WWW.TUNGZANGNEWS.COM

 
Zolai Simbu Kum 100 Cin Pawi Ah - 4 


Zomi khat nidangin Phaipi khuapi ah zin hi, kici hi. Khuapi zin ngeilo ahih manin Phaipi khuapi sungah mihing tam salua ahih manin, "Tunkim ni hiam?" ci hi kici hi. Ama theihna ah khawmpi khawng a om ciang, amau khua ah 'tunkim ni' pen khuasungah mi tam zaw thamtham ahih manin tua tawh teh in Phaipi khuasung pen 'tunkim ni hiam?' aci himawk hi. Nuihzakhuai hilo hi. Muhna kikimlo, muhna kibanglo cihna hilel hi. Kei adingin Kawlpi pen 'tunkim ni hiam' cih ding mah bang hi; Zomi hizah a om pen lamdang ka sa hi. Ka suah ka khan in Zomi hizah omna khua ah ka zin kha ngeikei a, zong ka mu ngei kei hi. Tua manin kei adingin Kawlpi pen Zopi ahi hi. Zomite khuapi lak pan a lianbel khua khat hiding ciin ka ciamteh hi. Vanleng sung pan ka pusuah ciang Zomi vive na kigual a, Zokam vive na kipau ziahziah a, Zopuan silh vive mat leh zet in kimu a, lamgei a mi kihosim lutlut i zakte khawng zong Zomi na hi in, sumbuk kongmai i pelh ciang zong sumbuk sunga vanlei leh vanzuakte pen Zomi vive na hi in Zokam vive na kipau ziahziah hi. Ka inntual tung ing ei... ka ci mai hi. Zomi vive hibanga i khuasak ziahziah pen nak nop teei ei maw. 

Tan 10 ka sangkah laiin Tonsim (Champhai) ah ka gang Tanzang pan vanzuak, vanlei in hong zin thei zel a, Zomi tawmtawm om uhteh hong cithei zel hi. Ka genkik ngamloh hang 'ko Champhai ah Zomi tampi tak om ve ung e' ka lungsim sungah ka ci gige hi. Mihing tulsawm peuhmah a tawmpen om ding ahih manin tua pen tam asa mahmah ka hi hi. Tutung Zomite khuapi khat ahi Kawlpi ka zin ciangin ka gangin a muhna tawh kei muhna kibanglo, Zomi tamdan ka muhna uh kikimlo na hileltak a, ama cih na dikzaw, na maanzaw himawk hi. Zomi hizah omin tam kisa nailo pen lamdang kasa a, ko Champhai lam ah Zomi tua zah om nailo napi tam ka kisa mahmah, ka kimuang mahmah lel uh hi. I minam sung zong tel mahmah ding kisam. Minam hihna kitel mahmah a kisap mah bangin minam sung, minam omzia leh minam vaite zong i theih mahmah kisam hi. 

Nupi thusiam mahmah khat a pasal a vaitun ciang a vaidawn dan siam mahmah hi kici hi. Amah'n bangci hiam cih leh, "Lawm aw, na gim hiam? Tui na dawn masa diam, ann na ne masa diam, ahih kei leh na kisil masa diam?" ciin dong masa den a, kamnem, kamsiam takin hopih den hi, kici hi. A pasal in a lawmnu itna leh deihsakna thupisa in pakta in zahtak mahmah a, it semsem hi. A duh a deih gen masa in a om leh ne, a om kei leh zong theisiam cih bangin a ki itna uh khang semsem hi kici hi. 

Kei adingin tutung Zolai Kum 100 Cin Pawi ah ka pai tak ciangin ka tun pan kipan, ka giahna ding ka tun dong, ka giahna pan ka vakkhiat ding hun, ka annek ding hun, ka vak ding hun ciang tanute leh tangzangte in 'bang na kisam hiam Sia?' cih bangin hong dong teekteek, hong hopih ciauciau uh a, a zak nuam in a thu nuam a, zahtakhuai in pahtakhuai hi. Mipi kisa phialphial liangin hong bawl uh a, hong kisuangsak phial zah dingin hong kemzo, hong donzo, hong vanzo uh a; hong ngekbawl uh hipen mai kasa hi. Hizah a nuam zindona tampi leitungah om khollo ding hi. Zomi sungah mipil, misiam, Lai Siangtho sang siapite, pawlpi ah makaipite, pawlpi upate leh khuasung uliante khawng in tua banga hong hopih ciauciau uh ciang 'a kihta sim pian pah hi' cih bangin mite thusiamna leh kamsiamna, lenglado siamna, zindo  siamnate pen kidawm taka sansiam ding kisam hi maw ciin kei zong ka siamzah in ka siam sawmpah hi. Ahi zongin ka Zomi pihte pen a zatzat uh, a ngeinasehsa uh ahih manin a teina uh a kamsiam uh kei thuhzawh ding nam hilo a, lungdam angtang kisa taka zat ziahziah ding nam hizaw hi. Hibang nunnop cik ciang kimu kik nawn ding hiam; tagah nawimuh mai veng e guai!

Ka tun nitak giahna ah Zomi Christian Literature Society General Secretary in hong khak khit ciangin tuilum tawh nuamtak kisil, puan siang sitset silh in kum nih bang ka kimuh nawnloh uh Sia J.M. Paupu te nupa tawh lungdam maitai in thungetna leh hun nuam zang thei in Topa tungah kiapna leh hun leh vai teng khempeuh apna siate leh a om thei khempeuh in neikhawm in tua zawh ciangin ka tawlnga baih uh hi. Sanggam u leh nau leh pawlpi upa makaite in deihsakna tawh hong puak uh lenggahzu, nahtang, lenggah, kawltu, singgah tuamtuam cihte khawng nek ding om den ahih manin nuam kasa mahmah hi. Thawhbat bel ciamkha hetlo in a ciahkik himawk ing (lawmte in Zogam Thawhbat minta ding cimah hiven, kan kha lo). Ka pai kik ciang tampi ne nuam ing, tuun lai ning... :)

Hotel ah zankim ciangin internet etna WiFi zong kikhak zel ahih manin WiFi khak zawh a sawtlo in kei zong ka lupna tungah zalmangpha man dingin ka zalta hi. Khangma phial in ka lupna pan ka khanlawh ciang ka khuadak leh zingsang nai 5:45am hi a, thoto in ka vakkhia hi. Innpua tawm ka vakkhiat leh singkung leh lopa huihsiang nung hiauhiaute in na mut hiauhiau a, vot pian ahih manin ka lutkik pah hi. Ka maiphiat in ka van ding teng kithawi in ka om laitak 'kiallap nek hun ei' hong kici ahih manin kiallap (breakfast) ne dingin ka paikhia a, siate kithawisa vive in hong pai mawk uh hi. Eih ciin, kei zong ka indei ah lutkik in ka kipumsil, kithawi sitset khit ciangin amau kiallap nekna ah kei adinga hong kibawlsaksa niangtui leh moh, aktui kan namtui viauviau leh singgahte ne dingin ka tu saisai hi. Kithawi khinsa a kiallap nek ding ahih lam theita ka hih manin a zinglam ciangin ka niangtui a khu veuveu mah in ka dawn thei denta hi. 

(zop lai ding)


 
Hau Za Cin
Phuitong Liim
www.hauzacin.blogspot.com
 


Comments




Leave a Reply