WWW.TUNGZANGNEWS.COM

 
Zolai Simbu Kum 100 Cin Pawi Ah - 5



Zolai Kum 100 Pawi ni hong tung ngawngawta ahih manin mikim kilawp in kizem sitset vive in Tahan Tuiphum Pawlpi biakinn kongmai ah ka ding tiptep uh hi. Nitak nai 5 pan mipi hong tam semsem in biakinn kongmai ah kidim ziaizuai a, khawmpi sungah hong kihello ding khuasung vak mite adingin lampi paina ding zong omlo zah phial in mi hong tam ahih manin lamnawl ah hong pelh uh kul liang hi. Pawi hong ding Rev. Tuang Khan Kap, Ex-Secretary, Zomi Christian Literature Society (ZCLS) in a Zopuan silh kilawm linlian tawh a khut ah Lai Siangtho leh Labu tawi kawmsa in mipi leh makaite mai ah dingin maitai takin mipite hong en kawikawi a, tu laitak ZCLS Secretary Rev. Lian Khen Pau in hunzat ding dan pulakna tomno a neih khit ciangin Pasian kiangah lungdamna pulakin, mipite tungah lungdamna pulak in, makaite tungah lungdamna pulak in, a khut taklam tawh a mai a kikoih temteh (scissor) la in, "Pa min, Tapa min, leh Kha Siangtho min tawh Zolai Simbu Kum 100 Cin Pawi ka hong hi," ciin a sam khit ciangin lampi khaktan a kikhung khauzang teptan a, khauzang tungah kikhih mutpuak lompite vantung lam ah lengto in mipi in lungdamna khut beng ngeingai in kiawng ziahziah hi. Thungetna khit ciang lasakna tawh biakinn sungah lut in Zolai Kum 100 Cinna Pawi a kizang suak pah hita hi. 

Tunkim Ni ahih mah bangin sak leh khang pan hong pai siate, makaite, khawmpi simte leh inntual pawlpi pan hong zindo khempeuh biakinn sungah kitu mitmet a kitazolo ahih manin a pua ah zong tutna tampi kidawh behlap in kitu dim zihziah hi. Inntek pawlpi te bangin a pua lam pan hong paite awn masa uh ahih manin biakinn sung ah tu masa lo uh hi kici hi. Zomi ngeina lengla do siam, zindo siam cihte Christian i suah khit kum za khit ciang zong kikemcinglai, kizang lai a lungdam huai mahmah hi. Mite adingin thupha hiding a cih pen uh a nungta Pasian i theihma pan i neih khit hinapi tuni tanin kizangsuak ahih manin minam hampha hi hang ka ci hi. 

Pawipi sim dinga hong pai bekbek 'taangmi' (delegates) bekbek zong min khum 324 bang pha hi kici a, tualo minkhum kikkik zong om hih tuak a, mipi kisim nailo khua pawlpi ciat pan hong kisawl teng zong khawmpi nuam mahmah ding khop kihita hi. Tua manin tutung khawmpi, Jubilee pen a lawhcing mahmah suak pah hi. Pawlpi pan hong kisawlte in  meetna, theihna, ngaihsutna thak bangzah ciahpih kik uh cih pen a gah kimu lai dinga tua tawh gawm leng a lawhcing mahmah hilo hiam ka ci hi. 

Zin Muak ni ahih mah bangin khua tuamtuam pan hong paite maitang kilahna leh muakna ahih manin tua hun ZCLS laiatpipa in hong makaih suak pah a; thugenpi ding Rev. Dr. JM Ngul Khan Pau leh a zi Nu Lucy Engjadim te muakna leh maitang lahna hong nei masa hi. "Zomi te in Pasian nasem tampi tak i nei a nupa kop hialhial a Pasian nasema zin tampi kinei hetlo ahih manin tutunga Siapate nupa pen i angtangin etteh huai a, hong khamuangsak mahmah uh hi. Topa in amau hunzatna ding leh a thusunna dingte vuah thupha pia in a za ding mipi khempeuh in zong hamphatna leh meetna, kha lam ah thadimna takpi i ngahna dingin Topa in thupha hong piaksakta hen," ciin mipi mai ah dingsak in mipi in khutbeng ziahziah in kivaidawn hi. A zom ah Zolai hong bawlsakpa Cope topa leh Zolai khantohna thu, tuni ciang dong Zolai a kipuahtoh dandan leh a maban dingte hong thusinsak ding Rev. Khoi Lam Thang, General Secretary, Bible Society of Myanmar dingto sak in, "Zolai leh Zolai tawh kisai hong van den, Zolai zuunna ah kidam hetlo in mapang leh Zolai leh Zokam a khanna dingin Seminar leh Laigelh tuamtuam a kin, a van a sem ZCLS Laiatpi lui Siapa tungah i lungdam hi," ciin mipi lungdam in khut kibeng zaizai leuleu a, biakinn tung sikkang bang a lehlama gialkia tawh kibang liang hi. A thumna ah, "Tutung thusunna hong nei ding tuipi gal mah ahi Singapore pan hong pai Dr. Hau Za Cin pen Zomi sungah scientist a tam hetlo lak pan khat hong kihel thei ahih manin nakpi takin lungdam in i angtanga, ama hong thusun ding Tuhun Nate (science) pilna thu leh Khangnote cih pen khawmpi simte in a lawp leh ngaklah mahmah thulu khat ahi hi. Hih bang thulu tawh thusunna kinei ngei nailo ahih manin ngaklah takin a kimaingat ahi hi. A innkuanpih nu Siamah Cingpi in hong zui theilo ahih manin pawi i sa a, ahi zongin amah tukum ading a khuan (leave) nei nawnlo hi napi a siate in Pasian mina kalsuanna ding ahih leh ciin a tuam vilvel a phalna tawh hong paisak uh ahih manin lungdam diak hang; i Pasian in hihtheihloh neilo hi," ciin mipi khutbeng zaizai in puak zaizai in kithalawp semsem hi. 

Makaite, siate leh upate a banban in maitang lahna hong nei toto a: tu nitak thuhilhna, thugenna hong nei ding Rev. D. Thuam Khan Thang, Principal, Bethel Bible College, Tedim zong a mun hong luah thei ahih manin nakpi in lungdam hang. India pan hong pai - Champhai pan Rev. Suan Khan Thang, Executive Secretary, Zomi Baptist Church, Mizogam leh a lawmte mi 7 i vaidawn a, amaute ciin a min uh leh a za uh hong pulak deudeu hi. Lamka pan hong pai Rev. Sut Khan Thang, Executive Secreatary, CBA, Manipur leh a lawmte ciin amau zong amin leh a za uh hong pulak deudeu hi. Khua pawlpi ciat pan delegates leh makai hong kisawl khempeuh dingsak in maitang lahna leh muakna kinei a puak zaizai in khut kibeng ziahziah hi. Hong siim khempeuh cih khit ciang khuatual pawpi (Tahan BC pawlpi cihna) khempeuh hong dingto un a cih ciang biakinn pua lam vive pan hong dingto zaw uh ahih manin tua huna khut kibeng pen a ngaih penpen ahi hi. A kiniamkhiat dan uh leh a thukhual dan uh bel midang khempeuh mun awn masa den uh a, a pawlpi Siapa uh Senior Pastor Sia Job Thawngno bang mipi tamlua ding cih theikhol ahih manin ama tutna ding hong kitawi pah in mite lak ah zong tu lo in kongkhak gei mun awng khat ah tu hithiat hi! Hizah a thusiam leh mite khual pawlpite thusiamna hang tawh hih bang hun kizang thei ahih manin angtang mahmah hang.  

Vaidawnna lapawl, vaidawnna thugen, vaidawnna tuamtuam khempeuh aki zawh ciangin tu nitaka thugen ding Sia Thuam Khan Thang samta ni ciin mipi in lawptak in khut betna tawh kimuak ziahziah hi. Amah in ciil hetlo in hong zang ziahziah a, a kiginkholhna lah nasia, a thugente lah thuk, a deihsakna lah lian, a muhkholhna lah sau, a gendan lah siam in kicing in telnop mahmah lai a, taang kam zang ziauziau lai ahih manin Zopau leh Zolai a siam mahmah na kidawk sinsen hi. Taang kam hoih nono hong zatte lak ah - lalthang, uai, zuun, khoi, cih khawngte in thu bun in lungsim vut deuh a, telnop in cik mahmah hi. A thugente a tamzaw ka ciamteh hi in a ban ah suaksak dingin ngaihsun ni in; kikhop tawp cianga a kimaingappihte tawh akiciamnuihna te uh zong thei khin lai hizen leng nak zaknop sem hi. 

Kawlgam zin cih buang Kawlpau ka theihloh citciat pawh 'piah-ta-na' tam mahmah thong ei :). 

(zop lai ding) 


 
Hau Za Cin
Phuitong Liim
www.hauzacin.blogspot.com
 


Comments




Leave a Reply