WWW.TUNGZANGNEWS.COM

 
"Lawmlawm mahmah, Chin State ah teeng in Chin minam hipah, Manipur ah teng lehang Manipur hipah, Mizo ram ah teng Mizo hipah, Kawlgam ah teng Kawlmi suakpah, Malaysia ah teng lehang Malaysia minam hipah ding maw? Tu'n Singapore ah teng, Singapore minam hiding maw? Minam kilawhna, min neilo maw? Hizah aa hai ding ong siam pa'n ong siam in ka um hetkei aa, ei leh ei a kibum hilel ding in ka umhi.
Bangding aa i identity, ihihna beek theilo ihihiam?

Kawlpi pan Zolai Kum 100 pawisim, thusung aa vapai, Dr Hau Za Cin (Phuitong liim) ong tunkik Nipini in, " Dr Cinpu aw, Kawlpi aa natuah bangbang ZIS ah ong hawmsawn kik dih in" ci aa ka kikhoh khaak uhleh, tai ngah, "Inn nuai sial kang ngahding kakisak uhleh ngahcih thadah, thahlup matlup angahlo bek" ka hi uhhi. 

"Ko India lam ah Zomi ka kicih ngam kei uhleh mi' kawm lak aa hak thilthial bek ka hi uh aa, tu'n no Kawlgam ah, tai 100 kiimkot sung aa Zomi bebek teng in Zomi kicih ding hamsa salai, CHIN kicih ding peuh lunggulh mahmah" cih kawmkawm in apau ong zom zo nawnlo zah ahihi. A paungam, a ham ngam omlo tawm vei sung ka dai khipkhep uhhi.Tua laitak, mipi in thangahlua in Biakkikhop ahihlam zong phawk nawnlo in khut kibeng kha tahi.
"A nopna, nuam kasakna tampi ommah, tuate nung gen ni" ci-in hihteng ong genkhitciang a tutna mun zuan kik aa, "Ih lawmpa khasia mahmah himawk tah aa, bangcih peuhmah ding" cihmawhna tawh, a gei aa MImi Varte lah ahisamlo khat huhna ngen nuam kawm ka gaal et pheileh, ama'n zong na hopih pah ngam tuanlo ahihhang, a denlamteh akhut bom a mat phei sak lam kamu aa ka hu sanding lam kaphawk pan hi.

Lawmpa pen amit san gega lai hi. Kei zong dingto pahlian in, "Nidang aa HKL gilo, hangsan, mi taihaat, humpi bang aa hawk kawikawi, nong cihcih uh, tu'n nathei uhhia, Zogam, Kawlgam ciah le uhteh hehloh pianglo, akiheh nuam hilo, heh icih zong abaih hilo, hehloh ding om pah vevua" kacih pong leh ong nuih maikik zawdeuh aa,

Ute, naute aw, i mipi, nautang makaih kul lai mahmah hi, kipilsak na hikei, ihihna kipulak ngam nailo hizen hihang. I dinmun niam lai mahmah hihang, khua za mahmahlo, ihihna ahilo CHIN tawh kilo lehang Kawl Kumpi aa kipan namdangte anuam zaw ding peuh asa hizen hihang, bangbang tawh i kilo zongin amau ong awlmawh uh hipeuhmahlohi, kacihbeh laihi. Gensuak, zomsuak lai hileng, hehnem ding aa dingto kimlai kisatsuah ding lam-etna tam mahmah bekzong hilo, ka gei aa omlo Siamsin makai honkhat peuh agaal pan muknuai nuam laiding kahihman in kakhawl kikhi.

Maigual aa Thuhilh ding aa kicial Rev. Dr. Zambawi na nui hiuhiau ta leuleuhi. Hihpa abang nuih zak ahitam kacihi. A gilo taktak mah hi ei! ong ci hingel inteh kacihi. Sia hikei leh, "Nuih zak nadingf kigen maw?" cih phei ding nam ahihi.

Hunpi zangding Rev. Dr. Zambawi ong kipat ciang Lst zong sim man nailo, "Asawtlo lai in, Malaysia aa refugee siau, ei Zomi khat UNHCR te'n interview abawlna ah, a min dong - theilo, a Pa' min dong - theilo, a Nu' min dong - theilo, cih ong suahsak uhciang, Zomi vai mahmah kasa hi. Zomi icihte i identity, ihihna nangawn atheilote ihihi. Tuahang in Dr. Cinpu ong khasiat luatciang Malaysia aa thupiang ngaihsunkha in ka nuih a za ahihi. Zogam khuata pan aa ong paite gen naikeini,  i lam-et mahmah khangthakte nangawn in ihihna pulaak ngam nailo dinmun ihihi" ong cihsan ziau hi. Baihno tak aa tua ong cihziau hang, a kinuih maisak hang, a khitui zaamhi. A gaal lampek enkawm sa aa a gen ahihi. A lam-et ding a om tak nailo cihna ahihi.

Siamsin Seminar 2013-Kawlpi ah Dr. Cin Khan Lun Guite thusung ding, Pasian in lem asak leh vakuan ding ahihi. Amah pen Lamka pan hi aa NTU sangpi (Singapore) ah Post-Doctoral Research (Research Fellow) ding aa Singapore Kumpite sap ahihi. Kawlgam pan zong 1988 ma in hih programme kipan khin ngei ahihhang Galkap kumpi ong khan 88 khitteh, kizom suak nawnlohi. Kawlgam Universities te ah hih dinmun atung mipil kua mah om nailo cihding ahihi. 
Hihbang a vaihawm Siamsin makaite zong thumu kasahi. Sak leh khang i kisuktuah theihna ding vaihawm siam uhhi. Thumanpha tampi ong makaih theiding uhhi. Dr Cinpu in, "Ka nung aa ongpai pa khedap khau pheldingin zong ka kilawm keihi" ci ahihman in, minam vai khauhpai simsim dingin ka umhi. Lamka lam tual gal omlai in athuak kha mahmah khat zong ahihi.

Aheh om, a nui om, a hang i om hang, khitui zaam sa vive i hi aa, ahun ongtun ciang Topa'n i khitui zaamte ong nulsak ding lam etna, upna, muanna lianpi ka neihi.

Hang Khan Lian




-- 
Hang Khan Lian
Block 646#13-115
Jalan Tenaga
Singapore 410646
 


Comments




Leave a Reply