WWW.TUNGZANGNEWS.COM

 
I minam sungah mipil khat ahih banah Kawlgambup Bible Society ah General Secretary dinmun ah Pasian in hong lapsang sak leh, minam bupin ih angtanpih mahmah Rev. Khoi Lam Thang pen pianna Zogam panin Malaysia gamah 20 November 2013 Wednesday ni ong tung a, Nov. 25, 2013 ni zingsang nai sawm le alang hunin pianna gam zuanin ong ciahsan khinta hi. Nov. 24, 2013 Sunday 9:30 PM - 12:00 PM dong ama' tunna Hotel Room sungah itna Kam kikum khawmin dotna le dawnna tampitak ka kinei uh a, ong gen thute manpha kasa mahmah hi. Video zong hoihtak ka kizaih uh a, damin kong suah khia kik ding hi. Tuate' sungpa'n Pawlkhat hong hawmsawn ing. Anuai abang ahihi.


Hungpi: Sia aw, Malaysia nong paina vai nong genthei diam?
Rev. Khoi Lam Thang: South East Asia Bible Society meeting kah dinga ong pai hi ing. Gam guk pan kituah khawmin gamkhat ah mi khat, mi guk mah phapah ung.

Hungpi: Sia aw, Kawlgambup Bible Society ah alianpen na suah zawhna bang hang hiding hiam?
Rev. Khoi Lam Thang: Pasian hehpihna bekbek hi. A dang bangmah om kei.

Hungpi: Tua ahih leh pil sinna, na Degree te nong gen thei diam?
Rev. Khoi Lam Thang: Secular ah, B.A (Philosophy), M.A (Linguistics) ciang nazo ing. Biakna ah. B.Th., M.Div., M.Th ciang nazo ing.

Hungpi: Secular leh Biakna ah Degree kician angah khawm Zomi sungah nangbek ong theipan ing.
Rev. Khoi Lam Thang: Mi adingin bang mah gentham ding hikei e. Ahizongin Topa' thupha hi ci ing.



Hungpi: Sia aw, na pianna bang Khua ahia?
Rev. Khoi Lam Thang: Ka pianna Khua pen Cingpikot or Keizang zong kici in, Tedim Township sungah om hi.



Hungpi: No' Khua panin mi minthang nangbek mah nahiam?
Rev. Khoi Lam Thang: Mite' gentak ding ka omloh uh hangin, Ko Khua pen Pasian in nam nih in thupha ong pia hi. Khat pen Sang-Sia sepna ah minphatna angah pawlkhat ki om in, khat pen Pasian nasepna lamah Pasian in ong zang in ka kimu uhi.



Hungpi: Kawlgam bup leh Leitung bup ah mi minthang bangzah na om uhiam?
Rev. Khoi Lam Thang: Pasian hehpihna tawh Pa Hau Do Suan pen Kumpi in ong muansak mahmah khat hikha citciat in, Canada gamah Ambassador dinmun tawh nasem in om hi. Siapi Tuanno cih leh amanzong Piada nihsa pan hiciang atung hi'ng ongci hi.



Hungpi: Sia aw, Khangthak te' adingin online zatzia leh lai gelhzia pawlkhat nong hawmsawn thei diam?
Rev. Khoi Lam Thang: Online leh Email zangin lai ih gelh ciangin, adiakin Zonet leh Tongsan Group cih bangte ah pawlkhat pen kitomsa banga laigelh om hi. Mimal kikona, mimal ki selphona cih tepawl zat huailo a, Group ah laimal khat ih gelh pen Mi tampi in asim himawk ahih manin, Ei guak, ih Computer maiphah a, kisuak tasakin ut peuhpeuh gelh khak ding pen kidop huai mahmah hi. Lai ih gelh ciangin, ih Laimal le Laigual mahmah sit kikkik in khialhna omlo tak a khah khiat theih ding thupi masa hi. Tuateh ih Laigelhte mi tampi adingin phattuamna leh kipna apiangsak takpi hiam cih sit kikkik ding kisam hi. Tua banah Lai kigelh khat peuh ek-khanam zen a kiko pen mihing vai hetlo a tua dinmun ah Zomite ih Khuasa lai hi.



Hungpi: Sia aw, Laimal gawmzia pawlkhat pen, double vowel le inn, tuu cihte pawl nong hilhcian thei diam?
Rev. Khoi Lam Thang: Double pen zat vet loh ding hoih pen hi. Ahizongin, "Inn leh Tuu" ah Cope Topa' bawlsa mah bangin kizang toto hi. Gentehna, Biakinn, Tuuno cih bangin Inn leh Tuu lian bek ah "double 'n' leh 'u' " kizang hi.


Hungpi: Sia aw, Hyphen bang munte ah kizang ahia?
Rev. Khoi Lam Thang: Hyphen pen khiatna kilamdang sak "vowel" munte ah kizang bek hi. Gentehna, Amah agilna ahih manin, Zato ah ki-at hi.



Hungpi: Sia aw, kimu pana zingteh nang ong ciahsan sawm mawk lungleng si in cia maw.
Rev. Khoi Lam Thang: Tutung kong zin pen hun toilua mahmah in keilam pan kicin lahna hangin ZAM zum zong ong phazo keng.


Note: Rev. Khoi Lam Thang tawh holimna hun limci takin kana bawl thei uh a, manpha kasa mahmah hi. Linguistics ngiat tawh Master Degree ngah khat ahih banah, Kawlgambup Chritian Biakna tawh kisai, Bible Society ah alianpen ahihna tawh kizui in, amuhna leh atheihna kicingin picing mahmah a, lai tawh kisai zong tampi theih behna ngah kahih manin, amah tawh ka kimuh khak hampha ka kisa mahmah hi. Hibang mipil ih neih khak manin Zomibup aitangin Pahtawina kana pia hi.



Dal Sian Hung
Zomi Foundation Home Mission
Kuala Lumpur, Malaysia.

 


Comments




Leave a Reply