WWW.TUNGZANGNEWS.COM

 

Sanggam Ngaihteng,

Ciamnuih cihtak-in Facebook-ah ZBC La dawng 15 cd khat, la dawng khat $1 ci-in ka' koih-a, ahizong-in sanggamte-mah' thulahna leh thapiakna-tawh $10 in kizuak-hi. Hih-pen siamna lahna hilo-in, ZBC la-tawh tonic solfa asinnuam leh ala mahmah-tawh tha ala-nuamte' ading deihsakna hi-a, musician te kiciallo, la khumna-zong Mac Pro-tawh hongpai Garage Band-tawh ka' vei deuhdeuh ZBC late keimah-in kei' theihtheih-a ka' khum hi-in, "Tualsuak Lasak" cihtheih ahihi.

Sum-tawh zuakding ka' geelna aziak-pen:

Laaitui Khua-ah akhawnkhong-in Zilmuakna (Preschool/Kindergarten/MuuCuu) ka' kipatzawh kum 3 hita-a, kum masa-in naupang 48, kum nihna 52, tukum 50 sum laakloh-in kana haanciam-hi. Nasep nei naailo, saangkah thapaai khat ka-hih ziak-in baihlo veve-a, ahizong-in kei' haanciamna khatbeek omlo-a huhna sum don mawkmawkding leh nget mawkmawkding piangthei ngiatlo ahihman-in hih late beek-tawh panpihna kizongleh ci-a akhensat ka-hihi. Lasiam hilo, music siamzong hilo, ahizong-in amawkna-a "hong panpih-un" kacih liang sang-in aci kahihi. La cd leilo-a hong panpihnuam na' om uhleh kisuang pipi-in hongsaang veve dinghi'ng.

Hih-tawh akisuun mah-in GuunGaal lam-ah cidamna lamsang akhawnkhong zatui kibawlna kipan nuam-in tuma kum 3 laai-in ka' kipan-a, kei' lampan-in amawkna leh huih bek-tawh panpih zotding kilawm salo kahihman-in "Laukha' Lungdeih" laaibu ka' gelh, publishing fee tuulza 16 (Kawlsum) bei-a ka' bawl penmah hong tah-in AU, US, Malaysia pan-in panpihna kahong zawn-hi. Australia Zomi sungpan-in AU$ 850 panpihna ka' ngah-a, ahizong-in, Malaysia leh US pan-in alaaibu bei bilbel saam taleh asum tuni ciangdong kingah naailo ahihziak-in ka' kipan thei naaikei-hi, banghanghiam cihleh 850-tawh kipanleng paracetamol bek nangawn vial-khat ciangkhawng bek-tawh beiziau ding-a, nuazuui: huut veileh veilo veelna, TB veileh veilo veelna, huutza, gilpi za cihte leh zatui siampite cialnading cihte kivaaihawm zomto zoloding ahihman-in paracetamol vial khat-tawh ka' kipat sawm naaikei phot-a, tua laaibu zuaknate tuni dongmah ka' ngaak laai-hi. Hongpai ngeiloding cih ka' zaakcian lehbel akisambang behlap-in ka' kipan veve dinghi.

Hihbang daanteng hi-in, laaibu hitaleh cd hitaleh ka' zuak bangbang kei' taangsapna hukna dingciang ahihlohlam hong theihpih le-uhcin hong telsiampih zawdeuhding aci kahihi. Sawtlo-inbel "Zomi Zogam" CD kahong hawm sawm-a, Mikaangte music tumding-a ka' cial ahihi. Lead Guitarist bangpen Zomi Music bil-tawh akilemdiam thei saam khang-in 1975 kum pan-a AU leh Canada-ah atum ziahziah Bob Spencer hi-a, tu-inzong music saangsia aseem laaitak ahihi. Thutuam khat ahbel Zomite' deihdaan music paizia-tawh akilem/lemlohbel gentheilo hihang. Hihzong Zomi-mah ka' vei ngaungauna ziak-a khitui-tawh ka' phuak minam la bekbek ahihi.

Bangbang ahizong-in hih ZBC cd alei khempeuh' tung-ah lungdam-hi. Solfa theihtuamna leh Pasian-tawh kiholimna-in nana neiciat ta-un.

Zokhai





 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 


Comments




Leave a Reply