WWW.TUNGZANGNEWS.COM

 
Zomite' sungah,khua tuamtuam,biakna tuamtuam leh pauzia(aw' suah/kaih)tuamtuam i om hangin,i vekpi-in,nam khat,sa khat i hi-a,leitung munuam,gamtuam ah i teeng/om zongin,Zomi i hihna bei thei lo hi.Tua banah Zomite' sungah,A pil/siam i om mah bangin,a hai ki om a,a hau i om mah bangin,a zawng zong ki om hi.Dinmun leh nuntak,khuasak ziate kibang loin,koimun koikuam-ah i hei zongin,Zomi i hihna sungah pumkhat,sakhat tawh a nungta khawmte i hi hi.

Zomite' sungah gam leh minam it in,a vei mahmah i om mah bangin,a it khol lo leh a vei khol lo pawlkhat ki om veve a,ahi zongin it-in,i vei a,mudah in,i vei kei zongin,Zomi mah i hi veve hi.Gam leh minam it in,vei ing ci-in,gengen in,i gelhgelh hangin zong,i lungsim puakzia taktak leh i nuntak zia taktakte limlang et banga kimu thei ding hi leh,itna maan leh veina maan taktak anei ki tam muh hetlo ding hi.Kei a kipan,a kuama tek pen,ei om mun ciat-ah,a ciak thei,a gen thei leh a gelhgelh thei bek i hi-a,mit a muh theih dingin sepkhiatna taktak tawm mahmah hi.

Hi bang ka gen ciangin,midangte bek a gen hi loin,kei mahmah zong aki gengen ka hi hi.Kei mahmah in zong,Zogam leh Zomi adinga kasep theih lian penin,nisim in tatsat loin thungetsakna lian bek mah hi-a,mit a muh theih in,Zogam leh Zomi adingin kasep peuhmah bangmah om lo hi.Ahi zongin Zogam leh Zomi adingin geelna, ngimna lianpi ka nei-a,a taangtung nai lo hi zaw hi.Hi bangin,Zogam leh Zomi adingin thakhat thu-in,kasep theih pah loh hangin,Zogam leh Zomi adingin geelna,ngimna hoih ka neih theih pen,(kuama phawkpih loh khat-in),ka lungdamin ka ang'tang sim mahmah hi.

Zogam leh Zomipih khempeuh,itna maan tawh ka it a,ahi zongin Zogam leh Zomite' phattuamna dingin,bangmah sem khia lo ka hihna leh pilna,siamna ka neih lohna in,ka itna thu ka sutsut ding leh ka gelhgelh ding hong thanemsak hi.Tua ahih manin,Zogam leh Zomi tawh kisai thu leh gam leh minam it nading,khantoh nading,etc…,cihte ka tam gen/gelh ngam ngei kei hi.Ahi zongin,ka phawk giugiau thu khat in; "Zogam leh Zomite adingin,bangmah piakhia zo loin,bangmah sem khia zo lo hi mah ta le'ng,i omna kiu khat panin,kuamah in hong theihpih sese ta kei leh,a dah khat dahpih thei-in,a lungdam khat lungdampih thei-a,thu i na ngetsak sakna pen,Zogam leh Zomite it-in,i veina khat hi,"cih thu ahi hi.Hi bang teng tawh Zogam leh Zomi adingin,kal khat suan phot ni.

(TAKKHEH ZOMI,Part II) Lamen lai hang. <<<<<<<<<<< David Tuang >>>>>>>>>>

 


Comments




Leave a Reply