WWW.TUNGZANGNEWS.COM

 
Dear U leh nau lai sim teng,
 
October 11, 2013 ni in US pan kazin khiat pan in November 2, 2013 US ka tun kik dong net ah tut ding hun ka ngah kei hi. Kei mah bang in Zangkong-Kawlpi-Tedim-Tonzang ah email asim ngei ngiat lo mi tampi om ding ahih ciang in net aa lai at te Kawlgam leh India aa om mipi atam zaw in nasim kha het lo uh hi. Mipi tampi in ong theih pih khol loh hang in, Zomi te email group tung tawn in gam khat leh khat, state khat leh khat thu kiza thei in, zat siam ding hoih hi.
 
Zogam Landmark (Piantit pai te phawkna) vai.
Ning kum July 2012 in Tedim khua ah Piantit paite phawkna leh WWii phawk na bawl ding kikup na aom ciang in, hoih kisa in ki lung lut tek hi.  Piantit pai te min sazine zong ong ki khak tek hi. Tu in min 900+ ki ngah zo hi, apai 1033 te min akim in ki ngah nai lo hi. Piantit pai zawh kum za cin na 2017 maa in vai teng i man zawh na ding in tu bang in aki pan pan ta hi.
 
October 21, 2013 ni in CJC hall ah Tedim khuanu khuapa te leh Zogam Landmark vai hawm pawl te thu ki kup na ki nei in, Piantit paite phawk na "Tedim Town Square" bawl na ding amun kip sak na ki nei hi. Tedim khua lai ni dang post office lui om na lampi khanglam teng, Pu Zam Pau te inn pan in Pu Son Cin Lian te inn kikal sia Lian Bawi te inn mai phei teng ah bawl ding hoih kisa hi. Tua ban ah Tedim (Tiddim) Road zong landmark vai ah sep ding in ki ciam teh hi.

Rev. Thang Khawm Pau leh Rev.Thang Van Lian te zong Landmarkvai ah ong ki hel thei uh hi.
 
Meeting man ciang in, WWii Landmark bawl na ding mun en ding in Tedim Golf Club lam ah ki pai hi. Mualtuk teng galkap ten la khin uh a hih ciang in, mun hoih dang a ki zong lai hi. Vai hawm na te ahun hun in ong ki zasak zel ding hi.
 
TBC pan in ZBC ah min laih ding ngaih sut na.
Leipi Baptist ah Rev. David Lah te tawh khawmpi neih sung in, biak na lam makai pawl khat tawh holim na ka nei uh hi. ZBC pan in CBC ah min aki laih ciang in, 1953 kum a kipan ABM sang mang te hun lai pekin Kawlgam Baptist Convention sung ah kum tampi i neihsa Zomi min ong bei hiau mawk ahih man in i lung sim khat ong nop het lo hi. 

Thu dang tuam tuam tawh kipaikan het lo in, Judson te Cope te ong kuan khiat na ABM sung ah ahi zong in, Myanmar Baptist Convention leh WBC te ah Zomi Baptist min a om ding deih huai in kisam hi.
 
Tedim ka om sung in TBC makai te tawh zong holim na ka nei aa, "Kuamah tawh ki nop mawh na ding om het lo in, MBC sung aa om lai Zomi min a deih teng ki gawm kik thei leeng cih thu leh TBC zong ZBC ah laih ding in ho lim na ka nei uh hi. TBCY makai te zong ka gen pih hi.

Zomi a deih Zo suan ta te khem peuh Khazih sung ah ki pawl khop na ding ngaih sun ni, Zomi a deih lo te lah Zomi ki cih sak ding kul lo hi.  Zomi vai i gen ciang in, Zomi te a khenkham te hi lo in, Zomi khem peuh aki pumkhat sak te i hih na ding in han ciam ni, are you a divider or a uniter? Zomi lo te leh Zomi ong san siam lote zong Khazih it na tawh mudah kei ni.
 
Pu Cin Sian Thang in "The 3rd World Zomi Convention" a thu gen na sung ah ABM sang mang te in i minam min ding in Zomi in ong apsak sa hi cih thu ong gen ciang in, mipi in tha kingah mahmah in khut ki beng ziah ziah hi.
 
Tu lai tak India lam a aom singtaang mi (Zomi) nam tuam tuam te in, i pau aki bat kim loh hang in, Zomi ong pom pih uh in, Zomi Council leh ZRA makaih na nuai ah minam pi khat in i din zawh na ding ki lung gulh in ngimna omhi. Ei Kawlgam lam a te in zong Zomi i cih teh Tedim-Tonzang gam huam teng bek tawh toi sak kei ni. En ai tuam neih kei peuh leeng Zomi ong ki pom pih ding hi. Tedim ong tang muh dah aom hang in Zomi ong it zong tampi om veve hi.

Rev. Dr. Gin Khan Khual in, The 3rd World Zomi Convention ah, GZA (kosa) taang in thu agen na ah, "GZA in prophetic role ong la in Zomi te Pasian deihna tawh ki tuak in i kalsan theih na ding in LST tawh lampi ong lak ding hi ung" a cih ciang in mipi lung dam in ki awng ziahziah hi.

Founder of ZBC pahtawina angah Pu S.T. Hau Go Rangoon University ah professor (lecturer) ong sep lai in, asang nau pang khat ka hih na tawh ka hawh thei zel hi. ZBC ong pian khiat na thu i theih sa mah bang in, tua hun lai in sia masa te khem peuh in lung kim tak in Zomi cih i mi nam min ding in a ki thukim sa uh ahih na thu leh,  ZBC sung ah biakna lungsim taktak anei lo pan mun deih pawl khat, in minam vai in nainganzi ong lut sak ciang in ZBC sung ah buai na ong om na thu ong gen thei zel hi. A ma nun tak na en leng, biakna pan mun pan akhawl khit asep nawn loh ciang in leitung thu ah ki hel pan hi. 

TBC pan in Zomi in ZBC ah min ong ki laih ciang in, Kawlzang aa om associations te pawlpi tuam tuam te tawh ki pawl khawm ding zong ong thupi ding hi. Hih vai kong gen ciang in leitung thudang tawh paikan lo in ei Zomi te in i minam min tak tak tawh din na vai hi in, pawl khaih nop na hi lo hi. Ki pawl na dang aa om sa te zol nop man zong hilo hi. A ut teng ki pawl khawm ding cih na hi bek hi.

Kawlgam zong suakta zaw deuh ta ahih man in, nainganzi auk te in ZCD, NLD, USPD etc. te ah na sep ding hi zaw in, biak na vai ah gamvai tawh i paikan khak loh ding hoih ding hi.  Gamvai leh biakna vai te din mun te theih siam le hang khat leh khat ki mawhsak na leh ki hawm thawh na om lo ding hi.

Minam vai (national interest), gamvai (politic), biakna vai te i khen siam ding hoih hi, athu in atonkhawm ding ahih hang in sep khawm ding hi lo hi.

NGO vai.
Kawlgam ki khel na zui in, gamdang pan in NGO tampi kawlgam ah ong lut ta hi. NGO i cih ciang in biakna lam pan in sang, zato, sum zuak sum lei vai leh tangpi phat tuam na ding nasep na tampi om hi. Kawlpi van leeng tual ah gamdang mi te ni sim in tung ziah ziah in Haka lam Falam lam ah ah zin to uh hi. 

Gamdang aa om mi khat in, Zogam aa ding in bang phat tuam na ka bawlsak thei ding hiam cih ngaih sun tek ni. Gen bek tawh ki cing lo in sep khiat zawh ding thupi hi.

Suangphei khua ah zoto golpi khat ki lam ta hi, Portland pan in Mercy Corp te in Kawlpi-Tedim-Tonzang teng ah nasep ki pan ta uh hi.

Zomi te lung kituak hanlung ciam khangto diam. God bless Zomi.

Topa thupha.

King Mang
 


Comments




Leave a Reply