WWW.TUNGZANGNEWS.COM

 
Mikang le Mangkang (Hoihmuhna Vs. Ahoihna mu)
Hoihmuhna cih le a hoihnamuhna cih kammalte gel a kibang lel hi ih cih hangin a thuluanzia taktak kibang lel vet lo hi. A kibatlohna a gah (result) pan kithei a, tua a kibatlohna thu suut deuhdeuh lehang kikeelki deuhdeuh hi mai hi. A kibatlohna thu nial kha lecin a kibatloh lam na tel semsem dinga, kibang sak lecin a kibatloh lam hong kilang semsem ding hi. En dih ni!




Zomi te in kammal zat kituh thei ding pawl khat ih nei gige hi.
Tuate in Sya maw? Sia? Le maw? Leh? Ong maw? Hong? Maan maw? Man? Zozaang maw? Zozang? Mangkang maw? Mikang? Cih bangin honpi khat ih nei hi.



Hih thu nih kikal ah mi pawlkhat in a zat zawk khat uh bek hoih muh uh in, a zat loh zawk ii a hoihna mu thei nawn lo uh hi. Gentehna mun khempeuh ah “Sya” bek zangin “Sia” zang nuam lo uh hi. “Le” bek zangin “leh” zang lo uh hi. “Ong” bek zangin “Hong” zang nuam lo uh hi. “Maan” bek zangin “Man” zang lo uh hi. “Zozaang” bek zangin “Zozang” zang nuam lo uh hi. “Mangkang” bek zangin “Mikang” zang nuam lo uh hi. Hih thu nihte gel kinial kido sak ding ci lehang gen ding tampi kinei tek dingin ka mu khin hi. Tuate lakah “Mikang” le “Mangkang” cih thu tawh kisai kammal tawm ka ong kum nuam hi.



“Mikang” cih kammal bek a zangte in Minam le gualtung tuanna thupi sak lua ahih manin, “Mangkang” cih ding hi kei. Ei Zomi te zong a Mang thei ta hi hang. Tua ahih manin, a vun kan uh zui-in “Mikang” cih ding hi ta ci-in gen uh hi. Hoih hi. ABM cih hun hi nawn kei. Zomi Baptist Church cih ding hi ta ci uh hi. hoih hi. Ahi zongin lungdamna thei loin a kipha sakte’ ABCte, ZBCte, MBCte damdamin hong beimang khak ding lunghihmawh huai hi. Thu le la tawh sum le paii tawh mite’ huhnopna thu nialna zong lungdam theih lohna khat hi a, kiphatsakna ahi hi. Huhna ih nial manin ih thuzuihna khangcing thei mahmah lo hi. Ei le ei hi kisa baih pahpah loin hong pantah Mangkangte tung pan Kha thupha leitung thupha ih kihuh sak phat mahmah ding hi zaw hi. Kawlkumpi in Mangkang kumpi lang bawla, India kumpi in Mangkang kumpi maivil-in kihuh sak ahih manin khangto zaw uh hi. Mite in Judson Church, Cope Memorial Baptist Church, Carson Church khawng a cih laitakin eite in ABM phiat dah lel-in “American Baptist Mission, Taklam Khua” khawng ci peuh lel lehang hoih mahmah, kho mahmah lel ding hi. Johnson Church, Nelson Church khawng ci thei lehang manpha mahmah ding hi. A hoihmuh sawmte in tua ka thugen a hoihna na mu thei uh hiam? Hoihmuhna in a hoihna taktak mulo kik thei zanzan ahi aw. Banghang hiam cih leh a hoihlote pawlpih nadingin hoihmuhna kizang hi.



Tua ahih manin Hoihmuhna (Optimism) in a hoih lote hoihmuh hi, cih ih kithei khia sak nuam hi. Galkap kumpi’ uk sung khempeuh hausa, kumpi nasem makaite le Kawlgam kumpi ki-ukzia pen a kihoihmuh hun hi. Hih hoihmuhna “em;vnfrSk” – Naalemuh a beima teng Kawlgam ki-ukna hoih thei lo ding hi. Kiphatsakna le minam kiliatsakna tek khang ngeingai ding hi. A langkhat ah, a hoihna (Possitive) mu ding cihteh a hoihlohna mu thei cihna zong hi pah hi. Thumaan lo thutang lo peuh mah hoihmuh khat zong nei lo cihna hi. Hoih muh kul loin ahoihna mu thei hi. A hoihna a mu theite in Satan hoih muh ngei lo hi. Galkap kumpi hoih sa lo hi. Mithat mikhem zuau phuak miginalote hoihmuh thei lo hi. Thumaan-thutak lo peuhmah hoihmuh nei lo hi. Lai Siangtho tel lopi in thuhilh Sya kineihte hoih muh lo hi. Ahangin hoih muh lehang a hoihlote a panpih a thapia a kipawl suaka, amaute tawh a nekhawm a dawnkhawm ahi hi. Nekloh buanlawh kei ni. Hoihmuhna in thusia hoih muh a, a mihing mudah thei hi. A hoihna muhna in thusia mudah a, a mite it siam hi. A hoihmuhte in makai citakte’ hoihna mu thei lo uh a, a hoihna a mute in makai hoih lote hoih muh thei lo uh hi.



Tangtawng peka ih zat “Mangkang” ih cih ciangin ei hong makaih hong pantahte hi uh a, minam vai le namneu vai hi lo hi. Cope topa, Cope tonu cih ding mah hi. Ih min lawhna hi lel hi. Mangkang cih ding mah hi. Ih ciapteh na hi lel hi. Tua banah Zomi te’ gen Mangkangte pen “English” te hi pha diak hi. Lungdamna mangngilh kei ni. Geeltui ah a thuk kik hi hang. Mikang khempeuh Mangkang hi lo uh a, Mangkang khempeuh Mikang ahi uh hi. Tua ahih manin “Mikang” ih cih ciangin vunkang namte (a diakin Europe/Western) mite a gen hi ni-in, Mangkang ih cihteh Kawlgam le Zogam ah Lungdamna thu hong puak ih pu “Mangkang/ Bristish/English/American” te ih lawhna hi sak ni. Ih lungdamkohna hi sak ni. Ih tangthu in zong a na ciapteh uh ih zatsa pu le pa’ kammal hi. Tua ahih manin a nih tuak in a kizat nading mun om ahih manin, Zolai khansuah kawm zuun kawm kipuah kawmin Mikang zatna le Mangkang zatna a om hi, ci-in a kigen a kihilh ciangin thukim ni. Khat veivei “Mangkang” cih kammal a zang nuam lote in a hoihna thu kigen mu thei lo uh a, amau’ “Mikang” zat ding bek ah hoih muh uh hi.


Tua ahih manin tuni Zomi khangthakte in hoihmuhna bek panin a hoihna muh theihna ah kizeek kul ta hi. “Sya” pen laihilh Syate ah kizang a, “Sia” pen hoih lo “sia” cihna ah zang ni. “le” pen “and” munte ah zangin, “leh” pen “if/condition sense” te ah zang ni. “Ong” pen singular form in hihci bangin zang ni. Khat bek ong pai hi. “Hong” pen plural form bangin zang ni. Nih le thum hong pai ding uh hi. “Maan” pen “Thumaanna/Justice” adingin “a” mal nih tawh zangin, “Man” pen “Thumanna/Obedience” adingin “a” mal khat tawh zang ni. Zaanggam lam khuate adingin “a” mal nih tawh “Zozaang/Dimzaang” sak ni-in, Khamtung khuate adingin “a” mal khat tawh “Zozang/Mualzang/Sezang/Simzang” sak ni. Mikang khempeuh Mangkangte hi lo uh a, ahi zongin Mangkang khempeuh Kang hamtang hi. Zomi te’ adingin Zolai kilailai sak kei ni-in, zangkhawm zuun khawm diamdiam ni. Nang zat nop bek “hoihmuh” kei inla, anih tuakin a hoihna mu thei a, Zolai zat le zeek ziahziah ding hun hi ta hi.



Tua ahih leh “Mangkang” ‘a’ mal khat tawh ding maw? “Maangkaang” ‘a’ mal nih tawh hi ding? Ahi kei leh “Mang Kang” ci-in Mang le Kang kikhen sak ding hi lo hiam? cih bangdan-a dotnate pen theihnopna le hoih dotna hi nawn loin kheltat-paupennopna peuh hi thei hi. Thu hong kigen hong kihilh ciangin eimau’ hoih sak bek hoihmuh loin a hoihna mu khawm ni. Khat la-in khat nusia kei ni. A nih in a nungta uh hi. Mangkang le Mikang tawh kisai ah, Hoihmuhna in khat bek teel a, a hoihna muhna in a nih in teel hi. Hoihmuhna in a hoih lo khat hoih muh ding cih lamah tam kiat zaw tawntung hi. A hoihna muhna ah thumaan-thutak om hamtang hi. A kihoih muhmuh lai takin a hoihlohna thu a genkhia ngam Abraham Lincoln, Dr. Martin Luther King, President Mendela, Daw Aungsan Suh Kyi cihte ii thu gente ahoihna muh ngam sawm ni. Hoihmuh suk polpol kenla, a hoihna muh ngam sawm zaw in. A hoihna gen ngam sawm zaw in. A hoihna pawlpih ngam sawm zaw in. Hoihmuh sihpih ngam sangin ahoihna nuntakpih ngam ding thupi zaw hi.

Evan. Suang Dal

 


Comments




Leave a Reply