WWW.TUNGZANGNEWS.COM

 
Singapore pan Kawlpi ni khat in ka tungsuak hi! Singapore pan Zangkong ah, Zangkong pan Kawlpi ah - ut hile hang Tedim a kitungsuak ding ahi hi. Zolai bawlpa Cope topa Zangkong pan Kawlpi a pai ciang ni 7 pan ni 10 sung gunkuang tawh na kihotto hi. Tu hun ciang Singapore ah zing niangtui, Zangkong ah sun ann, Kawlpi ah nitak ann kidelhta hi. Sangmang Cope hun pan tu hun kum 100 sungah khantohna, kikhelna tampi om cih hong lak, hong musak hi. Zomite zong Zolai a thei bek hilo in laibu a bawl ziahziahte hita hang cih hong lak lai hi.

Kum lui pek in Zomi Christian Literature Society ah Secretary Rev. Lian Khen Pau in lai khat hong khak a, tua sungah tukum 2013 pen Zolai Simbu Kum 100 a cin kum a hih manin pawi khat kibawl nuam hi cih ahi hi. Pawi kibawl nuam bek hilo in thusinna leh thusunna zong kibawl nuam ah tua ah nang zong thusung dingin nong kihelzo diam ciin deihsakna laidal kilawm mahmah khat hong khak ahi hi. Kei pen Zolai a zang hi in a puah, a zuun zo pawl zong hituanlo in, ka minam pau leh lai Zolai takpi mite banga a siam gina zong hi kisa kei veng aw ciin ka dawnga, midang a kilawmzaw om ding hi ciin ka zasak hi. Ko zong limtak ka ngaihsut khit uh ciang kong zaksak uh hi a, nong san zawh ding zong a lamen hi ung hong ci hi. Tua ahih leh nakpi takin lungdam ing; ka hun omdan hong en ningin hong kikum nung, ciin ka dawngkik hi. Moses bangin kampau siamlo kisakna, Joshua bangin naupang kisakna leh David bangin kei sanga khanghamzaw om hilo hiam ka cih manin thakhat in a sang ngamlo, a kilawmzaw om lua ding ciin ka ngaihsutna leh ka upna ka gen ahi hi. Sia Pau in hong theisiam in, nang nong thusun ding leh gen ding thu pen Zolai leh Zokam bek hilo in tuhun science pilna lam tawh kisai limlim mipite theih ding a hoihte English hilo Zokam tawh hong pulak ding leh khangnote kiangah pilna a kisapna, pilna a zon huaizia hong uang gen dingin kong deih uh hi; a tua dingin nang hong deih hi ung hong cih ciangin kei leltak thugen ka mipihte in hamphatpih ding uh ahih leh ka hanciam kei ding maw ciin ka sang uh hi. Ka nupa un kikum in pai ding ka khentat uh hi. A hun hong tun taktak ciangin lawmnu Cingpi (Vung Deih Cing Valte) in a nasepna nusia theilo, amau sepna ah nurse khempeuh ama khutnuai ah om himawk ahih manin taisan theilo leuleu a, kei bek ka pai hong kulta hi.

October 29, 2013 zingsang nai 5 in tho in zingsang niangtui lawmnu in hong awm sitset a, Polar Fruit Cake tawh hong mehsak in ka nek khit uh ciang thungetna nei in vanlengtual lam ka manawh uh hi. Singapore vanlengtual Changi International Airport ka tun uh ciangin Terminal 2 ah lut in ka van teng uh Singapore International Airlines (SIA) SQ 998 ah ap in nai 7 ah lengkhia ding a hun hong nai mahmahta ahih manin a sungah ka lutsuak pah hi. Singapore pen amau gam passport tawite a thupisak mahmah leh a kithupisak nuam gam ahih manin amau gammi leh a gammi banga a tuatte uh (permanent resident) te pen midang lutna ah lutsaklo in amau leh amau konghong tawma lut ziauziau nading kongvang tuambawlsak in tua ah pumpi tung deihtaka kivel cih om vetlo in a lut thei uh hi. Kigualh kullo, kivel kullo a lutsuak in a sungah ka vanleng omna Gate 34 zuanin ka paisuak thei pah hi. A mun ka tun ciang vanleng kongkhak kihong nailo a, vanleng sungah hong lutsak pah nailo uh ahih manin a tuang dingte kingakkhopna ah "Free Internet" computer te mek in ka facebook peuh ka en hi.

Sawt tu manlo cih ciang vanleng kongkhak kihong a, a nunglam a tu dingte lut masa ding cih hi. A lai a tu ding te lut leuleu ding ci; a tawpna ah a mai guala tu dingte ci uh ahih manin a tawpna lam ah ka lut a, a maigual pan sima gual thumna ah ka tu hi. Ka gei ah nungak a kiva mahmah khat hong tu citciat ahih manin ka ihmut suak simsim zong ka ihmu ngam kei hi (hih bel kuamah kiang na gen kei un maw :) ). Ka veilam ah mikangte khat tu a, English pau zanglo mikangte ahi hi. Ka taklam nungak pen Kawlgam pan India ah Buddha pianna mun Bodh Gaya ah a hawh hi in Buddha tangthu kigelhna laibu India pan kibawl tampi a pua euau hi. Ei Christian te Israel gam hawh, Bethlehem leh Jerusalem hawh bangin amah zong akingaihsun hingel ding hi. Biakna thu mite in kin, thupibawl, hunpia, uangbawl uh hi. Upna maan tak neih ding, a nungta Pasian biak ding a thupizaw kan a hihna tel huai.

Vanleng kongkhak kikhak in a sunga tuang a tamzaw mikang vive hi a, kawlgam ah a khatvei paina uh a tamzaw dingin ka um mawh hi. Banghang hiam cih leh Zangkong vanlengtual ka tun uh ciangin kongkhak ah mite in na dawn zihziah uh a, kawlgam ah sumbawlna leh kizopna ding lam saite leh khuadak dinga khualzin (tourist) te hi in a tunna ding uh hotel te in na dawnsak uh ahi hi. Zomi khat in, a nungcianga hong genna ah, 'Kawlgam ah mikang hizah nidangin hong zin ngeilo uh hi' ciliang hi. Phulum bangin mikangte phul keei uh himai hi. Vanleng sunga tutna 285 om a, a vekpi in dim hi. A hawlte leh vanleng nungakte kihel nailo in. A tuang mihing 285 lak ah a tamzaw mikang ahih manin a sungah thupulakna khempeuh English kizang hi. Zomi a tamzaw hileh Zokam kizang ding hi cih ka ngaihsun kiukiau hi. Vanleng a lenkhiatna ding mun ah pai a, lengkhia dingin kigual diudeu a, ko a a 6na a hih manin tawmvei ka ngak uh hi. Kei hong kha lawmnu zong inn ciahta ding cih bang khawng ka ngaihsun giugiau hi.

Vanleng sunga mei teng hong kisumit in, a gin hong kikhek a, a pei hong kiling in hong siip ging teta a, hat deuhdeuh hat deuhdeuh in a mailam hong nawk veva a, huih tungah kilamto in a pei in leizulkha nawnlo in khuapi leh inn te, Singapore khuagei a tuipi tunga Tembawpi te akpi ciacia in kimu a, a sawtna ciang Singapore gam kimu nawnlo in a kilengkhiata himawk hi. Malaysia tungah lengto in Thailand gam tungah lengto a, Andaman Sea tungah lengto in Zangkong a lut ding ka hi uh hi. Meipi te tungah a kilaptoh khit ciangin vanleng sunga meite hong vakkik a, vanleng nungakte a pheizum ngo sitset uh kidawk hialhial kawma kileh zatzatte hong tam semsem hi. Banghangin vakvak uh hiam i cih leh nek ding Apple Juice, Orange Juice cihte hong hawm uh a, Niangtui leh Coffee zong a duhte adingin hong pia uh hi. Tuisik dawn ding zong om a, vantungah tui sangin apple tui khawng kiduhzaw ciat tawh kibang hi. Singapore Airlines ah vanleng nungakte pen Singapore kumpi in 'The Singapore Girl' ciin a ciamteh uh hi a, a melhoih, a thacing, a duangcing, a maitai, a kizen, a thanuam vive kitel hi. Zolia te zah in a hoih dekdek zong om leh kilawm!

Nek ding hong hawm leuleu uh a - ngasa leh singgah ne ding maw, aksa leh singgah leh alu em cih hi a, kei bang alu pen ka khua vuah zong ka ciin den uh hi cih khawng ngaihsun in ka nek tamloh zawk ngasa leh singgah ka tel hi :). Singgah leh moh keu, anteh holing leh mehgahte ban ah ngasa a guh omlo khutpek cia khat tawh buhsih leh benangnek sathau nello a kikang hi a, sa vitvit, khu veuveu in lim mahmah a, i nute'n phalbi zingsang i thawh cianga nek ding a annhuan uh a thuk khu litlit uh hong phawksak hi. Lim tuak mahmah ahih manin a khu tam pusuaksak manlo in sikkeu, temta leh sikkeuka lakhia in sikkeuka tawh suncip in temta tawh ngasa at khia in ka kam sungah ka guang pah ziauziau hi. Sikkeu tawh suak mehha te suak in ka kamsung mah ka tun zel hi. Limtak haizan sitset leng an lim se ahih man in damdam in ka haizan a, a khum tiuteu ciangin ka valh zel hi. Ahi zongin inn ah i nute huan, i lawmnu te anhuan zah in a lim ding bel leitungah na tam tuanlo himawk ei ka ci veve hi.

An kham khit ciang, annek khit ciang hizaw ei, singgahte ne in dawn ding tui tuamtuamte tawh khupsuk leuleu in ka mai a TV kisuaksak pen ka en hi. Ka ut leh football en, ka ut leh News en, ka ut leh movie en, ka ut leh games kimawl cih bangin ka hun hong bei hanhan a, Zangkong khuapi hong kilang dandan hi. Tua tak ciang a pua lam kikhuadak nuamzawata ahih manin music ngaihna ka bil ah thuah in a pua lam ka dak leh gunpi khat Zangkong khuapi laizang ah a luang ka mu hi. Leilak kinaih deuhdeuh in khuapi nai deuhdeuh a, vanlengpei in lei zuutkha in, vanleng kihuang deudeu a, Zangkong vanlengtual ah a tu ka hita mawk uh hi.

Ka zin masak laiin Zangkong vanlengtual ah pusuak dingin kigualh deudau kisam a, tu hun ciangin pusuahna ding kongvang tamzaw kihong ahih manin sawt ngaklo in ka vaiteng a mansiang pah hi. Ka van hong tunna ding lam manawh phei in duappi tungah hong kitaisak ka van ka muh ciang ka gei hong tun ding ngak in ka likkhia a, Singapore ah kikhen Zangkong ka kimu kik uh hi. Vanleng sungah i vante a nuai lam ah kitusak a, a mihingte a sungah kitusak hi :).

A pua ka pusuah leh mi thupi vive - Pu Kapno, President, Tedim Baptist Church Yangon; Rev. Cin Sian Pau, Pastor, TBCY; leh Pu Khup Mung, Zozum te in hong na dawn uh a, lungdam khut kilen in ka kinohset khit uh ciangin ka vante hong laksak lian in mawtaw sungah hong guansak uh a, kei mawtaw mai ah hong tusak in amau a nungah a tuang uh hi. Pu Kapno mawtaw tawh vanleng tual gei ah Annekna Phualpi khat ah hong lutpih uh a, aksa kan, moh leh niangtui lim mahmah hong nekpih uh a; tua mun ah Zozum ulian Pu Khup Mung in:

"Lengtong Kam Khen kiangah, "Hong ciah nawn kei in. Nong ciah hangin na kimanna ding om kei. Nang hong samte paina lamlam na zui suak maiin" ka cih hiven..."

ciin hong nuisak zaizai a, ka tawl uh hong dam hanhan hi. Zozumpu te kicih dan, kimaingap dante ka muh ciang a ki-it taktak, a kingai taktakte pen suakta takin a nui khawm, a holim khawm, a nuamsa khawmte hi uh cih hong telsak semsem hi. Zomi leh Zomi kimuh pawh nuam buang e maw guai, ngeungau liang ka ci hi...

(zop lai ding)

Hau Za Cin
Phuitong Liim
www.hauzacin.blogspot.com

 


Comments




Leave a Reply