaha sem ziahziah thei dinga tawsawn siamte kizangta hi. Mite in a makaipa adingin a sih dongin muanhuai in a tha leh ngal, a sisan nangawn itlo in a piak ngam ding a kidem uh hi. A hoihlam in kimakaih cihna hi a, angsung theihna leh mimal kilapsangna bek hilo in mibup kilapsangna lam ah kal kisuanta cihna hi. Mi a tam lamsang siamsiam makai hoih hita a, mite a sikcip a nengcip, a ukcip nuam makaite hun kipel khin thamthamta hi. 

Tua ahih manin a semsuah nuam makai hizaw inla, a ukcip nuam makai hinawn kei in. 


 
 
Hau Za Cin
Phuitong Liim
www.hauzacin.blogspot.com
 


Comments




Leave a Reply