WWW.TUNGZANGNEWS.COM

 
Picture
Tg. Kham Sian Mung (25/2013)leh Tg. Bia Suan Muang (23/2013)te tuahsiatna thu
Chin State Chief Minister Pu Hung Ngai leh Commissioner U Myint Aung te Phalna, sawlna, lungkimpihna tawh GAD-Chin (General Administration Department)pen Tg. Kham Sian Mung (makai), Tg. Bia Suan Muang, Salai Lal Rin Sang leh Hakha Civil Hospital pan Nurse (4)te (25.10.2013)in Hakha-Mandalay, Mandalay-Naypyitaw a kipaisak ahi hi.


October 25, 2013 (Friday)


Hakha pan zingsang nai(9)in, Aye Chain Bus Manlung tawh Zozumpi pan a kipaisakkik teeltuam (7)teng dingkhia uhhi. Zan(12:00)kiim in Kyaw Khua (Magway Division)tung uh a, tua pan maban zom in, paisuak uh a, PU MUAL (pong-taung)a tun uh ciangin, Lampi nasia ahih man in, tua lai ah zangiak uhhi.

October 26, 2013 (Saturday)

PU MUAL (pong-taung) Lampi kipai thei nailo ahih man in, gamlak ah giak lai uhhi.

October 27, 2013 (Sunday)

PU MUAL (pong-taung)pan nitaak lam (3:00)PM in Lampi kipai thei ta ahih man in, kipan kik uh a, Mandalay Zan(11:00)in tung uh ci hi. Motor hawl pan Motor sungah lumphot unla, khuavak ciang na maban uh zom in, ci ahih man in, Motor tungah lum uhhi. Zankim (12:30) khawng ciangin, Tg. Kham Sian Mung leh Tg. Bia Suan Mang pen khualumlua, lam siau ni ci-in, pusuak ci hi.

October 28, 2013 (Monday)

Zingsang nai(6:30)AM ciangin, Tg. Bia Suan Muang hongciahkik in, Tg. Kham Sian Mung tawh hongtonlo hi. Tg. Bia Suan Muang thu adot uh ciangin, hoihtak in dawng thei lo ci hi. Tg. Bia Suan Muang pen PU MUAL pan pusuak khit aa kipan, pongman lo, a lungsim man nawnlo, khatveivei lah khua phawkdan in, thukhawng gen zel dan ci hi. Mandalay tun ciangciang Tg. Kham Sian Mung pen bangmah cilo in, cidam mahmah lai hi. cih a ki thuahpih Lal Rin Sang tungpan kiza hi. Tg. Kham Sian Mung Cargate ah hong tun theihloh ciangin., a kiim a paam kuamkhat khawng bel zonbawl dan hih tuak sam hi. A muh zawh loh uh ciangin, zongnawnlo in sun(11:30)ciangin, Mandalay-Naypyitaw Manlung te tawh amau om lai (6)teng maban vazom uh a, Naypyitaw ah nitaak (7:30)PM in vatung uh a, Zogam pan apai masa (56)sungpan makai pawlkhat in, Cargate ah nadawn uh hi napi, Cargate khial ahih man in kipelh uhhi. Naypyitaw atun uh ciangin, Naypyitaw atungsa a makaipi uh U That Biak Nen tungah hong tungta ung ci-in Mobile tawh thu vaphual uhhi.  Cargate leh amau tun nading (Zua-taw)pen ki gamla pian ahih man in, Tg. Bia Suan Mang leh Lal Rin Sang te’n TAXI khat sap in, a mau zintun nang… Zua-taw zintun nang phualpi va zuan uhhi. Tg. Bia Suan Muang in bangmah thei nawnlo ahih man in, Lal Rin Sang in, Taxi sapman tengzong sik ci hi. Tua laitak in, Tg. Bia Suan Muang in, a ip sung pan Sum lomkhat la in, TAXI hawlpa na mohman ding ci-in pi alai ci hi. TAXI hawl pan sangngam lo bilbel dan hih tuak hi. Mohman ding apiak teng a et uh leh tul-nga lai dal(10)val khawng ci hi. Tuazan a tungsa tangval te kepna tawh Tg. Bia Suan Mang hoih tak in, ih mu thei uhhi.

 

October 29, 2013 (Tuesday)

Zingsang in, Tg. Bia Suan Muang in ka Pa Sing ee… ci-in kankan ci hi. Kua ahia? na Pa Sing ci leh… ka Pa Sing ee… ci den ci hi. Tua ciangin, Lia. Lenpi’n na Pa Sing Khalkha ah om hi. Acih leh den in, om mah ci lai ci hi. Hoih deuhdeuh tasap ahih man in, cinkul nawnlo, anasep maban tenguh zom uhhi. Sun(12:30)kiim pawl ciangin, Tg. Bia Suan Muang a sawngah na om nawnlo hi. Tua pan in, a tung masa makai teng meeting bawl in, koici zon ding! koici kalsuan ding ci, a kikup khit uh ciangin… a mau tawh a kinai aa om palik te tungah va zasak uhhi. Palik (500)kiim leh Zogam pan apai, mun tuamtuam pan apai… SEAGAME palai te’n Zua-taw kiim teng vazong ngeingai uhhi. Mu zong tuanlo uh ahih man in, a maan(photo) ngah theih nading kivaihawm aa, Khalkha Zozum pan Pa Suan Za Sing leh Tg. Val Lian Mawi te’n a photo te Fax tawh na puak uhhi. Fax pan in siangtho lo lua ahih man in, ci-in Email pan in ki vaikha kik aa, Tg. John Thang Za Khual thusiamna tawh Internet tungtawn in a Photo (Min, Pa Min, NRC no. Kum cih te atsa) ngahthei uhhi.

Mandalay pan amang Tg. Kham Sian Mung pen Maha Aungmay veeng ah.. cycle khawl te atungkhawngah tuangzel, mi inn khawng a kongvang pan en zel… cih dan in a om amuh uh ciangin, Maha Aungmay hausa te’n nang koi pan hongpai nahiam? ci-in a dot uh ciangin, kei Zogam pan aa hongpai, SEAGAME honpawi ading akisin ka hihi. ci-in dawng ci hi. Tua ciangin, Hausa zum te’n na kem uhhi. Banghang hiam cih leh tu laitak pen Bomh puak ding khawng a ki lauhmahmah laitak ahih man in, a upmawh mat uh dan in, gen hi. Palik zum ah a thu, a la teng avapuak uh ciangin, hi tengah na meltheih, tanau khawng khat peuhpeuh theih na nei hiam? a ph.no khawng theih na nei hiam? ci-in a dot uh ciangin, Zum aa a lawmte (Hakha te)khat ph.no thei ahih man in, Palik te’n tua phone sam pah in, tua tungtawn in Zozumpi tawh thukizakna neithei uh ci hi. Maha Aungmay gamkhen ukpipa pen, Zozumpi aa Assitant Director pa khat ii lawm nahi ahih man in, amau hoihtak in, na kepsak uh a, a zingciangin, Hakha-Mann Manlung tawh Khalkha puakto kik uhhi.

October 30, 2013 (Wednesday)

Tg. Bia Suan Muang pen apaina kithei lo in, vaisai Palik cih loh buang ki zong lua nawnlo dan in gen hi. Tg. Kham SianMung Nitaak nai(5:00)PM kiim in, cidam in va tung thei ci hi. A lung hi mawh lawm leh gual te’n vadelh pah in… thu a kidot ciangin, “Tg. Bia Suan Muang in zi nei-in, a Mopawi ah paiding ci a kithawi, a inn theilo aa, inn zong aa a et kawikawi laitak aa, palik te’n hangman ziau hi ci”, a dang te pawlkhat ah lah “A lawm te Kimbawi (Sia Do Khup tanu)leh San (Man San Niang, Ngaih Anglai)te tawh kimu in, Coffee dawn khawm, tua khit ciangin, a lawm te te geel in, na ngakpak lai-in zun va tha pak nung ci-a, pusuak aa… sauveipi tungtheilo ahih man in, koi teng ah pai hi ding hiam? ci-in zunbuk lam a va zon, a va et sim laitak in, Palik te hangman” ci bang khawng gen hi.

 

October 31, 2013 (Thursday)

Zingsang zumkah hun (9:30)AM in, kipuah sitsit in, zum vakah a, hoih tak ki hopih thei na pen bangmah tel neilo cihdan in gen hi. Tua ni siangtho sitset in zumhun nuamtak ava zangthei suak hi. Khasum zong hoihtak in, thoh thei suak hi. Tg. Bia Suan Muang pen athu a la, bangmah ki zakbeh nawn vetlo hi. A upa leh a Pa’ Naypyitaw ah vadelh suk uh cih zong kiza hi.

November 1, 2013 (Friday)

Tg. Kham Sian Mung pen zummah kahkik hi. Kawlpi pan a u pa in, Cycle tawh hong delh to hi. Zum pan in, tawpsak ding vai thu aom ciangin, Tonzang tangpi tangta teel a behpa uh Pu Hau Khen Kham (Speaker, State Parliament)kiang vahawh uhhi. Pu Hau Khen Kham in zong lainatna tawh Commissioner U Myint Aung kiang thumsak aa sangzolo cih dan in gen uhhi.

November 2, 2013 (Saturday)

Kumpi nasepna pan tawpsak ding a kitel ciangin, Tg. Kham Sian Mung leh a u pa.., a beh pa uh Pu Hau Khen Kham te’n vahawh in, thungetna a neihkhop khawm uh a, a vek in akap lo kuamah omlo ci hi. Tua khit sunnungkhit ciangin, Khalkha pan Kawlpi zuan in ciahsuk uh a, nitaak lam khuamui kuan in vatungsuk thei cih ki za hi. Kawlpi ah bel misi tutpih in, kitutpih cih zong kizabeh hi.

November 3, 2013 (Sunday)

Naypyitaw lam, thuthak zakna bangmah kinei lo a, vaisai te’n lah Union Government dong ah zaksakna kician neilo dan in gen uhhi. Zozumpi te ahih leh A(7)veina Zogam Parliament kamkupvai dingin, zum ah buai thei mahmah uh cih zong ki za a, Tg. Bia Suan Muang vai peuhmah kuaman thupi ngaihsun lo ci uhhi.

November 4, 2013 (Monday)

Zingsang nai(8:00)Am Zozum te zum akah uh ciangin, Tg. Kham Sian Mung leh Tg. Bia Suan Muang te khawlsakna lai kipia cih siangtak in kithei khia hi. A lawm leh gual te khitui luanglo tamlo hi. Na kisakpih tek mahmah ahih man in, Tg. Thang Za Khual in a kisam bangin tungsiah ah thumna bawl huai dingin, cidam aa ih muhkik Tg. Kham Sian Mungnangawn hih Kawlpu te’n hongthahkik sak hi. Na luamahmah, na sa lua mahmah ahih man in, a mau tawh a ki memat Zomi tangpi tangta teel palai te kiang kalsuanzia ding a va kuppih ciangin, deih bangtak in mapang ngamlo uh ahi man in, Kapkawm in, khitui tawh inn lam vazuan ci hi.

Hih Tg. Kham Sian Mung leh Tg. Bia Suan Muang te pen Chin State Government leh Chin State General Administration pan in On Duty tawh SEAGAME bei dong… Zogam tangmi dingin, muanhuai hi ci-in a kipaisak ci uhhi. Chin State Government zumpi ah kumpi nasem (130)val aom na sungah (Tg. Kham Sian Mung, Tg. Bia Suan Mung, Lal Rin Sang)te bek apaikha ahi hi. A dang te bang utlua kisa, aki tomtom zong lomtang khat om ci zen hi. 
A khatveina Kawlgam innteek dinmun la in, 27th SEAGAME Pawipi Hon pawi leh Khakpawi te ah Zongeina tuamtuam lah ding leh Kawlgam bup minam kim kihel in, thupi tak bawlding a kiging, a kisin laitak ahi hi. Tu laitak Zogam pan Seagame ading tangmi a pai (61)pha uh a, a maikai teng uh tawh hi leh (70)val te Naypyitaw, leikhu lak ah dungdung dangdang a sak laitak uh ahi hi. Hi a kihel kha teng khempeuh WCDMA Sim Card (1)tek kipia lai hi. Tg. Kham Sian Mung leh Tg. Bia Suan Muang aiding zong kihel ci leng! Kuan a ngah tam! lunggulh huai zawzen…

John Zomi (Vaihunta)

Zogam

(Na minam te adingin, singam ken la, nuntaakpih/zumpih ngam zaw in!)


 


Comments

01/22/2014 16:15

i LIKE this blog. NIce posting.

Reply
10/17/2014 05:02

Armstrong Chain Link Fence Heavily Zinc Coated is most demanding the raw material are Electro galvanized, hot-dipped galvanized, PVC coated.

Reply



Leave a Reply