WWW.TUNGZANGNEWS.COM

 
Kongit Zomi Akuamapeuh,

Zan a kong laikhah maban leh maan/Photo te hiah hong khak kik ing. (Oct.30-Nov.3, 2013)


A thu: "ZOLAI SIMBU NEIH (KUM 100) CIN NITAKSIM SERVICE BAWLNA & JUBILEE SERVICE BAWLNATE A TOMIN"

I. Oct.30, 2013 Pawi honna hun (PM.5:30-6:30)

Makai : Revd Lian Khen Pau (Executive Secretary, ZCLS)

Pawi hong : Rev Tuang Khan Kap (Pyidawtha BC)

Hun-apna : Rev Suan Khen Mung (Ch.Ptr.Phualpi Baptist & CMBC)

Pawi hong : Revd Tuang Khan Kap (Muutpuak pum 100 khihkhawm a, vantung lamah khahkhiatna kinei hi).

II. Oct.30, 2013 (Wed) nitak masa hun pen, Revd Khup Khen Pau in hun hong len a, Revd Dr Thuam Khan Thang (BBC, Tedim) in hanthotna pia hi.

III. Oct.31, 2013 (Thurs) nitak, Revd Lang Suan Thawn (ZACC, KBC) in hun hong len a, Revd Dr JM Ngul Khan Pau in hanthotna pia hi.

IV. Nov.1, 2013 (Friday) nitak, Revd Khup Khen Thang (Superintendent, Kalay No.2 Section) in hun hong len a, Revd Dr JM Ngul Khan Pau in hanthotna pia hi.

V. Nov.2, 2013 (Sat) nitak, Revd Pum Suan Lian (GS, TTBA) in hun hong makaih a, Revd Dr JM Ngul Khan Pau in hanthotna pia hi.


SEMINAR HUN AH:

a) Revd Khoi Lam Thang - "Zolai Piankhiana leh a Khantohzia" b) Revd Dr JM Ngul Khan Pau - "A Kikhenthang Zomite Dinmun leh Mailam" c) Dr.Hau Za Cin - "Tuhun Nate (Science) Pilna leh Khangno"

SPECIAL SPEECH:

a) Bishop Felix Lian Khen Thang - Tuhun Zomite dinmun leh kim-le-pam tawh etkakna leh mailam ah ki-it ki-thutuahna leh kipawlkhopna tawh mite delh a, mainawt ding cihte.(hih pen a thu-lu kiguang tuan lo ahih man ama thugen a huampi a ciaptehsakna te ahi hi).

b) Revd Khai Khan Suan - Khanglui lai Zom i Pu-le-Pate' thumanna leh cihtakna tuhun khangthak te'n etteh kik a, Pasian' thu tawh kopin i mainawt anding cihte. (hi zong a thu-lu kiguang tuam lo ahih manin a huampi a ciaptehsak khak teng i genna ahi hi).


VI. JUBILEE PAWIPI HUNZAT DAN (Nov.3, 2013 - AM.8:30-12:00)

1. Hunkem : Revd Mang Suan Khup (Chairman, ZCLS)

2. Jubilee hanthotna : Revd Dr JM Ngul Khan Pau

3. Praise & Worship : Sia Kam Sen leh a lawmte

4. Mipi lasakna : Tho un, Tho un (TDM)

5. Thuzaksakna : Revd Lian Khen Pau (ES, ZCLS)

6. Khuaimeivak mal 100, Pastor & Upa mi 100 te' vaakna hun

7. Jubilee Mualsuang honna: Revd Sian Za Mung (Leipi BC)

8. Zolai tangthu & Cope topa thugenna: Revd Job Nang Khaw Thawng (Tahan BC)

9. Lapawl : Pyidawtha Baptist Church

10. Lungdamkoh thungetna: Revd Khoi Lam Thang (GS, BSM)

11. Duet lasakna : Lia Zambawi & Lia Cingpi

12. Citpiakna & Apna : GS, NTBA* (a kaikhawm, innteek nungakte)

13. Sermon LST simna : JM Paupu. 1 Cor.13:14-15; Late 133:1-5

14. Lapawl : Munlai Baptist Church

15. Hanthotna hun : Revd Dr JM Ngul Khan Pau (Guwahati, India)

16. Pahtawina huntuam khat kibawl aa: -

(1) Revd Kam Khaw Thang (D.D) pen Zo Laisiangtho hong puahsak masa pen a hihna tawh kipawlna leh mimal khenkhat tungpan "Pahtawina Laipi" piakna nei ciat uh hi.

(2) Revd Job Nang Khaw Thawng (Church Pastor, Tahan) pen Zolai tawh kigelh laibu tam a bawlkhia pen ahihna hangin kipawlna leh mimal tung pan pahtawina tuamtuam kipia a,Yangon panin zong Revd H.Gin En Cin (D.D) in ZYA te' tungtawnin laipi piasak hi.

17. Hunkhak thungetna : Dr.Hau Za Cin (Singapore-India)

18. Mipi lasakna : Topa tawh Tonkhawm in (TDM)

19. Thupha piakna : Revd Dr JM Ngul Khan Pau

20. Jubilee Ankuang-umna hun hi a, innteek pawlpi in vok luang nih leh Aksa tawi 20 tawh hong vak uh hi.


VII. Nov.3, 2013 (Sunday, night service) PM.6:30-9:00. Nitak nunung hunbawlna-ah, Revd Dr Man hau Cing, Th.D (GS, KVBC, Principal of KTC & Asst.Ptr.Tahan BC) in hun hong len a, Revd Khoi Lam Thang (GS, Bible Society of Myanmar) in hatthotna hong nei hi.

A TUAM A CIAPTEH HUAI TAWMKHAT.

(a) Ni lim thum sung vilvel sun thusinna hong pia ahi, Revd Dr.JM Paupu, Revd Khoi Lam leh Dr.Cinpu te ahi uh hi.

(b) Short Speech a kiseh om bangin, Bishop Felix Lian Khen Thang leh Revd Khai Khan Suan (D.D) te ahi uh hi. Bishop Felix hong kihel theih lo a hun masa pen hun ah, Revd Sut Khan Thang (D.D, CBA, CCPur) in hun khat hong makaih hi.

(c) Association leh Section zui-in thusinna ah mimal 350 in min khumsak a, sun sung thusin thungai vekpi pen 400 val pha den ahi hi. Nitak sim thungai ahih leh innsung inn pua tawh kigawm mi 1000 val tham ki-om den ding hi, ci-in kigen hi.

(d) Hunsim la makai pen Evan.Thawng Khan Kam (a)Kamsen (Grace BC) leh a lawmte mi thum in hong makaih denden uh hi.

(e) Keyboard pen Sia Zam Cin (Leipi BC) in hong tumsak den hi.

(f) Time Keeper pen, Pastor Neng Khan Go (Asst.Ptr, Munlai BC)

(g) Seminar hun neihna khempeuh innteek pawlpi panin Audio tawh record vaipuak la uh.

(h) Information & registered Counter ah, inntek pawn, Ptr.Vungboih leh a lawmten vaipuak la uh hi.

(i) Video tawh kisai pen, Peter Khampu (CMedia, Kalay) makai-in, (Minuamsa Video) in tavuan la a, internet tawh kisai Peter Khampu in vaipuak la hi.

(j) Nek-le-dawn leh tutna-khawlna a kisam teng innteek te'n vaipuak len uh a, anlui khangnote in a lu uh tuamin silh-le-ten zong ahi sitset tawh kithawi uh a, siangtho takin an hong lui uh hi.

(k) Lasa a tuamtuam a om ban-ah Lapawl sa a dangdangte pen Pinlong BC, Agapa A.G (AMC), Phualpi A.G, Bethsaida A.G, Tahan A.G, Tahan BC, Pyidawtha BC, Munlai BC, Bethel Zomi Baptist (Quartet) leh a dang pawlkhat om lai hi. Solo leh Duet zong honkhat mah om lai. Tua ban ah Zolai tawh lamsaina pen Emmanuel BC pan leh a dangpan zong om a, Siate a laphuah tawh bang tawh picing thei leh muhnop khop mai ahi hi.

(l) Vai khempeuh a huampi-in ZSLS Committee teng leh a diakdiakin Thuzekpi ahi, Revd Lian Khen Pau in vaipuak hong la ahi hi.


PIAKKHIATNA TAWH MAPANG KA PHAWKPAK TENG:

(1) Pa Pau Ngaih Thang (Sia Job Thawngno' naupa) te in sun niangtui khatvei hong sik uhi.

(b) Pa Kai Mung (Shalom Taik) te in sun niangtui khatvei hong sik uh hi.

(3) Bo Ngin Khan Khual + Nu Uap (Canedy Teashop) te in Breakfast hun khat Iciakuih tawn 400 tawh mipi hong vak uh hi.

(4) Cikha panin Sia Mung* in Ks.50,000/- tawh hong mapang hi.

(5) Inntek Tahan Tuiphum pawlpi in Jubilee Ankuang umna hong neih pih uh a, Vok nih leh Ak tawi 20 tawh hong vak uh hi.

(6) Revd Job Thawngno te innkuan in Cope topa tangthu tawh kisai Tracks a bawl uh mipi tungah hawmkhiatna, piakkhiatna hong nei uh a, kilungdam thei mahmah hi.

(7) Pa Lang Pau in a motor khat a pawlpi Tahan BC a beisa hun ah a piak ban ah a dang motor khat tawh a kisapna bangin transport lamsang tavuan la cih zong hong kigen hi. (A dangdang zong om lai ding hi, theihcian pak teng cihna bek ahi hi).

Tua lo piakkhiatna a pawlpawl om lai thei tham ding ahih manin mai ah ZCLS lampanin Report kician lai in zong hong suaksak kha ding uh ahih manin na ngak siam un, cih i kizasak hi. Tutung a pen Video zaih kawmkawm a keima ciapteh khak pak, "kiallap" i ci ding hi.

Mihing lam pan kitaklahna zong om thei ding hi ta leh pawipi kipat pan a tawp dong hong zawhpih ih biak Pasian' tungah lungdam thu i puak hi.  (Photo keima kepkhak pawlkhat tunin hong khak thei ing, na na etsak ciat dih un la, siang sinsen na sak kei vua leh ka Cemara zat pen teek pian ta ahih manin a hoih khat hong leisak le uh teh zong kikhasia khol lo ding ahi).

A tawpna-ah, tutungin Zomi level lian tawh kum 100 pawlpi i bawl pen ei khang sungah a nunung pen hong hi phot kha thei ding suak leh kilawm hi. Leitung a om lai leh mailam kum 100 cin kik ah ih tu sawnsawnte pawl in a namuakding uh hong suak bek ta ding ahih manin tutungin mimal ahi a, neksa sum-le-pai tawh ahizongin a kihel khate hampha kasa hi. Pasian in thupha namkim tawh hong thuk kik ta hen.

NB: Kammal kikhial a om leh a phawk te'n hong zuun sak hong puahsak taun. Lungdam.

Thupuak,

Peter Khampu (a) Dai Suan Kham Mate.
Media Dept. Zolai Simbu Kum 100 cin Jubilee Pawipi.
Tahan-Kalaymyo.

Ph: 09-3350-3356
E-Mail: peterkhampu@zomi.net

 


Comments

Khaipi
08/22/2014 22:19

Reply



Leave a Reply