WWW.TUNGZANGNEWS.COM

 
A munmun pan nong thungetpih ciatna uh leh Pasian' Kha Siangtho
makaihna tawh (Dec.10-12, 2013) a kizang Planershakers Concert &
Healing Crusade pen nuamtakin kizo siang ta ahih manin hong matutpih i
biak Pasian' tungah lungdamna i puak hi.

Hih hunsungah lasa leh tumging tum pawl in a hunhunin la hong sa
ziahziah, hong lam ziahziah uh a, Hanthotna pia Dr.Tim Hull thugenna
tawh kikalhelhsak zel ahi hi. Thungetsak ding lunggulh a kigual pen
mimal in ngetsak zo kim lo ahih mani a omna pan thungetsak a, damna
ngah zong honpi khat om hi.

A thutuampian leh lamdang kasak lai khat ah a tawp nitak Dec.12, 2013
hun mankuan lam teh khangnote thungetsak ding suak a, kum 15-25 kikawl
teng mipi' lakpan sam a, pai kim tuak phial mawk uh hi. Khangnote in
thunget ziahziah uh a, a lungsim vuah lawp thakna tampi ngah uh a,
lungdamhuai mahmah hi.

Tuanbek tawh man lo a, khangno te thu a ngetsak khit ciangin mipi mai
ah kigualsak a, tua te in mipite thungetsak ciat uh hi. Mipite'n zong
khangnote hizah a biakna sungah hong kibual nop uh tha ngah lua uh
ahih manin khitui-naptui luanga kikah keei bang om ahi hi.

Hih Concert leh Crusade hun sungteng tualpi kim a kipan khuasung
veengsung ah thusia lasia om het lo-in Pasian in hong gualzawhpih a,
ih lungdam mahmah hi. Siate kigin ni tawlnga uh a, zani, nipini-in
Dr.Tim Hull leh Revd Khup Khan Thang (a) Sia Thangpu in biakinn
tuamtuam ah hanthotna pia-in kikhen uh hi. Tuni a Monywa leh Yangon
lam zuan tuak ta uh hi.

Tuasungah pen mipi akuamapeuh in i lunggulh pha diak ahi,
Planershakers te' laksakna, music tumsiamna leh minam tuamtuam pan
lasakna hoih nono te kihel ding ahi hi. Kum thak khit lam ah a munmun
ah hong kihawm khia ding ahih manin ih biak Pasian leh i minam mapanna
ngaihsutpih a, tha nong na piaksak ciat nading uh zong a kicial khol i
hi hi.

A kisam lai leh kitheihsak tuak a omlai leh Sia Nang a kipan khat peuh
in hong behlap ding uh hi. A hizah in a kigen siam lo hi zaw, a a
lamdang phial zahdong leh a angtanhuai mahmah ahih na thu tampi om
ahi, cih tawh tutung ih Crusade tawh kisai a hialbawl ta i hi hi.

Omna ciatah Topa'n eite khempeuh tawh hong Emmanuel ta hen. Amen.

Lungdamna lianpi tawh Commitee teng tangin,

Peter Khampu (a) Lc.Dai Suan Kham
Media Dept. (Planetshakers Concert & Healing Crusade)
Tahan-Kalaymyo

--

Peter Khampu
CMedia, Kalay
 


Comments




Leave a Reply