WWW.TUNGZANGNEWS.COM

 
Zolai Simbu i neih zawh kum 100 cinna Pasian' tung lungdamkohna leh Jubilee pawipi pen Oct.30-Nov.3, 2013 sungteng ZCLS makaihna tawh Tahan Baptist ah kizang a, zanitakin nuamtakin kizo thei ta hi. Sum-le-pai, tha-le-ngal leh thungetna mahmah tawh hong phawkpih akuamapeuh tungah lungdam thu kong puak masa uh hi.

Oct.30, 2013 nitak a kong genna ah Bulletin ah a kicingin om ding hi, ka cih pen computer laikheksakna panin hong copy piak uh pen a shortcut in na om a, hong khak thei pak lo hi ung. Tu-in Jubilee zat dan leh hunpaidan gen nai loh teng a tomkim thei pen dingin i kizasak nuam hi. (A nitak nihna ciang pen gen khin i hih manin i gen thuah nawn kei ding hi).

Sun hundang teng pen Dr.JM Paupu leh Dr.Cinpu te in hun hong la den uh a, thangahna leh thuthak theihbehna hon khat hong kibehlap hi. A maute' thugenna keima ciapteh theih pakteng a tomin hih a nuai a bangin ka thei hi.

HUNBAWL DANTE A HUAMPI A ZAKSAKNA:


(1) Revd Dr JM Ngul Khan Pau' tungpan:

Dr.JM Paupu in muntuam tuam a om Zomi sung kivaipuak dante leh
min-le-puam zat dan a thupitna cihte a kipan thu manpha leh Pasian'
thu tawh a kituak khantohna lam hong gen hi. Tuateng ban ah tulaitak
Zomite i zaw i ngau manin gamtuam tuam ah kitunga, sum tawmtawm i muh
manin nuamtuam i sa hi. Tuabang kawmkal ah mite gam, mite lei ah
kithehthangin om i hih manin mi pawlkhat pen a maban uh ka patauhsak
mahmah hi.

A hang pen mite pau-le-ham lah thei lo, sum ci leng lah nektawm khop
ding bek nei, nupa kal leh tate tawh kikal nangawn ah i kizop dan te
hong hikhin nawn lo zel ahih manin a lungsim kikepzawh loh manun amau
leh amau a kisusia cihte a kipan thu hoih lo pawlkhat i phuut khak
ding ka patauhsak mahmah hi, cih hong gen a, hi kiza mahmah hi. A
diakdiakin US leh gamla mun lam a om Zomi/Chin mi pawlkhat diakdiakte'
dinmun a muhna leh a veina hong genna ahi hi.

(2) Dr.Hau Za Cin' tungpan:

Dr.Hau Za Cin (a) Cinpu in Nate' thu leh tuhun khangno te thu cih tawh
hong gen toto a, a theihna sang mawk ahih manin mipi khuak in thu
pawlkhat pen ngahsut hak kisa thei zel ahi hi. A gen tampite' sungah
nidang hun leh tu khuahun kikhel zia, khantohzia te hong gen hi.

Computer a kibawl cil lai-in, Inn golpi cia khat pan set van tampi
thuah a hong kipat uh pen tu-in a neucik Smart phone nangawn hong om
ta ahih manin van neu semsem, kicing semsem cih ahih nate a lim tawh
bang tawh Power Point zangin hong lak hi. Tua bang na lianpi i cih pen
hong kipat khiatna a neu mahmah pan ahih na zong hong lak a hi. Tua
pen singteh khat hong lak a, a kipatna cell pan kipan mihing te khuak
ii theih bat zawh loh leh mit tawh a kimu bang vetvet lo nate a lim
tawh hong lak a, a khiatna hong gen ciangin zakngei loh leh theih ngei
loh thu tampi hong musak ahi hi.

A thutawpna leh a thukhupna ah hibangin gen hi. Science i cih pen
Pasian' thu tawh a kilehbulh hi peuhmah lo a, Pasian' ii hih theih leh
a septheihnate i telmuh zawk nading ahih manin leitungah a kisam
mahmah leh Pasian' min i phat theih zawk nang ahi hi, cih hong gen
ciangin hi kisa mahmah hi.

(3) Rev Khoi Lam Thang' tungpan:

Ih Zolai neih hong kipat cilna cihte pan hong khil to ngiatngiat a,
theih kibehlap theihna zong hon khat hong om hi. A diakdiakin hibang a
Zolai i neih zawh tu-in kum 100 petmah hong cing hi ta ahi hi. Cope
topa' hong mapat sa ahih manin Zomite khangtangthu ah a kimangngilh
thei ngei lo ding thu ahi hi, ci hi.

Tua ban ah i kammal zatzia aw sang aw niam cihte leh khiatna a kithei
pah lel laimal, kammal pawlkhat pen a double kulsak tuam lo ding cihte
a kipan hong gen toto hi. A thupi mahmah diak khat ah, Leitungah minam
kician khat hih i hihtheihna leh i kipsuak theihna ding a kisam pen
thu in, Gam leh Lai ahi hi, ci hi. Zogam i cihcih hangin Zomite teeng
kei leng migam milei hi lel ding hi. Tuaban ah i puah i zuun ding a
kisam ahi hi. Tuabek hi lo-in minam khat a hong kiciapteh na in
gam-le-lei i neih ban ah Lai kician i neih ding ahi hi, cih te a kipan
thupi tampi hong en a, tha kingah mahmah hi.

Zanitak, hun nunungah zong Siapa in sermon hun khat hong nei a, tha
kingah mahmah hi. Revd Dr Man Hau Cing in Chairperson sem hi. Tua lo a
hundangte ah Rev Thang Go Khup (GS, TBC), Revd Khup Khen Thang
(Sup.Kalay No.2 Section) leh Association zui-in kiseh ahi hi. Lasa leh
Zo ngeina lam lak zong honkhat om a, muhtak kisa mahmah hi. (Ka
bulletin pua kha lo ka hih manin a min a puam in ka lotngah khin kei
hi.


(4) Bishop Felix Lian Khen Thang' tungpan:

Nov.1, 2013 ni sun thusinna hun masa pen Bishop Felix Lian Khen Thang
in hong makaih hi. Hong thugente thupi thei mahmah a a kihel kha te
hampha kisa mahmah tek hi ung. Tuhun Zomite dinmun leh mi
namdangdangte dinmun zong hong gen hi. Ki-it kikhualna tawh mapang
khawm a hoihna khantohna lam tawh mite i delh ding cihte gen hi.

(5) Revd Khai Khan Suan (D.D) in zong hunkhat mah hong la a, Pasian'
thu leh Lai Siangtho tawh hanthotna hong nei hi. Thumanna leh cihtakna
i a thupitna leh Pasian' maipha ngah nading ahih lam hong phawk
thaksak mahmah hi. Ih pu i pate' hunlai a Zomite ki-itna, thumanna
leh cihtakna a neihna te uh leh tuhun ah a kithuman zawh nawn
hetlohnate hong gen a, thangahna tampi hong guan hi.

Tua lo Bishop Felix in hun nih a ngahna sungah a masa pen a
khualzinna tawh hong kihel thei pak lo ahih manin Lamka pan a hong pai
Revd Sut Khan Thang (DD) in hunkhat hong la hi. Zintun nitak sermon
pen Revd Dr Thuam Khan Thang hi a, Pasian' thu tawh kituakin i gam leh
i minam puah leh zuun ding cihte muibuntakin hong gen to hi. Tuaban ah
tuhun ei Zomi Christian te in thu pen deihkaih lua liang thei zel hi
hang. Penglam flim sungah, Lem in cia, cihte pen Tapidaw piangthakte'
nuntakna ah tuabang ciang tawh i dinmun kingak theih ding hi peuhmah
lo hi.

Thu pen limtak a ngaihsun lopi, limtak a sem lopi a tutmun ciangciang
panin i kam tawh i gen hangin tuabangin hong piang ding hi peuh mah lo
hi, cihte hong telphasak a, hi kisa mahmah hi. Na ci na lu na-in zato
lah kilak lopi-in lem in cia, dam lel in cia ci leh teh, ahih kei leh
na khualzin nading motor (or) Vanleng te a pai ding hun ah pai sem
lo-in na inn ah omom in, hun om lai, lap lel ning ee, lem in cia, lem
lel in cia, cihte pawl pen mite i phaklah nading leh thadahna kammal
ahi hi, cihte a a gennuam ahi hi.

(6) Revd Lian Khen Pau (ES, ZCLS) in ahun hunin thu kisam pulakna leh
vai bangkim ah tavuan hong la hi. Muntuamtuam a om Zomi khempeuh
tungah zong Cope i hong mapatsa maban zop ding a kulzia cihte a kipan
ama kammalteng mah bulphuhin vaikhakna leh hopihna cihte hong nei hi.
Tuate Video leh Audio te ah a kicingin om ding ahi hi.

(7) Zolai kum 100 cin phawkna tawh a kibawl Laibu apna hunkhat zong
kinei a, Revd Thang Go Khup, GS. TBC Tedim in hong nei hi. Revd Job
Thawngno in zong Cope tangthu leh i zolai neihna cihte article hoih
mahmah a bawl seminar pai teng a khawnkhongin hong piakhia a,
lungdamna lianpi kinei hi. Tutungin Zo Laisiangtho hong bawlsak ahi,
Revd Kam Khaw Thang (DD) zong pahtawina laipi kiapia a, amah hong
kihel thei lo suak ahih manin Kalaymyo a om a naupa, Hau Vai Kham in
sansak hi. Tua lo pahtawina laipi piak honpi khat om hi. Damin i
kizasak kik ding hi.


JUBILEE PAWIPI ZANDAN A TOMIN:

Zani, Nov.3, 2013 (Sunday) ni sunhun pen Zolai Simbu Kum 100 cin
Jubilee pawi hunin kizang hi. Am.9:00 pan in biakpiak hun kipan hi.
Pastor leh Upa mimal 100 te in khuaimeivak 100 ciat hong vaak uh hi.

Jubilee Mualsung honna pen Revd Sian Za Mung (Leipi BC) in hong nei
hi. Innteek Tahan khangnote in lapawl hong sa uh hi. A dangdang zong
bel om lai ahi hi. Tutung lapawlsa teng lakah Galilee A.G pawlpite mi
150 in Lapawl hong sa uh hi. Tua pen Cope Centennial Jubilee, Tedim ah
JK Kam' phuah pen, "Lamhilh Aksi" cih hi a, muhnop leh zaknop kisa
mahmah hi. Zopuan uniform vive tawh Sia leh Upate makai-in khangno
tampi tawh hong sa khawm uh hi.

Tua lo Pahtawina Laipi piakna cihte a kipan vai thupi hong khat om in,
a detail in kan khin man nai lo ka hih manin ZCLS Pu tawh damin kong
kimuh kik khit uh ciangin a kisam lai teng kong zasak kik ding uh hi.
Amau tulaitak Pyidawtha ah Zolai Joint Seminar a neihlaitak uh ahi hi.

I Siapite zong akuamapeuh in ki aam ahih manin zanitak bang Sia JM
Paupute nupa Pyidawtha ah hunzangin paiphei uh a, biakinn tual
dimletin mi kipai a, tha kingah mahmah cih kiza hi. Sia Khoi Lam leh
Dr.Cinpute a kipan a munmun ah kisam nuam a, ahun un a cin vet lo suak
ahi hi.

INNTEEK TAHAN TUIPHUAM PAWLPITE' PIAKKHIATNA:

Innteek pawlpi in nasep silbawl leh vaituam tuam tavuan hong laksak uh
a, Jubilee pawipi an vaak uh hi. Vok luang nih leh Ak tawi 20 go uh
hi. Cycle a cing tawh kuangbawl anlui cihte a kipan hong gamtang
diamdiam uh hi. A tuampian sim khat ah Anluite peuhmah in a lu uh tuam
uh, lukhu (numei te'n a kisil uh a, a lu uh a kawtak nop loh ciang vua
a zatte) khu ciat uh a, mipi in ettehhuai kisa mahmah ahi hi. Khuapi
sung leh neitheih sai thupite khawng sim loh Kalaymyo level bangah ka
muhcilna uh himai hi.

Thuumnopna khat ah: -

A hunsim in thu kong puak man kei hi. Video zaih den leh hunawng om
man lo hong suak hi. Tua manin nisimin hong kizasak zo lo a suak hi,
cih i kigen nuam hi. Tuaban ah Video hunbit tak a kila suak ahih manin
kong thupuak dan pen thugente' genna tawh a kituak khin lo khawng a om
khak a leh kitheihsiam mah hong kul ding ahi hi.

Photo honpi khat zong khak dingin ka bawl leh internet connection hat
lo lua mahmah ahih manin tuni-in kong khak zo kei hi. Zing leh thai ah
kong hanciam ding hi.

Laisim mimal tungah Topa'n a thakin thupha hong pia kim ciat ta hen.

Thupuak,

Peter Khampu
Media Dept. Zolai Simbu kum 100 cin pawi.
Tahan, Kalaymyo

 


Comments




Leave a Reply