WWW.TUNGZANGNEWS.COM

 
Dear U le naute teng

Mun tuamtuam a om naute teng aw, om na tek pan I damkim tek hia.
Tu sungteng innlam ah vai tuamtuam tawh na manlah thei mahmah ung.
Tua kawmkal ah net line te ong kizil pian sawnsawn lai ahih manin
nasepna mabante a hunhun in ong pusuah zolo suak ing.

Amasa in Zolai simbu kum 100 cin pawi ( Tahan ) lai a pawi ong sim
sia/mate in I maban mah ahi Gullu mual vai mah dot bel in ong kineih
ciangin pawi hun sungmah in laihawm no khat na vaihawm samsam ung. Tua
pen tun online ah ong pusuah zo pan suak ing. Tua ban ah tu sungteng
mahmah zong vai tuamtuam tampi om a ei vai ciat tawh kinak manlah
mahmah tek hi.

Tu sawng teng bang adiakin thu hoih tuamtuam tawh kigamlum henhan mahmah hi.

liantuang

GULLUMUAL VAI NASEPNA BANGCI? BANG
CIANG?GULLUMUAL IHCIH IN BANG HIAM?

Gullu Mual i cih pen Zogam Tedim gam huam leh
Tonzang gam huam kikal, Kawlzang tawh gamgi laizang
ah om a, Gul tawh akibang mual khat ahi hi.
Tedim pan tai 65, Kawlpi pan tai 12 agamlat na
ah om hi. Tai 8 sau in tai 3 val zai hi. Mual a san penna
mun tuipii maitang pan pi 3280 val sanghi. (Base on
Google earth)Geologist Pu Ngaw Cin Pau leh Pu Vum Son te
kankhiatna-ah nickel, chromite, sik le adang sumngo
vangil nengneng tampi om hi ci hi.

GULLUMUAL AH BANGTHU OMHIAM?
2013 kum kipat tung lamin Gullu mual bul a om
khuate ah Asia Guiding Star Service Company pan
mipawl khat va pai in Gullu mual kito ding hi leh bang
teng deih na hi uh hiam cih dotna na nei hi. Mual bul
khuate lunghimawh in Kawlpi a om Zomi khangnote
tung hong ko uh hi. Tua hun pan in a thu kikan suak
toto hi. Tua tungtawn in a kithei khia thute in, Sen
Company khat ahi North Mining Investment Company
in Gullu mual to dingin a kithawi khiatna kithei khia hi.
I Zogam i pulepa’ gamh khat ahi hih Gullu mual
in suksiatna thuak ding dinmun ong hi ta hi.

BANGCI LAMPITE TAWH KITAWH SAWM ?
A tawhzia ding pen Open Cut Mining Method kici
hi. Mual dawn pan vangil omna meter 45 mun
ciangciang ekdum tawh in dum thukpi to in vangilte
lakkhiatzia dante zat sawm uh hi. Zusa kua bangin
kulluh a tawhzia hilo ding ci uh hi. Suang meihol le
leikang hel in khuaphelep mei thahatna 35 MW tawh a
lumpia in vangilte hiah khiat sawm uh hi. Khuaphelep
mei ngah nadingin suang meihol set zat sawm uh hi.
Nickel 7% kihel sik lompi in Sen gam ah puak ding uh hi.
Sengam pan Nickel taktak suah dingin gel uh hi.
Amasa kum 15 sungin Nickel sitset in ton lakh
5.95 lak sawm uh hi. Hih nasepna dingin US dollar
486.674 million bei ding hi ci-in company in gen hi.
A tawhna dumpite leihoih tawh vukkik in leicial
in bawl ding a, leitang ngeina mah( a kitawh ma )
bangsak kik ding hi ung ci-in gen hi.

LAMET HUAI HAMPHATNA BANG OM?
Chin State ah nasep a kipat pan kipan kum khatin
US dollar lakh 5 ta huhna ong pia ding uh hi. Amet
sungpan State ah bangzah hiam khat pia ding ci uh a,
ahih hangin tu ni ciang dong akician in genna nei nai lo
uh hi.

Nasem ding mi 1309 kisam ding hi. Nasem pen
sem gam mi 75 % le kawlgam mi 25 % tawh kipan ding
hi. Kum nih simin Kawl gam mi 25 %ta behlap ding to
uh hi. Amasa kum nih sungin Kawlgam mi 327 in nasep
ngah ding hi. Kum guk a cin khit ciangin Kawlgam mi
993 in nasep ngah ding ci hi. Nasep ngah ding tawh kisai
in mualbul a om khuamite le a tualsuakmite adingin
gelsakna nei maw neilo maw cih a kician in genna om
nailo hi. A pil a siam nakleh tualsuak mite kimasak ding
hi cih ciang bek gen khia pan hi.

Nasep kipat masak kum in gullu mual tawh 5 km
ciang a kigamla khuate khempeuh khuaphelep mei a
mawkna in kum khat sung pia ding uh ci –a, tua khit
ciang kumpite ciangtanna omsa bangin meisap la ding ci
hi.

BANG THUTE IN ONG NUNGZUIH THEI DING?
Hih bangin leisung sumpiang tawhkhiatna hangin
thuhoih le thusia, supna baina tampi om den hi. Tampi
sungpan a tom in enpak leng,

1. A sem a bawl dingin mun tuamtuam pan minam
kim hong om ding ahihna tawh kizui in tualsung
tengsa mipite pianpih ngeina, biakna, minam
vaite sungah thusia lasia tampi hong piang thei
ding hi. (SIA)

2. Zomite an bempi pen Kawlzang kuam ahi hi.
Companyte nasepna panin a luangkhia tui hoihlo
te le a leng khia huihnente hangin leitang le
khuahunte nasia takin hong kikhel thei ding hi.
Kimlepam kisiatna ong tam mahmah dinga tuate
hangin annek tuidawn nuntak haksatna tampi
ong piang thei ding hi. (EIA)

3. Mual tampi in umcih in, belpeu tawh a bang
Kawlpi le Kawlzang kuam pen tuipi pan hong
lengkhia tuikhu te in a tung pan atuamcip ahi hi.
Tua hi a hih kawlzang kuam sunga om meikhute
le huihsiate a pualam ah tam pusuak theilo hi.
Tua banah Kawlzang bup a om tuite pen Tuikang
gun bek tawh pusuak in tui paikhiatna mun khat
bek om hi. Hih nasepna pan a hong lengkhia
huihsia tuisiate a pusuakna ding mun omlo hi.
Kawlpi kuam sung mahah hong kizel kik ding
ahih manin natna lamdang tuamtuam hong piang
kha thei ding hi. (HIA)

Tua hi-in hih a piang thei ding thute ahi EIA, SIA le
HIA te a kim theipen dingin hih vai a tangkhia pawlte in
kikaikhawm khin a a sauveilo in laibu tawh kihawm
khia ding ahih man tua pan a kitel cian in kisimkik thei
ding hi.

HIH VAI TU LAITAK KUATE IN ENCIK HIAM?

A thu a kizak phet in Kawlpi a om a lunghimawh
masa Zomi khangnote le Siamsin sangnaupang va delh
uh a, amaute hong muhkhiatna teng bulphuh to in
Kawlpi a om kipawlna tuamtuam a Kawl a Zo ci loin
mapangin hih vai encikna le mipi thutheihsak nading
nasepnate hong sem to suak uh hi.

A masa in Kawlzang Kuam le Gullumual Encik
Pawl cih min tawh Kawlzang sung kipawlna
tuamtuamte gawmtuah in mualbul khuate ah thugenna
le thu kikup khopna nisim kipai hi. Kalsim kipai hi.
Gullu mual pen Zomite gamh neih lakah alian
pen pawl hi a, hih vai ah innteek ahi pen Zomite mah I
hihna tawh kizui in Zomi khempeuh inntek le aituam
takin ma I pan theihna ding deihna tawh Zogam Leisung
sumpiang Encik Pawl (CNRWG) cih min tawh Zomi
kipawlna tuamtuamte kigawmtuah khawm in innteek
mun kila to hi. ZLSEP le KKGEP te khut kilen to in tuni
dong hih leisung sumpiang tawh ding vai kiencik to
suak hi.

BANGCI BANGIN ENCIK PAWL KAL SUAN?

Hih bang dante mapan theihna dingin Theihna le
neihsa lamhsa bangmah kinei lo hi. Gullu vai, gam le lei
vai thusaupi en kawmin lung hihmawhnate kigawm
khawm a, hih theihna ciat pan kipumpiak in a
kipumpek toto ki hi hi.

Hih vai ah a gam tangtangte pen gamsung gampua a om u le nau tampi in zong
kalsuannate ah panpihna le thapiakna tampi hong nei
uh hi. Kalsuanziate a lawhcin theihna dingin
kihamciamin kholhpih lawm le gual, pawl le veng kizong
tawntung in ki behlap toto hi. Kawlgam sungah ei tawh
dinmun kibangte le hih vai dante ah pilna sang neite
tawh kimuh khopna le thusinna a om bangbang kizong
tawntung a ahi thei ding ahih nakleh pelhloin kikah to
ciatciat hi. Gamke kumpite, mualbul teng tualsuak mite,
Companyte, hih vai ah a thei a siamte, Kawlgam mipil
tuamtuamte, party tuamtuamte le gam sung gam pua
media tuamtuamte tawh kizom in kikalsuan to a tu-in
ahihleh a sia a pha apiangthei ding thute khempeuh a
kikan khia zo phial hong hi ta hi.

HIH ENCIK NASEPNA AH KUATE KIHEL THEI?

Mipite mawksup ding le I gam I leitang a mawk
pai ding a phal zolo mimal a kua mapeuh kihel thei hi.
Biakna, pilna, siamna, mel le sa, neihsa lamsa,
kampau,minam, khankum..., cih dante deidan om loin
kihel thei hi.

MABAN DING BANG HI DING HIAM?

NMICompany in amau gelna ah 2013 June 16 in
vai khempeuh siangin July 1 ah innkieu suang phuh ding
cih himah taseleh I biak Pasian hong ompihna tawh tu
ciangdong innkiu suang a khia zo nailo hong suak hi
phot hi.

Mailam ah themvei sotto lai ding cih hitaleh, din
khawl ding cih hitaleh thukician om taktak nailo hi.
Amau lam pan nasepna zom suak veve ding cih thu
hong om kha zenzen leh tualsuak mite lunggulhna le
innteekte deihnate telsiam in a thupi ngaihsut
hamtangtheihna dingun a kisam bangin tawsawn in i
etcik phat mahmah kullai dinghi.

Hih Gulluvai in I gam I lei I minam mailam ding
nasia takin hong to thu ahi hi. Zomite in a leitang uh
bang ciciangin it in, kemzo a manpha sa uh hiam; cih
lahkhiat ding maban in I minam maban lian penpen te
sung ah khat ahi hi.

HIH TAWHKISAI DOTNOP KANBEH NOP AOM LEH;
www.facebook.com/CNRWG
Pa Lian Khan Tuang 09 400 511 757
Pa Zam Thuam 09 400 307 982
Tg Tha Tuang 09 400 309 471
Tg Bia Za Mung 09 400 308 014 (Siamsin)
Tg Pau Tawi Thang 09 400 421 986 (Siamsin)

liantuang
kawlpi ( 09 400511757 )



__._,_.___
 


Comments




Leave a Reply