WWW.TUNGZANGNEWS.COM

 
A monu in , " cisawh leng lah al lua , sawh kei leng lah lim lo na cih zel Nu aw bang na deih na hiam.......???????



Atapa na sem hong ciah amuh ciang in bang mah pau nawn lo in an nek gap lo pipi in tawm hong ne pong hi. A monu'n zong apasal hong hem et giau pong sam hi.Ata pa zong hong pai in an leh meh tawm hong ciam aa, hong sia khia kik pah in, " Nu in si khang leh tha gui nat na nei , a-al tawh ki lem lo cih' bang tan vei hong gen ding ka hiam..?.."ci-in azi hong han hi..." aw, hi maw.. na Nu hi ven, ni dang teh nang man a an ding huan sak pah oo.." ci-in phun sausau kawm in inn sung lam ah hong lut san ziau hi..



Atapazong khui sakawm in , " Nu aw, ne nawn kei in buh ciim hong huan sak kik ning ei...nu".........!!!!!!



"Bawi aw, gen nop hong nei hi lo na hiam...na lung sim sung aa..nong gen nop teng hong gen khia lel in.."

" Nu aw, mai kha teh ka na sep na ah ka pan mun hong khan uh aa, na sep zong tam zaw in buai mah mah kha ding hi-ing , ka lawm nu'n zong na ka sep nuam hong ci a hih man in............."



" Bawi aw, UHamte munnuam innpi ah hong puak kei in maw...!!!... a-aw liing kawm sa in hong thum hi....



A tapa zong tawm vei sung hong dai dide in, hi dan sang in adang ahoih zaw om lo hiam ..ci'n hong lung ngai aa..."Nu aw , UHam te munnuam i cih zong asia hi sam kei ee,na theih sa mah bang aa, ka lawm nu zong na sep hong ki pan thei leh nang hong kem/khoi man ding om lo ding hi-ung , munnuam ah pai leteh nang hong cing hong kem ding mi aki cing sa aa, om hi ven .. inn sang in nuam zaw ding hi..hoih sa zaw lo maw...'



"......................"



Ki sil in an hong nek khit teh inn sung lam hong zuan hi.Lup na dei sung aa..kong khak neu pan hong dak khia in van tung lam hong en to hi.Se-al te lah te ziahziah in lum mei te zong alom lom in hong ki khin litlit hi..Lung len' huai lua mahmah ahih man in Aneu lai thu te hong phawk kik kha hi..Aneu aa ki pan Anu pen meigong hi in ham sa pipi kawm kal pan sum hong zong aa , amah asang man ciang dong mah hong zom to suak sak liamliam hi. Aneu lai aa , agim a tawl na te kawm kal pan akhang cin' dong mah Haksat na , buai na tam pi nawk in hi ciang dong hong tun pih a Nu tungah lung dam itna zong thuk kik man nai lo aa , Azi in inn kuan sung thu tawh kam hong pau nuam ta........!!!



Uham nmunnuam ah puak tak pi ding ka hiam..!! hong ki ngaih sun pha pha aa..khen sat tak tak gam sam lo....

"Na mai lam kal suan pih ding na zi hi zaw hi , na nu hi lo hi.." asung lam ten hong ci ci ta.



" Nanu ham mahmah ta hi ..sawt vei hong dam pih nawn lo ding hi , hong dam pih sung in lung kim sak in.." ...sing kung te zong nuam tak aa, hong din' khawl nop hang , huih khi ten hong sem hiau hiau...." Ka nu ka pa ten hong dam pih lai leh lung dam ko nuam tak ing ...cih khawng ..tuak sawm kha het kei in maw.." ci-in a beh aphung ten hong han thawn zel...Bang mah hong ngaih sun nuam nawn lo hi.bang hang hiam cih leh angaih sut sa teng a laih kik khak ding hong lau ta hi...



Tung sun ni-in aso vangvang asat na akha te hong zep bawl in mual pang lam ah hong buk pih ta hi.Khua nawl lam aa,mual bo neu tung khat ah aki lam [ pu / pi teek] te ki kep na mun nuam inn pi na sia mahmah khat....



Sum tam pii mah aki piak na mun ah ANu hong koih sawm ahih man in alung sim khat hong nuam zaw deuh hi.

"A Nu hong len kawm in kong khak pi pan inn lian pi sungah hong lut pih hi. Tua lai tak in inn pi sung ah 42" TV pi sungah ciamnuih peuh ki hong na pi in amai aa, a en mipi te kiang pan nuih na aw ging lah ki za mahmah lo , pawl khat te puan ki bang silh in tutphah tung ah hong tut khop uh hang' lung mang tak in hong om uh hi..



" A Nu in khua vaak na mun mah deih ahih teh khua vaak lim tak aa,aki ngah theih na ding inn dawl sung khat ah hong lut pih hi.inn sung kong khak neu pan in inn pua lam hong daak khia aa, singkung lopa te eng dimdiam in tua lak ah Nurse pawl khat te in UHam pawl kht leeng sawn tawh avaak pih kawikawi amu hi. Kiim leh paam a daih luat na in mihing te lung sim khua ngaih huai sak mahmah aa, hong lau thawng sak thei hi..

Khua paang san te san dimdem in et lawm mahmah na pi'n , khua mui tawh hong ki zom hi,.."Nu aw, na ciah phot ning maw.." ci-in mang pha apiak laitak anu'n bang mah hong dawng lo in hong dai dide hi..Anung lam aet kik leh a Nu in akhut hong lam to in mang pha hong khak hi.Apaak kiuh keuh ha tang te aom nawn lo , akam hong ka in a keu thil thial amuk te tung ah lam et na lianpi bek tawh hong om lai mawk hi..



Tua lai tak in aNU lutung aa, vut bang aa akang thil thial sam mal , khua vaak amu mel nawn lo amit te leh abiang tung aa vun ton te hong phawk kha in..." Aw ..ka nu zong ham mahmah ta ai ve maw...!!!!"



Amah kum 6 aphak lai aa , Anu vai khak tawh khua dang ah pai ding in hong ki thawi aa, amah apu te kiangah hong nu siat sawm hi.. A nu avai pai ding teh akhe phung pan len in kap kawm sa in , "Nu aw, kei hong nu sia kei in .. hong tai san kei in maw..Nu .."..ci-in aneu lai hun khat hong phawk kha vat aa, nawh sa tak in hong pusuak in kong khak te hong khak kik aa, anung lam hong en gam nawn lo hi. A neu lai thu te aphawk khak kik ding lau hi..

Inn atun kik teh azi in bel anu van nusiat te na pai ziahziah..



Maan bawm pikhat ..hi pen asang kah grade 4 lai aa"TuunNu" cih thu lu tawh lai at/gualh ki dem na ah akhat na prize

Eng-myanmar dictionary ..hi pen anu in alim a-al ne gam lo aa..asum khol sunsun tawh..high school akah ciang aa ..birthday gift apiak

Tua leh anu alup ding ciang ta aa,aki zut den ahi, "Ankamthau" thawl neu bung khat...."Na nu azut sak ding lah om lo aa , aken hang bang aa mang ding hiam???.." azi in ci sawnsawn lai..



" Khawl in pai nawn kei in" ci-in hong han hi

"hi van lui teng pai kei leng ,kei van teng koi ah koih ding ka hiam?" hong dawn sawnsawn lai

"Hih van te ka nu van gil hi..khoih kei in.."



"Bang na cih nop na hiam.."



" Kei nong it man aa nong ten pih hi lo hiam...bang hang in ka nu hong it sak zo lo na hi hiam?.." ci-in heh kawm sa in inn pan hong pu suak khai aa, motor tawh hong vak khia hi.



Guah zuk khit nung in khua hong vot pian aa, lam pi ah zong mi kua mah om lo ahih man in ..anu om na mual tung lam ah motor hong hat hawl mahmah hi..Motor khawl pan phet hong pu suak khia in kah lei ah hong kah daidai aa, Anu om na kong khak hong hong hi.Amai aa amit muh hang in bang mah khua phawk lo in tawm vei sung hong ding gega hi.ANu in akhe tha gui te amekkawm kawm lai tak in ata pa khut sung aa, Ankamthau thawl hong mu ahih man in , "Aw,ka mang ngilh kha mah veleh, bawi nong puak kik pha dawm lai ei."...amah zong anu kiangah hong neh in hong khuk din aa, "Nu aw, hong mai sak in..hong thum ing..inn ah ciah kik ni maw.."............!!............



Ei aneu pan in damdam in i liat tohtoh tawh ki tuak in , i nu/pa te mai suah ngeek te zong damdam in guai lam hong ma nawh tektek hi. A dum dil dial asam mal te uh hong kang tektek in..atha tang te uh zong man lang zo nawn lo aa,kiam suk lam hong ma nawh ta uh hi..bang zah ta in na sak huai hiam...?

Nu/Pa te in ahoih pen leh aman pha pen na te hong nu siat uh hi. khuai mei vaak bang in tat sat lo aa, kang tum in ata no te khua vaak hong pia uh hi...ei te in ee leh........??????????????

Cinpu Hatlangh
Kap Tung



Amau aa ding in i lung sim sung ah mun neu khat beek i pia zo hia.??[or] i ki sap ciang bek phawk pan ding maw..???????



Nu / Pa te-in nang tung pan hong lung gulh uh tam het lo hi."Nunu/Papa tu ni na dam hia...? an ne khin maw..an nek lim hia..na an kam alim hia..???????



Na Nu/Pa te ii hong it na uh lung dam na thuk kik zo kei zong in kha siat sak ding pen ki lawm het lo hi. Lawm leh gual te aw , Pasian thu um leh nung zui vive hi sam i hih teh Nu/Pa te tung ah itna lung dam athuk kik zo kim ciat ding in i biak Pasian in thu pha hong pia kim ciat ta hen..



" Nu leh Pa te hong itna leiba cik mah hun in ki loh kik zo gei lo hi..."



Cinpu Hatlang
 


Comments




Leave a Reply